Ọruẹrẹfihotọ Okokohọ Okogho Ọkpokpọ

Evaọ “oke ẹbẹbẹ” nana, ma gwọlọ areghẹ Ọghẹnẹ re ma sai wo ọjẹrehọ Jihova. (2 Tim. 3:1) Ọruẹrẹfihotọ okokohọ okogho rọkẹ ukpe 2005 na, nọ u bi ti ru uzoẹme nana vẹ na “Jọ ‘Areghẹ nọ O Nehru ze’ Ọ Kpọ Owhẹ,” ọ te k’omai uduotahawọ gbe uvi ithubro.—Jem. 3:17.

Ọzọhọkugbe-eriariẹ ọsosuọ na, “Edhesẹ ‘Areghẹ nọ O Nehru ze’ Evaọ Uzuazọ Mai,” u ti fiobọhọ k’omai riẹ oware nọ o kẹre te re a jọ fuafo, ru udhedhẹ, wo uvi-iroro, je dhesẹ omaurokpotọ. Ọsẹro okogho na ọ vẹ te ta kpahe abọ esa efa sa-sa ọrọ areghẹ Ọghẹnẹ. Ọsẹro ubrotọ na o ti ku ẹdẹ ọsosuọ na họ ẹkwoma edhesẹ epanọ a ro wuhrẹ egbodibo Ileleikristi no re a ta areghẹ Ọghẹnẹ, dede nọ ahwo jọ a bi rri rai wọhọ ‘ahwo gheghe gbe enọ e riẹ obe he.’—Iruẹru 4:13.

Eva ẹdẹ avivẹ na, ọzọhọkugbe-eriariẹ nọ o wo uzoẹme na “Le Eware nọ E rẹ Kẹ Ọbọga” o ti fiobọhọ k’omai vuhu jẹ whaha eware nọ e rẹ wha elọhoma abọ-ẹzi se omai. U ti je dhesẹ k’omai epanọ ma sae rọ bọ amọfa ga eva iwuhrẹ ukoko, evaọ odibọgba na, gbe evaọ uviuwou na. Ovuẹ ogbotu na, “Oghẹrẹ nọ Areghẹ Ọghẹnẹ O re ro Fi Obọ họ kẹ Omai,” u ti ru ovuhumuo mai diwi ziezi kẹ irere nọ ma bi wo nọ ma bi fi ehri-izi Ọghẹnẹ họ iruo evaọ uzuazọ mai na. Ẹme urere na, “Owọ Ojẹ Lele Areghẹ Ọghẹnẹ O rẹ Thọ Omai,” o te bọ ọtamuo mai ga nọ ma rẹ rọ yare areghẹ mi Jihova evaọ edẹ urere nana.

Abọ ologbo jọ evaọ okokohọ kpobi họ ame-ọhọ ilele ekpokpọ. A ti ru Isukulu Odibọgba Esuo-Ọghẹnẹ gbe Uwuhrẹ Uwou-Eroro Na evaọ ọruẹrẹfihotọ na re. Jihova ọ gwọlọ nọ mai kpobi ma wo erere no areghẹ nọ ọ be kẹ ze. Uthubro gbe uduotahawọ nọ e be hẹrẹ omai evaọ okokohọ okogho mai na e te k’omai ẹvi evaọ abọ-ẹzi.—Itẹ 3:13-18.