Rehọ Ibroshọ Whowho Emamọ Usi Uvie Na
1 Ẹvẹ o rọ oware oghọghọ te re ma riẹ uzẹme na jẹ rọ udevie ahwo nọ e be rehọ ajọwha whowho emamọ usi na! O gwọlọ nọ ahwo nọ a rọ otafe ukoko Ọghẹnẹ a yo emamọ usi Uvie na. Uzẹme kpahe Uvie na a dhesi rie lọlọhọ evaọ ibroshọ na Reawere Uzuazọ Otọakpọ Bẹdẹ Bẹdẹ!, “Ri! Me Bi Ru Eware Kpobi Fihọ Ekpokpọ,” gbe Egọmeti Nọ Ọ te Rehọ Aparadase Tha. I dhesẹ uzuazọ otọakpọ evaọ otọ Uvie Ọghẹnẹ vevẹ, e tẹ jẹ kpọ ọnọ o bi se na kpohọ imuẹro Uvie na nọ a dhesẹ evaọ Ẹme Ọghẹnẹ. Dede, efihọ ada ibroshọ kugbe ohwo nọ o wo isiuru yọ emuhọ gheghe evaọ iruo mai. (1 Kọr. 9:23) Joma kaki zihe bru enọ ma fi ebe họ ada kẹ kpobi, avọ iroro emuhọ ewuhrẹ evaọ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na. Ẹvẹ ma sae ro ru onana gba evaọ August?
2 A rẹ sae rehọ odhesẹvia ọkpẹkpẹe fi ibroshọ na “Reawere Uzuazọ Otọakpọ Bẹdẹ Bẹdẹ!” họ ada. Nọ who bi dhesẹ uke riẹ na, whọ rẹ sae ta nọ:
◼ “Mẹ gwọlọ dhesẹ oware jọ k’owhẹ nọ u wo ovuẹ uwowoma.” Rovie ibroshọ Uzuazọ Otọakpọ na, je se edhe-ẹme ọsosuọ emuhọ na. Whọ vẹ ta haro nọ: “O k’uyo onọ onana re [rovie kpohọ uzoẹme nọ o rọ ehru ọ ifoto avọ 8 na]: ‘Fikieme ohwo o je bi whuẹ?’ Whọ te ruẹ nọ u ti si owhẹ urru re who wuhrẹ ifoto na je se ikereakere nọ e rọ ibroshọ ọnana. Whọ tẹ gwọlọ ru erei, whọ sae woi evaọ azọhọ ₦25.”
3 Eme whọ te ta okenọ who te bi zihe bru enọ who fi ibroshọ “Uzuazọ Otọakpọ” na họ ada kẹ? Whọ rẹ sae dawo onana:
◼ Dhesẹ ifoto avọ 49 evaọ ibroshọ Uzuazọ Otọakpọ na whọ vẹ nọ inọ, “Kọ onana o gbẹ rọ ifoto owowoma? [Kuvẹ kẹ uyo.] O rọ evaọ ibroshọ nọ mẹ nyaseba k’owhẹ evaọ iweze ọsosuọ mẹ. Mẹ gwọlọ n’owhẹ onọ nọ o rọ ẹwẹ-obe nọ o kẹle riẹ.” Rovie kpohọ ifoto avọ 50 je se onọ na: “ ‘Kọ whọ gwọlọ ria bẹdẹ bẹdẹ eva aparadase owoma ọyena?’ [Kuvẹ kẹ uyo.] Otẹrọnọ oyena họ iroro ra, muẹrohọ oware nọ o ta nọ who re ru: ‘O tẹ rọ ere gbe wuhrẹ onọ Ọghẹnẹ ọ ta.’ [Se Jọn 17:3.] Eva e te were omẹ re me wuhrẹ Ebaibol kugbe owhẹ ọvọvẹ. Kọ oyena o were owhẹ?” Fi ẹdẹ họ nọ who re ro zihe.
4 Okenọ who te bi fi ibroshọ na “Ri! Me Bi Ru Eware Kpobi Fihọ Ekpokpọ” họ ada, whọ sae muhọ ẹkwoma edhesẹ ifoto uke obe na kpobi whọ vẹ nọ inọ:
◼ “Eme who roro nọ o rẹ gwọlọ re a ru otọakpọ kpobi jọ wọhọ ọnana?” Kuvẹ kẹ uyo. Dhesẹ eware ifoto na jọ, nọ a gbiku rai evaọ ẹwẹ-obe avọ 3 na. Whọ vẹ ta nọ: “Ahwo buobu a re roro nọ o re bẹbẹ re a ru akpọ na epaọ ọnana. Rekọ o re bẹbẹ kẹ Ọghẹnẹ re o ru ei hi. [Dhesẹ igogo-eme nọ e rọ edhe-ẹme avọ 43; je se Aizaya 9:6, 7.] Ọghẹnẹ ọ yeyaa nọ ọ te wha akpọ ọkpokpọ ze nọ ahwo nọ i no erẹwho kpobi ze a te jọ reawere aparadase ogbunu. Mẹ gwọlọ nọ who se ibroshọ ọnana. U ti dhesẹ epanọ whẹ avọ uviuwou ra a te rọ reawere obaro igbunu nọ Ọghẹnẹ o ti ru.”
5 Evaọ ozihebro, whọ rẹ sae rehọ ibroshọ “Ri!” na ro dhesẹ oware nọ osoriẹ nọ o rọ gwọlọ nọ ma gbe wuhrẹ kpahe Ebaibol na. Whọ rẹ sae wariẹ dhesẹ uke obe na jẹ ta nọ:
◼ “Okenọ mẹ kake dhesẹ ifoto nana k’owhẹ, ma rọwo nọ o te were omai re ma rria evaọ akpọ igbunu otiọye na. Re onana o lọhọ, oware jọ riẹ nọ o gwọlọ nọ mai kpobi a re ru.” Rovie ibroshọ “Ri!” na kpohọ edhe-ẹme avọ 52; se edhe-ẹme na gbe ikereakere ọ Jọn 17:3. Ta ovuẹ na kugbe udhesẹ nọ o rọ edhe-ẹme avọ 53 kpahe ewuhrẹ Ebaibol nọ u fo, je dhesẹ nọ Isẹri Jihova a rẹ kẹ ọkpọvio otiọye na ọvọvẹ evaọ uwou. Vuẹe nọ whọ gwọlọ dhesẹ edhere uwuhrẹ mai, nọ whọ be rehọ obe Eriariẹ na ruiruo na.
6 Okenọ who te bi fi ibroshọ na “Egọmeti Nọ Ọ te Rehọ Aparadase Tha” họ ada, whọ rẹ sae dawo onana whọ vẹ ta nọ:
◼ “Me yo ẹme ahwo buobu no nọ a be ta nọ a gwọlọ nọ a rẹ rria otọ egọmeti nọ ọ sae ghine ku ebẹbẹ nọ ma rẹriẹ ova dhe nẹnẹ na họ. [Fodẹ ebẹbẹ jọ wọhọ ababọ-iruo, evihọ emuemu, hayo ogbẹlọ imu.] Eware enana e rẹ lẹliẹ omai kare ufuoma kpahe obaro mai gbe enọ ma you. Kọ who roro nọ egọmeti jọ ọ te jariẹ nọ o ti ku ebẹbẹ enana họ? [Kuvẹ kẹ uyo.] Otiẹsejọ whọ lẹ Olẹ Olori na no. Otẹrọ ere, kọ whọ riẹ nọ egọmeti okiẹrẹe whọ be ghinẹ lẹ kẹ na?” Rovie kpohọ ẹwẹ-obe avọ 3 evaọ ibroshọ Egọmeti na, je se edhe-ẹme ivẹ ọsosuọ na. Fi ibroshọ na họ ada.
7 Otẹrọnọ who fi ibroshọ na “Egọmeti Nọ Ọ te Rehọ Aparadase Tha” họ ada, whọ rẹ sae mu ẹmeọta na họ evaọ ozihebro inọ:
◼ “Oke ọsosuọ ma t’ẹme kpahe ẹgwọlọ kẹ egọmeti okiẹrẹe nọ ọ sae ku ebẹbẹ ohwo-akpọ họ. Ibroshọ nọ mẹ nyaseba k’owhẹ na o riobọ kpohọ Uvie Ọghẹnẹ wọhọ ẹruore ọvo nọ ma wo. U bi gbe ahwo jọ unu kpahe oware nọ egọmeti yena ọ sai ru re o ru eyero uzuazọ mai woma. Ebaibol na o dhesẹ nọ Kristi ọ te kparobọ evaọ eria nọ isu ohwo-akpọ i je kie.” Rovie ibroshọ Egọmeti na kpohọ ẹwẹ-obe avọ 29, je se edhe-ẹme ene urere na. Whọ vẹ ta nọ: “Kọ oyena u gbe dhesẹ obaro igbunu? Whọ gwọlọ nọ whọ rẹ rue riẹ?” Kuvẹ kẹ uyo. Se Jọn 17:3. Tudu họ ewuhrẹ haro ẹkwoma obe uwuhrẹ Ebaibol.
8 Otẹrọnọ whọ be rehọ ibroshọ efa ruiruo, whọ rẹ sae ruẹrẹ idhesẹvia obọ ra họ, who ve riwi enọ a dhesẹ fihọ obehru na wọhọ oriruo. Ruẹrẹ oma kpahe ziezi jẹ yare oghale Jihova nọ who bi whowho emamọ usi Uvie na.