Rọ Aro Kele Ẹdhoguo-Okiẹrẹe Jihova
1 “ỌNOWO o you oziẹokiẹrẹe.” (Ol. 37:28) Fikiere, dede nọ ọ jiroro nọ ọ te raha akpọ nana nọ o kiẹrẹe he na, o ru ọruẹrẹfihotọ re a kẹ unuovẹvẹ tao. (Mak 13:10) Onana o kẹ ahwo uvẹ nọ a re ro kurẹriẹ re a ruẹse zọ. (2 Pita 3:9) Kọ ma be daoma re ma rọ aro kele ẹdhoguo-okiẹrẹe Jihova? Kọ edada gbe uye-oruẹ uviuwou ahwo-akpọ o be wọ omai dhesẹ ẹruore Uvie na kẹ amọfa? (Itẹ 3:27) Ẹdhoguo-okiẹrẹe nọ ma re you o te wọ omai re ma wo obọ ziezi evaọ usiuwoma ota na.
2 Ta Usiuwoma Ababọ Ọriẹwẹ: Ẹkwoma ẹjiroro Ọghẹnẹ nọ ma rẹ rọ ababọ-ọriẹwẹ whowho kẹ ahwo kpobi, yọ ma bi “ru onọ u kiẹrẹe.” (Mae. 6:8) Ma rẹ whaha iroro ahwo-akpọ sebaẹgba nọ ma rẹ rọ gwọlọ gu amọfa ẹdhọ fiki eriwo ugboma rai gheghe. (Jem. 2:1-4, 9) Oreva Jihova họ ‘re ahwo kpobi a wo usiwo, re a ze te riẹ eriariẹ egbagba uzẹme na.’ (1 Tim. 2:4) Ẹme uzẹme Ọghẹnẹ ọ rẹ sai ru inwene ilogbo evaọ uzuazọ ahwo. (Hib. 4:12) Uzẹme nana nọ ma re vuhumu o rẹ sae wọ omai nọ ma jẹ nyabru ahwo ududu, makọ ahwo nọ a be hae kezọ vẹre he.
3 Ozọ o jẹ dina mu oniọvo-ọmọtẹ jọ nọ ọ jọ uwou-eki je ru iruo fiki oghẹrẹ nọ eriwo ugboma ọhreki riẹ jọ o jọ. Dede na, nọ uvẹ u rovie fihọ kẹ oniọvo-ọmọtẹ na, ọ daoma ta usiuwoma kẹe kpahe Aparadase nọ Ọghẹnẹ ọ ya eyaa riẹ. Ọ kuyo kpimẹ kpimẹ inọ ọ rẹ rọwo iku atanọ họ, jegbe nnọ ọye omariẹ yọ ọmọ ogbọfariẹ gbe ọgba imu egaga elọ. Rekọ oniọvo-ọmọtẹ na o rolo obọ họ. Ẹdẹjọ ọzae na ọ tẹ nọ oniọvo-ọmọtẹ na oware nọ o roro kpahe eto ithethei nọ ọyomariẹ ọzae na o wo na, fikiere oniọvo-ọmọtẹ na ọ tẹ roma totọ dhesẹ oware nọ Ebaibol e ta kpahe ẹme na kẹe. (1 Kọr. 11:14) Evaọ okeokiọ riẹ, ọzae na o te bru eto ithethei nọ o wo na kpẹkpẹe jẹ nware eto-agba riẹ tẹtẹtẹ, onana o jọ oware igbunu kẹ oniọvo-ọmọtẹ na! Ọzae na ọ tẹ yare obe-uwuhrẹ Ebaibol, oniọvo-ọmọtẹ na o te ru ọruẹrẹfihotọ re oniọvo-ọmọzae jọ o ru uwuhrẹ na, o were oniọvo-ọmọzae na gaga re o ru uwuhrẹ na, yọ ọzae na ọ nyaharo te epanọ ọ rọ rehọ oma riẹ mu dhe jẹ họ-ame. Wọhọ ọzae nana, eva e be were ahwo buobu nọ a be gọ Jihova nẹnẹ na rọkẹ omodawọ ababọ-ọriẹwẹ orọ ahwo nọ a rehọ ovuẹ Uvie na te ai oma.
4 Kẹle na, Jihova o ti si ababọ-ẹrẹreokie no otọakpọ na kpobi no. (2 Pita 3:10, 13) Evaọ umutho oke nọ u kiọkọ na, joma rọ aro kele ẹdhoguo-okiẹrẹe Jihova ẹkwoma uvẹ na nọ ma rẹ rọ kẹ ahwo kpobi re a dhẹ vabọ no ọraha nọ o bi ti te akpọ Setan nọ o kiẹrẹe he na.—1 Jọn 2:17.