Omaa Okpokpọ orọ Okokohọ Okogho

Didi irere obọdẹ jọ who wo no enẹna rono ẹnya kugbe Jihova ze? Ẹvẹ whọ sae rọ dadamu kẹ odawọ uvẹ orọkẹ ilale nọ i wo ohẹriẹ no eware Uvie nọ i re ruru isiuru Uvie na je si ai no oria ọsosuọ evaọ uzuazọ ra? (Mat. 6:33) Kọ o rrọ bẹbẹ k’owhẹ re whọ hẹriẹ oware ogbagba no othọthọ evaọ akpọ nọ o bi ru eware nọ e thọ wọhọ ẹsenọ e rrọ gbagba? (Hib. 5:14) A te ta eme enana eva okokohọ okogho na “Wo Erere Enẹna Ẹkwoma Ẹnya Evaọ Idhere Ọghẹnẹ,” nọ o ti muhọ evaọ January 2000.—Ol. 128:1.

Abọ ọkpokpọ jọ nọ ọ te jariẹ evaọ Ẹdẹ-Ọmaha ọrọ okokohọ okogho ọnana họ eruo Ewuhrẹ Odibọgba ọ oriruo. Ọsẹro okogho rai ọ te vuẹ ikoko na kpahe omaa na re ahwo a sae ruẹrẹ oma kpahe ze re a reawere omaa ọruẹrẹfihọ na vọvọ.

Abọ nọ uzoẹme riẹ o ta nọ “Ekobaro—Wha Muẹrohọ Ẹnyonya Rai” na o ti dhesẹ k’omai epanọ a re ro dhesẹ areghẹ gbe uvi iroro re ma ruẹse dẹ uvẹ kẹ odibọgba ọkobaro na. (Ẹf. 5:15-17) Uzoẹme na “Yọrọ Oma kẹ Idhere Nọ E Wọhọ Nọ E Gba” u ti wuhrẹ omai epanọ ma re ro wo imuẹro oware nọ Ọghẹnẹ ọ jẹrehọ evaọ k’abọ k’abọ uzuazọ. Ẹme na “Oghẹrẹ Nọ Eruẹaruẹ Nọ I Rugba No I Re Ro Kpomahọ Omai” o ti fiobọhọ rehọ uyoyou ọ Ẹme Ọghẹnẹ rọ vọ iroro gbe idu mai. Ovuẹ ogbotu na “Idhere Ọghẹnẹ—Ẹvẹ E Rrọ Erere Te!” u ti fiẹgbahọ irere obọdẹ nọ ma re wo enẹna rono ẹnya lele itee ikiẹrẹe Jihova ze.

Kọ o rrọ ẹgwọlọ ra re whọ rehọ ame-ọhọ ro dhesẹvia inọ whọ gwọlọ nya evaọ edhere Ọghẹnẹ wọhọ omọvo ọ idibo riẹ nọ e roma mudhe no? O tẹ rrọ ere, ta kẹ ọsẹro ukoko na re a sai ru ọruẹrẹfihọ nọ o fo kpobi.

Gba ae mu re okokohọ okogho ẹruoke ọnana ọ se owhẹ ba evo. Jariẹ evaọ ọruẹrẹfihotọ edẹ ivẹ na soso, keme ‘oghale u re te ahwo kpobi nọ a be dhẹozọ ỌNOWO, jẹ be nya evaọ idhere riẹ.’—Ol. 128:1.