Ọruẹrẹfihotọ kẹ Egbodibo Ileleikristi
1. Ọruẹrẹfihotọ vẹ u muhọ evaọ 1938, kọ rọkẹ ẹjiroro vẹ?
1 Evaọ 1938, ukoko Jihova u mu ọruẹrẹfihotọ ọkpokpọ jọ họ. A zizie ikoko ẹkuẹko re a kpohọ ikokohọ evaọ okogho rai. Rọkẹ ẹjiroro vẹ? Informant ọrọ January 1939 (epanọ a je se Odibọgba Uvie Mai vẹre) o ta nọ: “Ikokohọ enana yọ abọjọ ọruẹrẹfihotọ Ukoko Jihova rọkẹ epanọ a re ro ru iruo Uvie riẹ. Ithubro nọ a be jọ etẹe kẹ i re fi obọ họ kẹ ohwo kpobi ru iruo nọ a kẹ omai na ziezi.” Nọ ma te roro te epanọ iwhowho-uvie nọ e jọ 58,000 ọvo evaọ 1938 i ro bu vi 7,000,000 no evaọ 2009, o rrọ vevẹ inọ ikokohọ okogho i bi ru ẹjiroro rai gba, koyehọ re i fi obọ họ kẹ omai “ru iruo nọ a kẹ omai na.”
2. Eme vẹ ma te gaviezọ kẹ evaọ okokohọ okogho ukpe 2011?
2 Uzoẹme Rọkẹ Ukpe 2011: Ma bi rẹro ikokohọ okogho nọ i ti muhọ evaọ January 2011 gbe uduotahawọ nọ a te jarai kẹ. Uzoẹme riẹ họ “Wha Rọ Erọ Akpọ na Ha” nọ a rehọ no Jọn 15:19 ze. Eme ọ okokohọ na jọ vẹ egbodibo Ileleikristi a ti wo erere no ze? Evaọ Ẹdẹ-Ọmaha ma te gaviezọ kẹ uzoẹme nana “Iruo Odibọgba Oke-Kpobi E rẹ Thọ Omai—Oghẹrẹ Vẹ?” Ma te jẹ reawere ẹme-ọzọhọkugbe abasa “Whaha Enua Hayo Ogbekuo Ọrọ” “Arao Ẹwọ Na,” “Ogberẹ Ologbo Na” gbe “Ehreki Akpọ Na.” Evaọ Ẹdoka ma te gaviezọ kẹ ẹme-ọzọhọkugbe nọ u wo uzoẹme na “You Jihova, Orọnọ Akpọ na Ha.” Eme efa họ, “Uvie Kristi O Rrọ ‘Orọ Akpọ Na Ha,’” “Wha Ruabọhọ Rria Wọhọ ‘Erara Gbe Enọ E Rrọ Ẹwho Ọfa Ubroke,’” gbe “Wha Kru Udu Ga! Wha rẹ Sai Fi Akpọ na Kparobọ.”
3. Irere vẹ ma ti wo nọ ma te kpohọ okokohọ okogho n’otha na?
3 Nọ oniọvo-ọmọtẹ jọ nọ o si oma kpemu no evaọ iruo odibọgba na o no okokohọ okogho kpozi o te kere inọ eme okokohọ na i ru rie kiẹ uyero riẹ riwi, jẹ gbaemu nọ “ọ rẹ wariẹ mu iruo na họ, jẹ siọ inoma ba eguo.” Ababọ avro, okokohọ okogho ukpe 2011 u ti fi obọ họ kẹ omai kpobi you Jihova orọnikọ akpọ na ha. (1 Jọn 2:15-17) Daoma re whọ jariẹ jẹ gaviezọ re who wo erere vọvọ evaọ ọruẹrẹfihotọ nana nọ ọ rọkẹ egbodibo Ileleikristi na!