Rehọ Ẹrọwọ Nya
1 Ima ahwo buobu a rehọ izuazọ rai hwa ekwakwa efe rai, be rehọ ugheghẹ fievahọ ogaga eviẹhọ efe. (Mat. 13:22) Aro ọ rẹ hiẹ ai okenọ efe rai i te vru hayo nọ a te tho ai no hayo nọ erere rai i gbe bu hu. A ta k’omai nọ ma le edhere nọ ọ mai wo areghẹ, họre kẹ ekwakwa-aghae ẹzi. (Mat. 6:19, 20) Onana u w’obọ kpahe ‘ẹrọwọ ọ rọ nya.’—2 Kọr. 5:7.
2 Ẹme “ẹrọwọ” na a fa riẹ no ẹme Grik nọ u wo iroro ọ udufihọ, evafihọ, eriwo ọgaga ze. Re a rehọ ẹrọwọ nya u dhesẹ nọ a rẹ rẹriẹ ova dhe eyero ọgaga avọ evafihọ Ọghẹnẹ, bi fievahọ ẹgba riẹ nọ ọ rẹ rọ kpọ ithihi mai gbe unevaze riẹ orọ ẹruorote ẹgwọlọ mai. Jesu o fi oriruo ọgbagba họ otọ; ọ t’ẹrovi eware nọ e ghinẹ mae r’oja. (Hib. 12:2) Epọvo na re, o gwọlọ nọ ma rẹ kpọ idu mai kpohọ eware nọ a rẹ ruẹ hẹ, eware ẹzi. (2 Kọr. 4:18) Ma re vuhumu hrọ kẹse kẹse nọ uzuazọ ọgbọna o kare imuẹro jẹ riẹ nọ ẹria mai kpobi o roma hwa Jihova.
3 Ma rẹ jẹ rọwo gaga inọ Jihova o bi su omai ẹkwoma ukoko riẹ nọ a rẹ ruẹ eva otọ ọkpọvio ọ ‘ọrigbo nọ o wo ẹrọwọ avọ areghẹ na.’ (Mat. 24:45-47) Ma re dhesẹ ẹrọwọ mai okenọ ma te bi ‘yo ẹme enọ e be k’obaro’ evaọ ukoko na. (Hib. 13:17) Ma tẹ be rehọ omurokpotọ ruiruo kugbe ọruẹrẹfihọ esuo Ọghẹnẹ u re dhesẹ evaifihọ mai kẹ Jihova. (1 Pita 5:6) U fo re ma muọwhọ rehọ udu kpobi fiobọhọ kẹ iruo nọ a kẹ ukoko na nọ o ru. Onana u re si omai kẹle inievo mai eva ọgbakugbe uyoyou ọgaga gbe okugbe.—1 Kọr. 1:10.
4 Epanọ A rẹ rọ Bọ Ẹrọwọ Ga: Ma rẹ kẹ ẹrọwọ mai uvẹ re o mudhe vievie he. U fo re ma họre gaga re ma ru ei ga haro. Uwuhrẹ ikẹse kẹse, olẹ, gbe ekpohọ ewuhrẹ u re fiobọhọ k’omai bọ ẹrọwọ mai ga, re avọ obufihọ Jihova, o vẹ sae za oghẹrẹ ẹdawọ kpobi dhe. (Ẹf. 6:16) Kọ whọ ruẹrẹ emamọ oma ọ isase Ebaibol okpẹdẹ gbe omaruẹrẹhọ kẹ iwuhrẹ họ no? Kọ who re roro ẹsibuobu kpahe oware nọ who wuhrẹ, kọ who re bikẹle Jihova evaọ olẹ? Kọ o rọ uruemu ra re who kpohọ iwuhrẹ kpobi je w’abọ fihọ ai wọhọ epanọ uvẹ u rovie te?—Hib. 10:23-25.
5 Ẹrọwọ ọgaga o re dhesẹ oma via ẹkwoma emamọ iruo. (Jem. 2:26) Edhere jọ nọ ọ mae woma nọ ma re ro dhesẹ ẹrọwọ mai họ ẹkwoma ẹruore mai nọ ma re whowho k’amọfa. Kọ whọ be gwọlọ uvẹ nọ whọ rẹ rọ ghale emamọ usi na kugbe amọfa? Kọ whọ sae nwene eyero ra re o k’owhẹ uvẹ gbẹ nya haro evaọ odibọgba na? Kọ who bi fi ezọhọfihọ nọ ma wo na họ iruo re i fi ẹnyaharo họ aghare gbe ẹgba odibọgba mai na? Kọ who bi fi ute ẹzi họ k’omobọ ra jẹ daoma re whọ nya tei?
6 Jesu ọ vẹvẹ unu kpahe oma nọ a re dhehọ eware uzuazọ ekẹdẹ kẹdẹ vrẹta jẹ kuvẹ kẹ ekwakwa efe hayo isiuru omobọ ohwo re i ruru eriwo ẹzi mai. (Luk 21:34-36) Ma re fiẹrohọ otọ evaọ onya mai hrọ re ma se okọ ẹrọwọ mai ba e zue. (Ẹf. 5:15; 1 Tim. 1:19) Jọ mai kpobi a wo ẹruore inọ evaọ ukuhọ riẹ ma te sae ta nọ ‘mẹ họre uvi ohọre na no, mẹ dhẹ ogbohrẹ na no, mẹ yọrọ ẹrọwọ na no.’—2 Tim. 4:7.