Ẹkpẹti Onọ
◼ Enẹna nọ ma wo obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na, ẹvẹ ma re ru uwuhrẹ Ebaibol kri te?
Odibọgba Uvie Mai ọrọ October 1993 (ọrọ Oyibo) o dhesẹ nọ a re gbe ru uwuhrẹ Ebaibol kugbe ohwo ọkpokpọ nọ o wo isiuru bẹsenọ a re wuhrẹ ebe ivẹ no. Enẹna nọ ma wo obe Eriariẹ na, o rọ ziezi re ma kpọ iroro mai vi evaọ onana, wọhọ epanọ a m’oma fihọ ẹwẹ-obe 6 gbe 7 ọrọ February 1, 1996, ekere Uwou-Eroro Na.
A ru ona họ obe Eriariẹ na re u fiobọhọ kẹ ahwo nọ ‘a wo eva ezi kpahe uzuazọ ebẹdẹ bẹdẹ’ re a wuhrẹ oware nọ u fo nọ a rẹ riẹ re a rọ oma kẹ Jihova jẹ họ-ame. (Iruẹru 13:48) Fikiere, nọ a te wuhrẹ obe okpokpọ onana re no, u du fo re a wuhrẹ obe avivẹ kugbe ọmọ-uwuhrẹ na ha. Nọ emọ-uwuhrẹ Ebaibol ra a bi dede uzẹme na rehọ na, whọ sae tudu họ ae awọ re a ru eriariẹ rai kodo ẹkwoma iwuhrẹ kpohọ kugbe Isẹri Jihova gbe ese Ebaibol gbe ebe sa-sa Ukoko na.
Otẹrọnọ whọ riẹ enọ nọ e rọ ẹwẹ-obe 175 rite 218 ọrọ obe ọ Organized to Accomplish Our Ministry na, onana u re fiobọhọ. Dede nọ whọ rẹ t’ẹme te enọ enana ha hayo kiẹe kugbe ọmọ-uwuhrẹ Ebaibol na ha, o rẹ jọ ziezi re who fiẹgba họ eria obe Eriariẹ na nọ u re fiobọhọ kẹ ọmọ-uwuhrẹ na re o dhesẹ emamọ otoriẹ izẹme ọsosuọ Ebaibol na okenọ ekpako na a te kiẹ ai kugbe ahwo nọ e be te họ-ame na.
U fo re a fi eme kugbe evuẹ nọ e rọ obe Eriariẹ na ha, re a rehọ eme efa hayo eme-avro jọ rọ tha iwuhrẹ Ebaibol na uke hayo re a rọ fere iwuhrẹ erue via ha. Onana u re ru uwuhrẹ na kri gheghe. Ukpoye, ma rẹro nọ a re wuhrẹ obe na re kpatakpata, ẹsejọhọ evaọ ole emera ezeza. Onana u te fiẹgba họ epanọ u wuzou te re ma kaki wuhrẹ eria uwuhrẹ na ziezi tao re ma tẹ sae dhesiẹe vevẹ kpẹkpẹe. A rẹ jẹ ta kẹ ọmọ-uwuhrẹ na re o wuhrẹ haro, riwi ikereakere nọ a fodẹ na, re ọ daoma wo otoriẹ uvevẹ kpahe oware nọ obe na u bi wuhrẹ evaọ uzou ovuovo.
Uwou-Eroro Na u fiẹgba họ ẹgwọlọ nọ Isẹri Jihova a re ro ru iwhurẹ Ebaibol buobu nọ i w’ẹgba evaọ umutho oke. (Rri Aizaya 60:22.) Re a rehọ obe ọ Eriariẹ na ruiruo ziezi evaọ edhere nọ u w’ẹgba o rẹ sae fiobọhọ kẹ ahwo ọkpokpọ re a wo eriariẹ nọ i re su kpohọ uzuazọ ebẹdẹ bẹdẹ a vẹ jẹ rehiẹe ruiruo.—Jọn 17:3.