Rọ Ẹro So Jihova re O Ru Eware Rro
1 “Wọhọ orọ ọsosuọ me wo uvi oghọghọ ọrọ abọ o wo evaọ eromuo ukoko okpokpọ. Onana o rehọ vrẹ ikpe ivẹ erọ iruo egaga, elẹ ikẹse kẹse gbe ẹrorọsuọ Jihova ọnọ ‘o re ru eware rro.’ ” Ere ọkobaro oruọzewọ jọ o kere, ọnọ o wuhrẹ kpahe ẹgwọlọ ẹrorọsuọ Jihova, ọnọ ọ rẹ kẹ ẹvi. (1 Kọr. 3:5-9) Evaọ egwọlagwọlọ mai ọrọ ahwo nọ a wo isiuru eware ẹzi, ma te je wo ẹgwọlọ uketha Ọghẹnẹ otẹrọnọ odibọgba mai ọ rẹ mọ ibi.—Itẹ 3:5, 6.
2 Orro O Gwọlọ Ẹruorote: O gwọlọ nọ a rẹ rọ ẹro te ubi uzẹme na otẹrọnọ o rẹ dhẹ via. Ozihebro evaọ ẹdẹ ọvo hayo ivẹ nọ iweze ọsosuọ na o tẹ vrẹ no o rẹ wha emamọ iyẹrẹ ze. Jọ sasasa avọ oma ọ ogbẹnyusu. Ru re udu u te ohwo na otọ. Wh’ọvo whọ t’ẹme na kpobi hi. Kẹe uvẹ re ọ riẹ owhẹ, je dhesẹ via nọ who wo isiuru kpahe iẹe dẹẹ.
3 Evaọ July je rite August, ma be tẹro vi efihọ-ada oghoghẹrẹ ibroshọ rọkẹ ahwo nọ ma nyaku. Dede na, o gwọlọ re nọ ma rẹ nya lele isiuru nọ ma duku gbe ebe nọ ma fihọ ada na. Ma re ru onana ẹkwoma izihebro nọ ma re ru jẹ kẹ ae iwuhrẹ Ebaibol. (Mat. 28:19, 20) Rọkẹ ẹjiroro ọnana, a sae rehọ ibroshọ Ọghẹnẹ Ọ Gwọlọ na ro muọ obe uwuhrẹ họ. Iroro enana e sai fiobọhọ k’owhẹ.
4 Otẹrọnọ whọ ta usiuwoma kẹ ohwo nọ o wo ọdawẹ kpahe obonọ akpọ na ọ be gale ova rri, whọ sai mu ẹme na họ whọ vẹ ta nọ:
◼ “Mẹ riẹ nọ who wo ọdawẹ epanọ me wo re na kpahe ẹkpra-fihotọ uruemu evaọ akpọ na. Ma bi yo ekpehre iyẹrẹ ọ ozighi uviuwou, nọ o be wha ẹlahiẹ emọ, eyewọ, gbe imava orọo ze. Yọ o wọhọ nọ ahwo buobu a bi roro nọ erueta hayo uji-utho nọ a re ro wo ẹgwọlọ rai t’obọ o thọ họ. Kọ who roro nọ oghẹrẹ nọ ahwo a bi yere uzuazọ rai ufiẹme rọ kẹ Ọghẹnẹ? [Kuvẹ kẹ uyo.] Ọghẹnẹ o fi ute jọ họ nọ ohwo-akpọ o re lele, yọ e ghinẹ rọ gbẹgbẹdẹ kẹ omai hi.” Se 1 Jọn 5:3. Whọ vẹ kẹe ibroshọ Ọghẹnẹ Ọ Gwọlọ na, je roviei kpohọ uwuhrẹ avọ 10. Se edhe-ẹme ọsosuọ na. Riobọhọ eme gbe uhie-eme nọ a kere jẹlẹ evaọ emuhọ edhe-ẹme avọ 2-6 na, jẹ nọ ohwo na kpahe uruemu nọ o roro nọ o mae rọ enwoma kẹ ahwo-akpọ. Se edhe-ẹme nọ o kiekpahe iẹe je rri ikereakere ọvo hayo ivẹ jọ wọhọ epanọ oke o kuvẹ te. Se edhe-ẹme avọ 7 ro ku ẹme na họ, who ve ru ọruẹrẹfihọ nọ who re ro zihe nyae t’ẹme na haro.
5 Rọ kẹ ahwo nọ whọ nyaku nọ i wo ọdawẹ kẹ iviuwou, whọ sae t’ẹme otiọna:
◼ “Kọ who roro nọ o rọ oware areghẹ re a rẹro nọ Ọnọma na ọ rẹ kẹ omai ekwakwa nọ ma gwọlọ kẹ ebabọ uzuazọ uviuwou nọ u re fikparobọ?” Kuvẹ kẹ uyo. Dhesẹ ibroshọ Ọghẹnẹ Ọ Gwọlọ na kẹe, rovie kpohọ uwuhrẹ avọ 8, je dhesẹ vevẹ inọ ehri-izi nọ i no Ebaibol na ze rọkẹ omomọvo uviuwou na e rọ eva riẹ. Ru oriruo oghẹrẹ nọ a rẹ sai ro se ibroshọ na kugbe Ebaibol na re a wo erere nọ ọ maero noi ze. Nya lele ehrẹ nọ e rọ ẹwẹ-obe avọ 2 ọrọ ibroshọ na. Ru ọruẹrẹfihotọ nọ who re ro zihe re who gbe ru uwuhrẹ na haro, hayo otẹrọnọ u re no, wha ve wuhrẹ uwuhrẹ ofa nọ o were ohwo na evaọ ibroshọ na.
6 Edhere ovavo jọ ona, nọ whọ sae rọ kẹ ahwo ọruẹrẹfihotọ uwuhrẹ Ebaibol mai. Dhesẹ ibroshọ “Ọghẹnẹ Ọ Gwọlọ” na, whọ vẹ ta nọ:
◼ “Obọdẹ oma uwuhrẹ okpakpatiẹ o rọ evaọ ibroshọ ọnana nọ o t’ẹme kpahe iwuhrẹ Ebaibol nọ i w’uzou. Evaọ ẹwẹ-obe kpobi, whọ te ruẹ iyo kẹ enọ nọ i bi kpokpo ahwo anwọ ikpe udhusoi buobu nọ e vrẹ no. Wọhọ oriruo, Eme họ ẹjiroro Ọghẹnẹ kpahe otọakpọ na?” Rovie kpohọ uwuhrẹ avọ 5, je se enọ nọ e rọ emuhọ uwuhrẹ na. Nọ ọnọ o w’uwou na onọ o mai si ei urru, kẹsena who ve se edhe-ẹme hayo edhe-eme nọ i kie kpahiẹe, yọ who bi se ikereakere nọ i fo. Ru ei vẹ nọ a rẹ sae ruẹ iyo nọ e rẹ v’eva rọkẹ enọ nọ i kiọkọ na lọlọhọ evaọ edhere otiọna. J’iroro inọ who ti zihe ze okiofa re wha t’ẹme kpahe onọ gbe uyo ofa.
7 Hayo o sae were owhẹ re whọ dao edhere ọlọlọhọ nọ a re ro muọ uwuhrẹ Ebaibol họ whọ vẹ ta nọ:
◼ “Kọ whọ riẹ inọ evaọ iminiti jọ kakao ọvo, whọ sae ruẹ uyo kẹ onọ Ebaibol jọ nọ u w’uzou? Wọhọ oriruo, . . .” Whọ vẹ nọ onọ jọ nọ o rọ evaọ emuhọ uwuhrẹ jọ evaọ ibroshọ na, onọ who roro nọ o rẹ sai si ohwo na urru. Rọ kpahe enọ jọ nọ whọ rẹ sae nọ, rri edhe-ẹme avọ 15 gbe 16 evaọ uko obeva ọ Odibọgba Uvie Mai ọrọ March 1997, nọ u wo uzoẹme ọ: “Wo Udu Re Who Ru Izihebro.”
8 Ọjẹrehọ evawere ọrọ use-abọ nọ a re ro ru izihebro je ru iwuhrẹ Ebaibol yọ abọ ologbo ọrọ ‘ibe iruiruo Ọghẹnẹ’ nọ ma rọ na. (1 Kọr. 3:9) Nọ ma bi ruiruo gaga re ma r’ẹro te isiuru nọ ma duku ma vẹ jẹ r’ẹro so Jihova re o ru eware rro na, ma rẹ te ruẹ uvi evevọwẹ nọ iruo efa e rẹ sae wha ze he.