Ẹkpẹti Onọ

◼ Ẹvẹ uwuhrẹ Ebaibol nọ a bi ru kugbe ohwo no obe Eriariẹ na ze u re kri te?

Jihova ọ be ghale ukoko riẹ nẹnẹ. Ma be ruẹ imuẹro onana k’ukpe k’ukpe nọ idu ahwo kpokpọ buobu a bi dikihẹ kẹ uzẹme na. Obe Eriariẹ na yọ okwakwa nọ u re ruiruo evaọ erugba onana. Ukere ọ February 1, 1996, ọrọ Uwou-Eroro Na o riobọhọ nọ a ru ona họ obe onana re u fiobọhọ kẹ ọmọ-uwuhrẹ Ebaibol ru ẹnyaharo ẹzi vẹrẹ, otiẹsejọ re o te ame-ọhọ evaọ emera kakao.

Fiki onana, Uwou-Eroro ọvona, evaọ ẹwẹ-obe avọ 10, ọ k’ohrẹ nọ: “Nọ ohwo o te kuọ uwuhrẹ Ebaibol riẹ evaọ obe Eriariẹ na họ no gbe nọ ọ tẹ họ-ame no, u gbe du fo re a ru uwuhrẹ obe avivẹ kugbei hi.”

Kọ ẹvẹ kpahe ohwo nọ o wuhrẹ obe Eriariẹ na re no yọ ọ họ-ame he? Odibọgba Uvie Mai ọrọ June 1996, ẹwẹ-obe avọ 6, edhe-ẹme avọ 23, ọ kareghẹhọ omai ugogo-ẹme nọ a ta evaọ Uwou-Eroro Na kpahe obe ọfa nọ a re wuhrẹ kugbe ọmọ-uwuhrẹ ọvona ha ọnọ o wuhrẹ obe Eriariẹ na re no na. Kọ onana u dhesẹ nọ ma wo isiuru kpahe obọfihọ kẹ ọmọ-uwuhrẹ Ebaibol vrẹ etenẹ hẹ? Ijo. Ma gwọlọ nọ ahwo a wo uzedhe eriariẹ uzẹme na. Ghele, a rẹro nọ evaọ udevie umutho oke kpẹkpẹe, owuhrẹ nọ o wo ona uwuhrẹ ọ rẹ sae fiobọhọ kẹ ọmọ-uwuhrẹ evezi wo eriariẹ nọ i te nọ ọ rẹ rọ jiroro areghẹ re ọ gọ Jihova. O sae jọ nọ fiki eyero omobọ rai, emọ-iwuhrẹ Ebaibol jọ a rẹ sae gwọlọ nọ a re wuhrẹ vrẹ ẹsiẹvo ẹkpoka.

Evaọ uzẹme, emọ-uwuhrẹ jọ a re ru ẹnyaharo kpẹlẹ vi ejọ. Rekọ nọ a te wuhrẹ obe Eriariẹ na re no, nọ o rẹ sae rehọ oke bu vi epanọ o hae jọ na, yọ ohwo na ọ re jiroro nọ ọ gwọlọ nyusu kugbe ukoko na ha, u fo re owhowho-uvie na ọ t’ẹme na kugbe omọvo ekpako ọ Ogbẹgwae Iruo Ukoko na jọ. Otẹrọnọ iyero jọ nọ a rẹ sae whaha ha i w’obọ kpahiẹe, a rẹ sae gbẹ kẹ obufihọ ọfa. Onana o rọwo kugbe ehri-uzi nọ a ta fihọ edhe-ẹme avọ 11 gbe 12 evaọ ẹwẹ-obe avọ 10 evaọ Uwou-Eroro Na ọrọ February 1, 1996 na.

U fo re ovuhumuo ewuhrẹ igogo-eriariẹ uzẹme na i fi ọwhọ họ ọmọ-uwuhrẹ na re o kpohọ iwuhrẹ Ileleikristi. Onana o rẹ sae wọ ọmọ-uwuhrẹ na dhesẹ imuẹro isiuru riẹ re ọ gọ Jihova. Otẹrọnọ edhesẹ ovuhumuo ẹzi otiọye na o gbẹ rehọ oma via ha nọ a te wuhrẹ obe Eriariẹ na oke krẹkri no, o sae jọ oware areghẹ re a da uwuhrẹ na ji.