Okokohọ Okogho nọ O Ti Fi Obọ Họ k’Omai Sẹro Edikihẹ Abọ-Ẹzi Mai
1. Didi ọruẹrẹfihotọ jọ Jihova o ru nọ u bi fi obọ họ k’omai re ma ru iruo usiuwoma ota mai gba?
1 Jihova ọ be k’omai evuẹ, uwuhrẹ, gbe uduotahawọ nọ ma gwọlọ re ma sai ru iruo usiuwoma ota nọ ọ k’omai na gba. (Mat. 24:14; 2 Tim. 4:17) Okokohọ okogho ẹsiẹvo-ẹgbukpe mai yọ edhere jọ nọ Jihova o bi ro ru onana. Okokohọ okogho rọkẹ 2010 o ti wo uzoẹme na “Sẹro Edikihẹ Abọ-Ẹzi Ra,” nọ a rehọ no Ahwo Rom 8:5 gbe Jud 17-19 ze. Ọruẹrẹfihotọ okokohọ okogho na o ti muhọ evaọ January 2, 2010.
2. (a) Irere jọ vẹ ma ti wo no okokohọ okogho na ze? (b) Ẹvẹ ikokohọ okogho nọ e vrẹ no i ro fi obọ họ k’owhẹ no evaọ odibọgba na?
2 Irere nọ Ma ti Wo: A te jọ eme okokohọ na vẹvẹ omai unu kpahe enwoma sa-sa, wọhọ isiuru akpọ na nọ e rẹ sai mi omai oke no, je reghe iroro mai no eware nọ e mai wuzou. Ma ti wuhrẹ epanọ ma sae rọ whaha ẹzi nọ a re ro rri eware evevere, gbe oware nọ u re dhesẹ nọ ohwo o wo uvi edikihẹ abọ-ẹzi. A te jọ ẹme-ọzọhọkugbe evaọ Ẹdoka dhesẹ oware nọ omomọvo gbe iviuwou a rẹ sai ru re a bọ edikihẹ abọ-ẹzi rai ga nọ a tẹ rẹriẹ ovao dhe itunyẹ sa-sa gbe edawọ egaga. Okokohọ na o ti fi obọ họ k’omai sẹro udu mai, yọrọ omokpokpọ abọ-ẹzi mai, jẹ kareghẹhọ omai eghale nọ i re te ahwo nọ a sẹro edikihẹ abọ-ẹzi rai.
3. Oke vẹ okokohọ okogho rai n’otha o kie fihọ, kọ eme whọ rẹ gbaemu nọ who re ru?
3 Nọ whọ tẹ nwane riẹ edẹ gbe oria nọ wha ti jo ru okokohọ okogho rai n’otha no, mu oma họ ẹruẹrẹ kpahe epanọ whọ te rọ nya, jẹ gaviezọ kẹ eme na kpobi. Jọ u mu owhẹ ẹro inọ Jihova ọ rẹ ghale omaa emamọ ohwo.—Itẹ 21:5.
4. Eme u mu omai ẹro inọ ma ti wo evaọ okokohọ okogho mai n’otha na?
4 Ababọ avro, Jihova họ Ọnọ ọ kẹ okẹ uwoma nana. Okokohọ na nọ utu ọrigbo ẹrọwọ na ọ ruẹrẹ họ na o te k’omai uduotahawọ nọ ma gwọlọ re ma ruabọhọ iruo odibọgba mai. Ma yere Jihova rọkẹ eruẹrẹfihotọ iwoma riẹ kpobi nọ i bi ru omai “yọrọ ọrọwovia ẹruore mai na whawha ababọ enuho.”—Hib. 10:23-25; Jem. 1:17.