Esẹ gbe Ini—Wha Fi Oriruo Owoma h’Otọ kẹ Emọ Rai
1 Ẹme Ọghẹnẹ ọ ta kẹ omai nnọ “ọsẹ [gbe oni] ọnọ okiẹrẹe ọ rẹ ghọghọ gaga.” (Itẹ 23:24, 25) Ẹvẹ oghale na o rro te kẹ esẹ gbe ini nọ i fi emamọ oriruo h’otọ kẹ emọ rai! Omọvo ọ Ogbẹgwae Uwou-Ogha jọ ọ ta kpahe ọsẹ gbe oni riẹ nọ: “Uzẹme na o wariẹ uzuazọ rai kpobi họ, yọ mẹ gwọlọ nọ o wariẹ uzuazọ mẹ kpobi họ re.” Kọ eme u fo nọ emọ e rẹ ruẹ evaọ oma esẹ gbe ini rai?
2 Uruemu Ezi gbe Adhẹẹ Odidi: O rrọ owha-iruo esẹ gbe ini re a wuhrẹ emọ rai ekwakwa ezi. A re wuhrẹ uruemu ezi, orọnikọ ẹkwoma ithubro ẹme unu gheghe he, rekọ ẹkwoma ẹromuhọ gbe aruorokele. Fikiere, kọ didi uruemu who bi dhesẹ? Kọ emọ ra i re yo no unu ra ze nnọ “rọvrẹ omẹ,” “ivie,” gbe “do”? Evaọ uviuwou na, wha bi yeri kugbe ohwohwo avọ adhẹẹ odidi? Kọ whọ rẹ kezọ evaọ okenọ amọfa a be t’ẹme? Kọ whọ rẹ kezọ evaọ okenọ emọ ra e be t’ẹme k’owhẹ? Kọ wha bi dhesẹ ekwakwa ezi enana te eva Ọgwa Uvie na gbe evaọ oria idhere uwou na?
3 Abọ-Ẹzi Ọgaga gbe Iruẹru Ọwhọ: Oniọvo-ọmọzae jọ nọ ọ raha vrẹ ikpe 50 no evaọ odibọgba oke-kpobi na ọ kareghẹhọ nọ: “Ọsẹ gbe oni mẹ a jọ obọdẹ oriruo evaọ ovuhumuo rai kẹ iwuhrẹ gbe ọwhọ rai kẹ odibọgba na.” Kọ ẹvẹ who re ro dhesẹ kẹ emọ ra nọ ẹruọsa abọ-ẹzi uviuwou ra o r’owhẹ oja? Kọ wha re se ikere okpẹdẹ na kugbe? Kọ wha wo uwuhrẹ uviuwou ikẹse kẹse? Kọ emọ ra e rẹ ruẹ owhẹ nọ who bi se Ebaibol na gbe ebe Society na? Kọ eme a re yo evaọ okenọ whọ be lẹ kẹ uviuwou na? Who re w’obọ evaọ ẹmeọta abọ-ẹzi nọ ọ rẹ kẹ ọbọga kugbe emọ ra, be ta eware abọ-owoma ọ uzẹme gbe ukoko na? Kọ o rrọ owhẹ oja re who kpohọ iwuhrẹ na kpobi je w’obọ evaọ iruẹru usiuwoma ota na wọhọ uviuwou?
4 Esẹ gbe ini, wha roro kpahe oriruo nọ wha bi fih’otọ kẹ emọ rai na. Ru ei re o jọ emamọ, a ve ti rri rie ghaghae evaọ edẹ uzuazọ rai kpobi. Aye ọsẹro ọnyawariẹ jọ, nọ o te ikpe ọ 70 riẹ no, ọ ta nọ: “Me gbe bi wo erere no oriruo owoma ọsẹ gbe oni Ileleikristi iyoyou mẹ ze. Yọ mẹ be lẹ gaga re me dhesẹ ovuhumuo ọvọvọ mẹ kẹ ukuoriọ oghaghae onana ẹkwoma iruo nọ mẹ rẹ rehọ iẹ ru ziezi evaọ etoke ige kpobi nọ e be tha na.”