Jọ Oriruo Evaọ Ẹme-Unu gbe Uruemu

¹ Pọl ukọ na ọ hrẹ Timoti re ọ jọ oriruo evaọ ẹme-unu gbe eva uruemu. (1 Tim. 4:12) Ma re je dhesẹ oriruo ẹme-unu gbe uruemu, maero okenọ ma rọ iruo odibọgba na, keme erei oruo o sae dhesẹ sọ ma te nyate udu ahwo nọ ma nyaku hayo ma ti ru erei hi.

² O gwọlọ nọ ma dhesẹ kabọ kabọ emamọ uruemu, nọ u kugbe adhẹẹ, ororokẹ, uwowou, ẹwolẹ, gbe ẹghẹ. Ẹkwoma edhesẹ iruemu enana, ma je dhesẹ nọ ma riẹ kpahe oghẹrẹ nọ owọjẹ mai u re kpomahọ amọfa. A rẹ sae rehọ emamọ uruemu evaọ odibọgba na ro dhesẹ amere nọ a re fihọ emuore re u gbo ore-awere. Ababọ rai, emamọ emuore ọ rẹ jọ kpiẹi jẹ kare awere. Ma gbẹ sae dhesẹ emamọ uruemu evaọ iruẹru mai kugbe amọfa ha o rẹ sai ru nọ emamọ ovuẹ mai o jẹ kare awere.—Kọl. 4:6.

³ Jọ Oriruo Evaọ Ẹme-Unu: Ovao osasa gbe uyere ojaja yọ eware nọ i wuzou evaọ ewhowho emamọ usi na. Okenọ ma tẹ rehọ omosasọ gbe unevaze fi awere họ eme emuhọ mai, ma rẹ sae rehọ erei jẹ ọnọ o wo uwou na riẹ nọ ma ghine wo isiuru kpahiẹe. Okenọ ọ tẹ be t’ẹme, gaviezọ ziezi je dhesẹ adhẹẹ nọ u fo kẹ ẹjiroro riẹ. Okenọ whọ tẹ be t’ẹme, ru erei avọ ẹghẹ gbe aruoriwo.—Wawo Iruẹru 6:8.

⁴ Ẹsejọ ma rẹ nyaku ohwo nọ ọ rẹ gbẹroma, avọ ẹwhọ dede. Kọ ẹvẹ ma re ru? Pita ọ ta k’omai nọ ma rẹ t’ẹme evaọ edhere nọ u dhesẹ “udu uwowolẹ avọ adhẹẹ odidi.” (1 Pita 3:15, NW; Rom 12:17, 18) Jesu ọ ta nọ otẹrọnọ ọnọ o wo uwou na ọ rehọ ẹwhọ se ovuẹ Uvie na, ma re ‘nuhu ẹkpẹ evawọ mai no’ ọvo. (Mat. 10:14) Edhesẹ oriruo uruemu mai evaọ otọ iyero itieye na o sae ru udu ọnọ ọ be wọso na lọhọ evaọ ukuhọ riẹ.

⁵ Jọ Oriruo Evaọ Uruemu: Ewhowho emamọ usi na evaọ iyẹrẹ nọ e rọ zighizighi gbe evaọ eria ogbotu o gwọlọ nọ ma re wo ororokẹ, ma re ru edo hayo sikẹ vievie he, yọ ma re di edhere ahwo nọ a be nyavrẹ hẹ. Okenọ ma tẹ rọ evaọ iwou ahwo nọ i wo isiuru, u fo nọ ma rẹ yọrọ emamọ oma-ọghọ gbe uruemu je ru omobọ mai wọhọ erara aruoriwo, dhesẹ ovuhumuo kẹ uruemu odede-rehọ rai. Emọ kpobi nọ i lele omai a re dhesẹ adhẹẹ kẹ ọnọ o wo uwou na gbe eware riẹ hrọ yọ a rẹ romakpotọ jẹ gaviezọ okenọ ma tẹ be t’ẹme. Otẹrọnọ emọ a re yoẹme he, onana o rẹ wha odẹ uyoma ze.—Itẹ 29:15.

⁶ Ẹgọ mai u re ru ei vevẹ kẹ amọfa nnọ mai yọ egbodibo Ẹme Ọghẹnẹ. Evaọ ẹgọ gbe osẹ mai, ma rẹ jọ gbegbe whọhọwhọhọ họ hayo nwranwranwra jẹ gẹgọ thomawa ha. Ẹgọ mai u re te kẹ usiuwoma na ẹsikpobi. (Wawo Ahwo Filipai 1:27.) Nọ ma tẹ be roma t’otọ muẹrohọ ẹgọ gbe ekwakwa mai, ma ti ru amọfa zoruẹ hayo fuọ odibọgba mai hi. (2 Kọr. 6:3, 4) Oriruo ẹme-unu gbe uruemu mai u re fi awere họ aghare ovuẹ Uvie na, o vẹ jẹ wha adhẹẹ se Jihova.—1 Pita 2:12.