Epanọ A rẹ rọ Rehọ Obe ọ “Uyoyou Ọghẹnẹ” na Ru Obe-Uwuhrẹ Ebaibol
1. Ẹjiroro vẹ a ro kere obe ọ “Uyoyou Ọghẹnẹ” na?
1 Eva e were omai gaga nọ obe okpokpọ na “Daji Uyoyou Ọghẹnẹ” u te omai obọ evaọ Okokohọ Ubrotọ “Jọ Ẹzi Ọghẹnẹ Ọ Kpọ Owhẹ” na! Wọhọ epanọ a whowho kẹ omai, orọnikọ a kere obe okpokpọ nana re ma ro wuhrẹ ahwo igogo iwuhrẹ Ebaibol ho, rekọ re u fi obọ họ kẹ omai riẹ je you itee Jihova kpahe ẹfuọ uruemu. Ma ti fi obe nana họ ada evaọ usiuwoma ota ha.
2. Oghẹrẹ vẹ ma te rehọ obe nana ruiruo, kọ ro kugbe amono?
2 Obe nana o te jọ obe avivẹ nọ a ti wuhrẹ kugbe ọmọ-uwuhrẹ Ebaibol nọ o te wuhrẹ obe ọ Ebaibol Wuhrẹ na re no. Woi họ iroro inọ orọnikọ oghẹrẹ ovo na ahwo kpobi a re wo ẹnyaharo abọ-ẹzi vẹrẹ te he. Who re wuhrẹ ọmọ-uwuhrẹ lele oghẹrẹ nọ ẹgba-otoriẹ riẹ o mu. Who re muẹrohọ inọ o bi wo otoriẹ oware nọ who bi wuhrẹ iẹe na. Rọkẹ ahwo nọ a wuhrẹ ebe buobu kugbe no evaọ okenọ u kpemu, nọ a be ziọ ewuhrẹ hẹ, yọ a bi nwene edhere uzuazọ rai lele oware nọ a wuhrẹ i rai no Ebaibol na ze he, a rẹ rọ obe nana to obe-uwuhrẹ Ebaibol họ kugbe ai vievie he.
3. Eme ma re ru otẹrọnọ ma be rehọ obe ọ Gọ Ọghẹnẹ na wuhrẹ ohwo jọ enẹna?
3 Otẹrọnọ whọ be rehọ obe ọ Gọ Ọghẹnẹ na wuhrẹ ohwo jọ yọ wha kẹle obọ ekuhọ riẹ no, whọ sae nwani wuhrẹ iẹe kugbei reno, whọ vẹ ta kẹ ọmọ-uwuhrẹ na re o se obe Uyoyou Ọghẹnẹ na kẹ omobọ riẹ. Hayo, o rẹ mai woma re wha nwene kpohọ obe okpokpọ na, wha ve muhọ no emuhọ riẹ ze. Wọhọ epanọ ma be rehọ obe ọ Ebaibol Wuhrẹ na ruiruo na, ere ọvona obe nana o te jọ, yọ oghẹrẹ nọ otoriẹ ọmọ-uwuhrẹ na o rrọ who re rri rọ jiroro sọ wha re wuhrẹ eme-ofiba na.
4. Eme ma re ru otẹrọnọ ọmọ-uwuhrẹ mai ọ họ-ame no yọ o ri wuhrẹ obe ọ Ebaibol Wuhrẹ na gbe obe ọ Uyoyou Ọghẹnẹ na re he?
4 Otẹrọnọ ọmọ-uwuhrẹ ọ họ-ame no yọ o ri wuhrẹ ebe ivẹ na re he, wha rẹ ruabọhọ uwuhrẹ na bẹsenọ o re wuhrẹ obe ọ Uyoyou Ọghẹnẹ na reno. Dede nọ ọmọ-uwuhrẹ na ọ họ-ame no, whọ rẹ gbẹ n’iyẹrẹ oke na, ozihebro na, gbe obe-uwuhrẹ na. Owhowho-uvie nọ wha gbẹ rrọ usu o re kele oke na re.
5. Oghẹrẹ vẹ a rẹ rọ rehọ obe ọ Uyoyou Ọghẹnẹ na fi obọ họ kẹ iwhowho-uvie nọ e siọ usiuwoma ba ẹta no evaọ etoke jọ?
5 Otẹrọnọ omọvo Ogbẹgwae Iruo Ukoko rai jọ ọ ta k’owhẹ nọ who wuhrẹ obe kugbe ohwo jọ nọ ọ se usiuwoma ota ba no, ẹsejọhọ a te fodẹ ugogo izou jọ nọ whọ rẹ jọ obe ọ Uyoyou Ọghẹnẹ na wuhrẹ kugbe ohwo na. U du gwọlọ nọ uwuhrẹ utioye o rẹ rehọ oke thethei hi. Obe okpokpọ nana nọ a kere re u fi obọ họ k’omai daji “uyoyou Ọghẹnẹ” na, u woma kẹhẹ!—Jud 21.