Eriwo Othotha ọrọ Iruo Ekpakpata Ilele-Iruo Na

¹ Taure o te ti no otọakpọ na, Jesu o vi ilele riẹ re ‘a ru ilele ahwo erẹwho kpobi.’ Onana o gwọlọ nọ a re dhomahọ iruo egaga ọ usiuwoma ota gbe ewuhrẹ amọfa je ru iruo rai kẹre te otọakpọ na kpobi. (Mat. 28:19, 20; Iruẹru 1:8) Kọ a rri iruo nana wọhọ owha-ogbẹgbẹdẹ nọ a sae wọ họ? Jọn ukọ na o dhesẹ nọ o rrọ ere he. Nọ o ru iruo wọhọ oru ilele vrẹ ikpe 65 no, o kere nọ: “Uyoyou Ọghẹnẹ ona, nnọ ma re koko ijaje riẹ. Whaọ ijaje riẹ erọ owha ogbẹgbẹdẹ hẹ.”—1 Jọn 5:3.

² Okerefihotọ Ikereakere na kpahe iruẹru ọ Ileleikristi ọsosuọ na i dhesẹ nọ a ru iruo nọ a muhọ ae obọ re a ru ilele Jesu Kristi na kpata kpata. (2 Tim. 4:1, 2) A ru onana, orọnikọ wọhọ ẹkẹ-iruo ọvo ho, rekọ fiki isiuru iyoyou rai re a jiri Ọghẹnẹ jẹ wha ẹruore esiwo ro se amọfa. (Iruẹru 13:47-49) Fikinọ enọ i zihe ruọ ilele kpobi a jọ iru ilele no okioye vrẹ, ukoko Ileleikristi na o tẹ jẹ rro kpata kpata evaọ ikpe-udhusoi ọsosuọ na.—Iruẹru 5:14; 6:7; 16:5.

³ Iruo Ilele-Iruo na E Be Dhẹ Kpata Kpata: Iruo ilele-iruo nọ e mae rro kpobi e be romavia evaọ oke mai na! Rite obọnana, ima ahwo buobu a jẹ emamọ usi na rehọ jẹ j’owọ lele iei no. (Luk 8:15) Nọ oke o be dhẹ kpata kpata kẹ uyerakpọ onana na, ‘ọrigbo nọ o wo ẹrọwọ avọ areghẹ’ na ọ k’omai ekwakwa nọ i ru rie lọhọ kẹ ahwo udu oruọzewọ no re a wuhrẹ uzẹme na kpata kpata.—Mat. 24:45.

⁴ Evaọ 1995 ma wo obe na Eriariẹ Nọ I Re Su Kpohọ Uzuazọ Ebẹdẹ Bẹdẹ, yọ evaọ 1996 ibroshọ na Eme Ọghẹnẹ Ọ Gwọlọ Mi Omai? o te lele iei. Rọ kpahe obe Eriariẹ na, ukere Uwou-Eroro ọ February 1, 1996, ẹwẹ-obe avọ 7, o ta nọ: “Obe onana nọ ewẹre riẹ i bu te 192 na a rẹ sai wuhriẹe re evaọ umutho oke, yọ ahwo nọ ‘a ro mu kẹ uzuazọ ebẹdẹ bẹdẹ’ a rẹ sae wuhrẹ ziezi ẹkwoma ewuhrẹ obe na re a rehọ oma dheidhe kẹ Jihova jẹ họ-ame.”—Iruẹru 13:48.

⁵ Uko-obeva ọ Odibọgba Uvie Mai ọrọ June 1996 na, “Epanọ A rẹ Rehọ Obe Eriariẹ na ro Ru Ilele,” o k’omai ute nana: “Epanọ eyero gbe ẹvori ọmọ-uwuhrẹ na ọ rọ, izoẹme jọ e riẹ nọ a rẹ jọ ẹkeria ọvo wuhrẹ re [evaọ oware wọhọ] auwa ọvo, ababọ ẹdhẹ vẹrẹ vẹrẹ evaọ uwuhrẹ na. Ọmọ-uwuhrẹ o ti ru emamọ ẹnyaharo evaọ okenọ te owuhrẹ gbe ọmọ-uwuhrẹ a tẹ be nya lele oma-uwuhrẹ k’oka k’oka rai.” Uzoẹme na o tẹ jẹ ta nọ: “U fo re a rẹro nọ bọo okenọ ohwo o ti wuhrẹ obe Eriariẹ na re no, yọ ọriẹruo gbe ekodo isiuru riẹ kpahe ẹgọ Ọghẹnẹ e roma via no.” Ẹkpẹti Onọ nọ o rọ Odibọgba Uvie Mai ọrọ October 1996 na o dhesẹ i rie nọ: “A rẹro nọ evaọ udevie umutho oke kpẹkpẹe, owuhrẹ nọ o wo ona uwuhrẹ ọ rẹ sai fiobọhọ kẹ ọmọ-uwuhrẹ evezi wo eriariẹ nọ i te nọ ọ rẹ rọ jiroro areghẹ re ọ gọ Jihova.”

⁶ Obe Eriariẹ na O Kẹ Erere: Eva etoke ame-ọhọ riẹ, upelẹ aye jọ o gbiku epanọ o roro kpahe ewuhrẹ obe Eriariẹ na. Evaọ umutho oke jọ o je wuhrẹ obe Ria Bẹdẹ Bẹdẹ na. Okenọ a siobọno obe Eriariẹ na, oniọvo-ọmọtẹ nọ o je ru uwuhrẹ riẹ o te nwene kpohọ obe okpokpọ na. U kri hi, ọmọ-uwuhrẹ na ọ tẹ ruẹ nọ onana o te gwọlọ ẹjiroro jọ mi ei, o tẹ kẹe ọwhọ ru ẹnyaharo ọkpakpata no umuo okeoye vrẹ. Upelẹ aye na, nọ ọ rọ oniọvo mai enẹna, ọ ta nọ: “Obe ọ Ria Bẹdẹ Bẹdẹ na u fiobọhọ k’omẹ you Jihova, rekọ obe Eriariẹ na u fiobọhọ k’omẹ jiroro re mẹ gọe.”

⁷ Roro kpahe epanọ aye ọfa jọ o wuhrẹ uzẹme na kpata te. Nọ a ru uwuhrẹ avivẹ riẹ no, o te kpohọ ewuhrẹ evaọ Ọgwa Uvie na evaọ etoke iweze ọsẹro okogho na. Oka oyena, eva uwuhrẹ avesa riẹ, ọ tẹ ta kẹ ọsẹro okogho na nọ ọ roma mudhe kẹ Jihova no yọ ọ gwọlọ zihe ro owhowho-uvie nọ ọ te họ-ame he. Ekpako na i te lele iei t’ẹme, a tẹ jẹe rehọ wọhọ owhowho-uvie, yọ oka nọ u lele i rie o te muọ usiuwoma ota họ. O te ti duomahọ uwuhrẹ Ebaibol riẹ te epanọ o ro mi uvẹ evaọ oria iruo riẹ re ọ ruẹse wuhrẹ isiava hayo isiasa evaọ ẹkpoka jẹ raha oke viere evaọ odibọgba na. Ẹsejọ, a je wuhrẹ izoẹme ivẹ hayo esa evaọ ẹkeriotọ ọvo. O te muọ oware nọ o bi wuhrẹ họ efihiruo evaọ abọ kpobi uzuazọ riẹ, wuhrẹ obe Eriariẹ na reno evaọ eka ene, jẹ nyaharo te ame-ọhọ!

⁸ Ọzae oniọvo-ọmọtẹ jọ o dhesẹ omariẹ wọhọ nọ ọ jọ “uzedhọ ọrivẹ-orọo nọ ọ rọwo ho.” Ẹdẹjọ, oniọvo-ọmọzae jọ ọ tẹ fodẹ uwuhrẹ Ebaibol evaọ obe Eriariẹ na kẹe avọ uvẹ nọ ọ kẹ riẹ inọ ọ sae seba nọ a te ru uwuhrẹ ọsosuọ na no hayo eva okiofa kpobi. Ọzae na ọ tẹ rọwo nọ ọ te dawo iẹe, dede nọ ọ riobe ziezi evaọ etoke isukulu riẹ hẹ gbe nnọ o vrẹ ikpe 20 no nọ o ti ro wuhrẹ oghẹrẹ obe egagọ ovuovo ho. Ẹvẹ o jariẹ oma evaọ okenọ o ro wuhrẹ obe Eriariẹ na? Ọ ta nọ: “O jọ uvi omawere nọ mẹ ruẹ nọ a kere obe obufihọ Ebaibol nana lọlọhọ enẹ. A kẹ evuẹ na vevẹ avọ iroro-egbagba te epanọ u kri hi, mẹ tẹ jẹ hai rẹro uwuhrẹ n’otha mai avọ isiuru ilogbo. Owuhrẹ mẹ ọ nya lele edhere ilele-iruo nọ Society ọ m’omaa riẹ na avọ ona, yọ avọ obufihọ ẹzi Jihova, mẹ tẹ họ-ame evaọ emerae ene nọ i lele i rie. Mẹ sae ghinẹ ta nọ otẹrọnọ ma wo uyoyou kẹ ilele iruo, ruabọhọ ẹgwọlọ ahwo udu ezi, fi obe Eriariẹ na gbe ebe obufihọ Ebaibol efa nọ Society ọ kẹ họ iruo yọ, mai wuzou, lẹ kẹ ekpakpọ Jihova, ma sai ghine wo uvẹ-ọghọ obọdẹ orọ obufihọ evaọ eruo ilele.” Ọkpọ iriruo obehru na i bu hu. Ibuobu emọ-uwuhrẹ mai a rẹ nya ziọ uzẹme na kpata kpata ere he.

⁹ Emọ-Uwuhrẹ E rẹ Nyaharo Kpatakpata Oghẹrẹ Ovona Ha: A re vuhumu hrọ inọ ohẹriẹ ulogbo o rẹ sae jọ udevie ẹgba iwuhrẹ gbe emọ-uwuhrẹ Ẹme Ọghẹnẹ. Orro abọ-ẹzi o rẹ sae jọ ẹmẹrera hayo kpata kpata. Ẹnyaharo nọ emọ-uwuhrẹ jọ a re ru evaọ umutho emerae o sae rehọ efa oke krẹkri. Epanọ ohwo ọ riẹ obe te, epanọ o wo ovuhumuo kẹ eware abọ-ẹzi te, gbe epanọ omorọkẹ riẹ kẹ Jihova u kodo te i re kpomahọ orro abọ-ẹzi riẹ. Orọnikọ ahwo kpobi nọ ma re lele wuhrẹ a wo “oghọghọ” re a wuhrẹ Ikereakere na kẹdẹ kẹdẹ hẹ, wọhọ epanọ ahwo Bẹria oke anwae nọ e rọwo a ru.—Iruẹru 17:11, 12.

¹⁰ Oyena o soriẹ nọ uko-obeva Odibọgba Uvie Mai ọrọ April 1998, “Ma Gwọlọ—Iwuhrẹ Ebaibol Efa,” o jẹ kẹ uvi ọkpọvio nana: “Uzẹme, orọnikọ emọ-uwuhrẹ Ebaibol kpobi i re ru ẹnyaharo kpata kpata ha. Ejọ i wo isiuru abọ-ẹzi ga te amọfa ha yọ a re wo otoriẹ eware nọ a bi wuhrẹ ai oghẹrẹ ovona ha. Amọfa a be rria uzuazọ ababọ uvẹ fikiere a rẹ sae raha oke nọ o gwọlọ re a wuhrẹ uzoẹme ovo re evaọ oka kpobi hi. Fikiere, evaọ ẹsejọ o rẹ sai fo re a wuhrẹ izoẹme jọ vrẹ ẹkeriotọ ọvo jẹ rehọ emerae efa jọ re obe na u te ti re.”

¹¹ Iru Ilele A re Wo Eriwo Owowa: U fo re a ru ovẹrẹ ewuhrẹ na lele uyero gbe ẹgba-otoriẹ ọmọ-uwuhrẹ na. Nọ a be tuduhọ omai awọ re ma mu iwuhrẹ họ evaọ ibroshọ Gwọlọ na, o sae rehọ emerae ivẹ rite esa re a te wuhrẹ iẹe re taure a te ti mu obe Eriariẹ na họ. Ma te fi iroro-ejẹ nọ a kẹ evaọ uko-obeva Odibọgba Uvie Mai ọrọ June 1996 na kpobi họ iruo, o rẹ sae rehọ emerae ezeza rite izii efa re a wuhrẹ obe Eriariẹ na re. Ejọ nọ i mu uwuhrẹ họ obọ evaọ obe Eriariẹ na a nwene kpohọ ibroshọ Gwọlọ na re u fiobọhọ kẹ ọmọ-uwuhrẹ na wuhrẹ igogo izẹme Ebaibol na kpata viere. Kẹsena a vẹ wariẹ mu uwuhrẹ họ evaọ obe Eriariẹ na. Otẹrọnọ a mu uwuhrẹ họ evaọ obe Eriariẹ na yọ o be nyaharo ziezi, o rẹ sae kẹ erere re a wuhrẹ ibroshọ Gwọlọ na nọ a te wuhrẹ obe na reno, rọ ere wariẹ kiẹ igogo izẹme Ẹme Ọghẹnẹ na riwi kpẹkpẹe. Onọ a ru kpobi evaọ enana, ma gwọlọ gbabọkẹ ewo otoriẹ uvevẹ ọmọ-uwuhrẹ na ha fikinọ ma gwọlọ wuhrẹ obe na kpata kpata. Ọmọ-uwuhrẹ kpobi ọ gwọlọ otọhotọ ogaga rọkẹ ẹrọwọ ọkpokpọ riẹ fihọ Ẹme Ọghẹnẹ.

¹² Ma te roro oria nọ ma yeri uzuazọ te no na, o rọ kpata kpata vi epaọ anwẹdẹ re ma fiobọhọ k’amọfa wuhrẹ uzẹme na. U te no olẹ ekẹse kẹse re ma mu iwuhrẹ Ebaibol ekpokpọ họ no, joma lẹ kẹ enọ ma bi lele wuhrẹ enẹna. Kẹsena o vẹ te jọ oghọghọ mai re ma hae họ ilele efa ame “kẹse kẹse, makọ te urere akpọ na.”—Mat. 28:20.