Uruemu Ezi—Okwakwa Ahwo Ọghẹnẹ

¹ Uruemu ezi o kare otọ nẹnẹ. Fikieme o jẹ rọ ere? Ahwo a be variẹ oma gaga te epanọ a rẹ rọ rehọ ọthobọ gheghe roro kpahe uruemu ezi, eme wọhọ “Ivie,” “Do,” hayo “Rọvrẹ omẹ.” Ẹme Ọghẹnẹ ọ ruẹaro kpahe uruemu nọ u ti dhe eyeyoma evaọ edẹ urere na evaọ okenọ o ta nọ ahwo ‘a re ti you oma-obọrai, a ve ti heri-oheri avọ oma-ovia, a rẹ te jọ ababọ uyere-ọghọ, a re ti wo eva egaga, a re wo oma-onyẹ hẹ, a re mukpahe ahwo ezi, avọ uzou-uveghe.’ (2 Tim. 3:1-4) Ekwakwa itieye na kpobi e rẹ wha iruemu ethọthọ ze. Wọhọ ahwo Ọghẹnẹ, Ileleikristi e rẹ yọroma re a se uruemu akpọ ọnana orọ orivo kẹ amọfa ba ewo.

² Eme Họ Uruemu? A rẹ sai dhesẹ uruemu ezi wọhọ emamọ ovuhumuo kẹ iroro amọfa, ẹgba nọ a sae rọ rria kugbe amọfa evaọ udhedhẹ. Abọjọ uruemu ezi họ ororokẹ, adhẹẹ kẹ amọfa, ẹwo, ewolẹ, areghẹ, gbe ẹromuhotọ. Ekwakwa enana i re no uyoyou nọ ohwo o wo kẹ Ọghẹnẹ gbe ọrivẹ ze. (Luk 10:27) I re mi omai uvumọ oware he, rekọ e rọ ghaghae evaọ eru woma usu mai kugbe amọfa.

³ Jesu Kristi o fi oriruo ọgbagba h’otọ. O koko Uzi Oro na ẹsikpobi: “Epanọ whọ guọlọ nọ ahwo a ru kẹ owhẹ, ru ere kẹ ai re.” (Luk 6:31) Kọ uruemu ororokẹ gbe orọ uyoyou Jesu evaọ eyerikugbe ilele riẹ u gbe gb’omai unu? (Mat. 11:28-30) Uruemu ezi riẹ u no izi nọ a kere fihọ ebe uruemu ze he. I no udu oruọzewọ gbe orọ ọghọruo ze. Ma rẹ daoma raro kele emamọ oriruo riẹ.

⁴ Okevẹ Ileleikristi i re ro dhesẹ uruemu ezi? Kọ evaọ etoke obọdẹ jọ ọvo, okenọ a gwọlọ dhesẹ nọ ae yọ emamọ ahwo? Kọ okenọ a tẹ gwọlọ dẹ ahwo jọ rehọ ọvo a re ro dhesẹ iẹe? Ijo! U fo re ma dhesẹ uruemu ezi evaọ oke kpobi. Maero evaọ idhere vẹ ma sai ro dhesẹ onana evaọ usu mai kugbe ohwohwo evaọ ukoko na?

⁵ Eva Ọgwa Uvie Na: Ọgwa Uvie na yọ oria egagọ mai. Jihova Ọghẹnẹ o zizie omai kpohọ etẹe. Fikiere, mai yọ erara. (Ol. 15:1) Kọ ma be jọ erara oriruo evaọ okenọ ma tẹ nyaze Ọgwa Uvie na? Kọ ma re muẹrohọ ẹgọ gbe osẹ mai ziezi? Evaọ uzẹme, ma rẹ whaha ẹgọ ojẹjẹvu hayo onọ o vrẹta. Makọ ikokohọ hayo iwuhrẹ ukoko erọ k’oka k’oka nọ a be nya, a re muẹrohọ ahwo Jihova fiki emamọ ẹgọ rai nọ o fo kẹ enọ e be kẹ imuẹro nọ a be gọ Ọghẹnẹ. (1 Tim. 2:9, 10) Ere ma re ro dhesẹ ororokẹ gbe adhẹẹ nọ o fo kẹ Ọnọ O Zizie omai nọ ọ rọ obọ odhiwu na gbe erara efa nọ a zizie.

⁶ Edhere ọfa nọ ma re ro dhesẹ uruemu ezi evaọ iwuhrẹ họ etẹe nọ ma re te evaọ ẹruoke. Uzẹme, onana o lọhọ ẹsikpobi hi. O sae jọ nọ ejọ e be rria ugbothabọ hayo a wo iviuwou ilogbo nọ a rẹ ruẹrẹ oma kpahe. Rekọ, ma muẹrohọ no nọ evaọ ikoko jọ, ahwo nọ a bu te 25 evaọ udhusoi a ru rie fihọ uruemu no re a nyaze nọ a tẹ so ole jẹ lẹ olẹ emuhọ no. Onana yọ okpẹme. U woma re ma kareghẹhọ nọ uruemu u w’obọ kugbe ewo ovuhumuo kẹ iroro amọfa. Jihova, Ọnọ O Zizie omai na, ọ ruẹrẹ ehaa abọ-ẹzi enana họ kẹ erere mai. Ma re dhesẹ ovuhumuo gbe ororokẹ mai rọkẹ iroro riẹ ẹkwoma etẹe nọ ma rẹ kaki te. Fibae, iwuhrẹ nọ ma rẹ kaki te he o rẹ whaha ezọgaviẹ amọfa je dhesẹ orivo kẹ ahwo nọ i te etẹe no.

⁷ Okenọ ma te kokohọ, kọ ma bi muẹrohọ ahwo ọkpokpọ nọ a rọ etẹe? Edederehọ rai yọ abọjọ uruemu ezi mai. (Mat. 5:47; Rom 15:7) Uyere oruọruọ, obosuọ osasa, unu ohwohwẹ—aikpobi yọ eware ekakao, rekọ i re fiba eware nọ i re dhesẹ omai wọhọ Ileleikristi uzẹme. (Jọn 13:35) Nọ ọ nya ze Ọgwa Uvie evaọ oke ọsosuọ, ọzae jọ ọ ta nọ: “Evaọ ẹdọvo mẹ ruẹ ahwo, erara, nọ e ghinẹ rrọ yoyou bu vi enọ mẹ ruẹ no evaọ ichọche nọ a jẹ yọrọ omẹ. O jọ vevẹ nọ mẹ ruẹ uzẹme na no.” Fikiere, o te nwene edhere uzuazọ riẹ, emerae ihrẹ nọ i lele i rie ọ tẹ họ-ame. Ẹhẹ, uruemu ezi o rẹ sai wo okpomahọ ologbo!

⁸ Ma te dhesẹ uruemu ezi kẹ erara nọ ma nyaku, kọ ma gbe ru ere “mae ro kọ rọ kẹ otu nọ ọrọ ẹgba orọwọ na”? (Gal. 6:10) Ehri-uzi onana u kiehọ: “Wha vẹ rehọ adhẹ kẹ ọkpọkuọzae [hayo ọkpọkuaye].” (Izerẹ 19:32) Ma re rri ahwo itieye na vo vievie he evaọ omakugbe mai.

⁹ Ezọgaviẹ Ziezi: Evaọ iwuhrẹ ukoko, egbodibo Ileleikristi erọ Ọghẹnẹ a be t’ẹme re a k’omai okẹ abọ-ẹzi re o bọ omai ga. (Rom 1:11) U re ghine dhesẹ ekpehre uruemu otẹrọnọ ma rẹ wezẹ, sa athethe, s’ẹme fihọ ohwo nọ ọ keria kẹle omai ozọ ẹsibuobu, mu nya kpohọ oria ame-okuo, se ebe nọ i kie kpahe ewuhrẹ na ha, hayo ru eware efa evaọ etoke ewuhrẹ na. Ekpako ukoko e rẹ jọ iriruo evaọ abọ ọnana. Uruemu ezi Ileleikristi o rẹ wọ omai dhesẹ emamọ adhẹẹ rọkẹ oruẹme na gbe ovuẹ Ebaibol nọ ọ be kẹ na ẹkwoma ezọ nọ ma rẹ gaviẹ kẹe.

¹⁰ Fibae, fiki ororokẹ rọkẹ oruẹme na gbe ogbotu na, ma rẹ rehọ ifonu nọ i wo ufi hi ro ru edo jẹ whaha ezọgaviẹ evaọ iwuhrẹ mai hi.

¹¹ Uruemu gbe Emọ: Esẹ gbe ini i re muẹrohọ uruemu emọ rai ẹsikpobi. Otẹrọnọ ọmọ jọ o muhọ ẹviẹ hayo o bi kpokpo evaọ etoke iwuhrẹ yọ onana o be whaha amọfa ezọgaviẹ, u re woma re a wọ ọmọ na no ọgwa na ababọ oke oraha re a ru ei fibo. Onana o sae jọ bẹbẹ ẹsejọ, rekọ kareghẹhọ, onana u re dhesẹ nọ who wo amọfa họ iroro. Eyewọ nọ i wo emọ eboba nọ e rẹ sai kpokpo a rẹ gwọlọ keria obemu ọgwa na ẹsikpobi re a se ahwo buobu ba ekpokpo evaọ okenọ u te fo nọ a rẹ kparoma no ẹkeria rai evaọ etoke ewuhrẹ na. Dede na, ahwo nọ a kiọkọ na a sai dhesẹ ororokẹ nọ o fo ẹkwoma egbara obemu na nọ a rẹ seba kẹ ae, otẹrọnọ a gwọlọ e riẹ ere.

¹² Esẹ gbe ini i re je muẹrohọ uruemu emọ rai taure iwuhrẹ i te ti muhọ gbe okenọ e tẹ fa no. U fo re emọ i mu dhẹ evaọ ọgwa na ha, keme onana o sae wha omonwa idudhe ze. Ẹdhẹ wariẹ otafe Ọgwa Uvie na o sae jẹ wha omonwa ze re, maero evaọ owọwọ nọ a rẹ ruẹ ude tere he na. Edo nọ a rẹ jọ otafe ru o sai kpokpo erivẹ na, jẹ wha ekpere odẹ se egagọ mai. Ma yere eyewọ nọ e rẹ daoma gaga re a rẹrote emọ rai evaọ obeva gbe otafe Ọgwa Uvie na keme onana u re fiba awere ẹria-kugbe mai evaọ okugbe.—Ol. 133:1.

¹³ Eva Uwuhrẹ Obe Ukoko Na: Ma wo ovuhumuo kẹ ọghoruo inievo mai nọ i siobọno iwou rai rọkẹ iwuhrẹ ukoko. Okenọ ma te kpohọ etẹe, u fo re ma dhesẹ adhẹẹ gbe ororokẹ rọkẹ ekwakwa rai. Taure ma tẹ te rueva uwou na, u fo re ma ririe eviẹ mai ziezi re ma siọ otuwou na hayo ekapẹte na ba egbe. Eyewọ e rẹ kpọ emọ rai, jẹ ruẹ nọ a keria oria uwou na nọ a ruẹrẹhọ kẹ uwuhrẹ na. Dede nọ utu ahwo na o rẹ sae jọ kakao yọ ma riẹ ahwo na kpobi na, ma re ru epanọ u j’omai evaọ iwou amọfa ha. Ọsẹ hayo oni o re lele ọmaha evaọ okenọ ọ tẹ gwọlọ nya kpohọ oria ame-okuo. Ofariẹ, nọ uwuhrẹ obe na o rrọ ewuhrẹ ukoko re na, ma rẹ g’ẹgọ wọhọ epanọ ma re ru evaọ okenọ ma te bi kpohọ Ọgwa Uvie na.

¹⁴ Uruemu Ezi O r’Oja: Edhesẹ uruemu Oleleikristi orọnikọ odibọgba mai ọvo u re kpomahọ họ rekọ u re je ru usu kugbe amọfa woma viere. (2 Kọr. 6:3, 4, 6) Wọhọ egegagọ Ọghẹnẹ evawere na, o rẹ jọ lọlọhọ k’omai re ma wo ovao ohwohwẹ, wo unevaze nọ ma re ro ru makọ eware ẹwo esese nọ e rẹ wha oghọghọ se amọfa. Iruemu ezi enana i re fi erru họ izuazọ mai wọhọ ahwo Ọghẹnẹ.