Ọruẹrẹfihotọ Okokohọ Okogho Ọkpokpọ

Ma riẹ nọ Jihova Ọghẹnẹ o fo kẹ uyoyou gbe omarọkẹ riẹriẹriẹ mai. Rekọ, akpọ na ọ be gwọlọ bẹbẹ omai no ẹyọrọ usu okpekpe nọ ma wo kugbei na. (Jọn 17:14) Re o ruẹse tua uyoyou mai kẹ Jihova jẹ k’omai ẹgba rọ whaha eware akpọ na nọ i re fi edikihẹ abọ-ẹzi mai họ awa, ọruẹrẹfihotọ okokohọ okogho ọkpokpọ rọkẹ ukpe iruo 2001 na o ti wo uzoẹme na “You Ọghẹnẹ—Orọnikọ Eware Akpọ na Ha.”—1 Jọn 2:15-17.

Uyoyou ukokodo kẹ Jihova o rẹ w’omai se isẹri kpahe iẹe. Ghele na, usiuwoma ota na o lọhọ kẹ ahwo Ọghẹnẹ buobu hu. Jọ evaọ ẹme na “Uyoyou Rọkẹ Ọghẹnẹ O rẹ w’Omai Evaọ Odibọgba Mai,” wuhrẹ kpahe oghẹrẹ nọ ahwo jọ a ro fi omovuọ gbe ezadhe efa kparobọ no re a sai w’obọ vọvọ evaọ iruo nana.

Ẹvẹ itee uruemu akpọ nọ i bi dhe eyeyoma na i bi ro kpomahọ omai? Iruemu nọ a rri fihọ emuemu vẹre a bi se ai emamọ uruemu enẹna. Ẹme na “Enọ I You Jihova A re Mukpahe Oware Uyoma” gbe ọzọhọkugbe-eriariẹ na “Eware nọ E Rrọ Akpọ na—Ẹvẹ Who Bi Rri Rai?” i ti fiẹgba họ ọtamuo mai re ma ta nọ ijo kẹ isiuru iyoma na.

A ti fi Isukulu Odibọgba Ọghẹnẹ gbe Ewuhrẹ Odibọgba erọ oriruo kugbe ọruẹrẹfihotọ na, jegbe orukpẹre ọ Ewuhrẹ Uwou-Eroro ẹkpoka na. Ovuẹ ogbotu na, “Epanọ Uyoyou gbe Ẹrọwọ I Re Ro Fi Akpọ na Kparobọ,” o te tuduhọ omai awọ re ma raro kele Jesu evaọ emudhe kẹ itunyẹ akpọ na. (Jọn 16:33) Jọ u mu owhẹ ẹro nọ who zizie emọ-uwuhrẹ Ebaibol ra re a jariẹ. Ohwo kpobi nọ ọ gwọlọ họ-ame ọ rẹ ta kẹ ọsẹro ukoko na ababọ oke oraha re ọ sai ru ọruẹrẹfihotọ nọ o fo.

Okokohọ okogho ọnana ọ te kpọ ovao mai rri uzedhe oria nọ ma rẹ bọ uyoyou mai fihọ re ma sae reawere eghale iwoma Jihova. Whọ jọ abọ riẹ ọvuọvo o vo owhẹ hẹ!