Omaa Okpokpọ orọ Okokohọ Okogho

“Koko Ijaje Ọghẹnẹ re Whọ Zọ” oye họ uzoẹme ọ omaa okokohọ okogho edẹ ivẹ nọ o ti muhọ evaọ January na. (Itẹ 4:4) U ti fiẹgba họ oware nọ ẹmeoyo kẹ ijaje Ọghẹnẹ o gbẹ rọ owha ogbẹgbẹdẹ hẹ. Ofariẹ, u ti dhesẹ epanọ oreva Ọghẹnẹ uruo o rẹ rọ wha omosasọ gbe uvi evawere jegbe ẹruore obaro ze.—Mat. 11:28-30; Jọn 13:17.

Ahwo nọ a gwọlọ jọ okokohọ na họ-ame eva ẹmeoyo kẹ ujaje Kristi a rẹ ta kẹ ọsẹro ukoko na, o ve ti ru ọruẹrẹfihọ nọ o fo.—Mat. 28:19, 20.

Ẹme-ọzọhọkugbe jọ o ti dhesẹ vevẹ kpahe uvi idhere nọ ma sai ro dhesẹ uyoyou kẹ Ọghẹnẹ gbe inievo mai. (Jọn 13:34, 35; 1 Jọn 5:3) Uthubro nọ o rẹ sasa udu nọ u no Olezi 19 gbe 119 ze o te jọ omaa na. Dede nọ a kere ohrẹ nọ o rọ ilezi enana evaọ idu ikpe buobu nọ e vrẹ no, ma te ruẹ epanọ o rẹ rọ k’omai erere nẹnẹ.

Uzoẹme ovuẹ ogbotu nọ ọsẹro ubrotọ ọ te kẹ na họ “Dhozọ Ọghẹnẹ je Koko Ijaje Riẹ.” (Otausi. 12:13) Ẹme urere ọ ọsẹro okogho na o ti dhesẹ epanọ izoge a sai ro wo erere nọ ọ mae rro no uzuazọ ze enẹna gbe oware nọ a je fi udu họ obaro ebẹdẹ bẹdẹ. Ọsẹro ubrotọ na o ti ku omaa na họ ẹkwoma ọ ẹfodẹ irere buobu nọ i re no ẹrria lele ọ “uzi uvie” orọ uyoyou na ze. (Jem. 2:8) Uzẹme, onana yọ omaa okokohọ nọ uvumọ ohwo ọ te gwọlọ seba ha!