Sẹro Iroro Ra

1. Eme họ uzoẹme okokohọ okogho orọ ukpe 2013, kọ fikieme a rọ ruẹrẹ okokohọ na họ?

¹ Jesu ọ ta kẹ ilele riẹ inọ a rehọ udu rai, uzuazọ rai, gbe iroro rai kpobi you Jihova. (Mat. 22:37, 38) A ruẹrẹ ikokohọ ukpe nana kpobi họ re i fi obọ họ kẹ omai ru iroro mai woma ziezi. Kareghẹhọ nọ uzoẹme okokohọ ubrotọ mai orọ ukpe 2012 họ “Sẹro Udu Ra.” Orọ okokohọ obọdẹ ukpe 2013 họ “Sẹro Obroziẹ-Iroro Ra.” Yọ uzoẹme okokohọ okogho nọ a ti ru no umuo January 2013 vrẹ họ “Sẹro Iroro Ra,” onọ a rehọ no Matiu 22:37 ze. A ruẹrẹ eme okokohọ nana họ re i fi obọ họ kẹ omai ru iroro mai woma ziezi, re e sae were Jihova.

2. Enọ vẹ ma rẹ gaviezọ kẹ iyo rai nọ ma te kpohọ okokohọ na?

² Eme nọ A Te Ta: Nọ ma ti kpohọ okokohọ na, joma gaviezọ kẹ iyo enọ nana nọ e gba eme okokohọ na kpobi ekru na:

• Ẹvẹ ma sae rọ whaha “epanọ ahwo a re roro”?

• Ẹvẹ ma sai ro fi obọ họ si ubere nọ u wuhu iroro ahwo nọ e riẹ uzẹme na ha no?

• Oghẹrẹ iroro vẹ o gwọlọ nọ ma re wo?

• Irere vẹ ma re wo nọ ma te bi roro didi kpahe eware nọ i fo?

• Ẹvẹ ma sae rọ kuvẹ kẹ Jihova re ọ kpọ iroro mai?

• Ẹvẹ ezae, eyae, esẹgbini, gbe emọ a sai ro fiba evawere uviuwou na?

• Ẹvẹ ma sae rọ ruẹrẹ oma kpahe kẹ ẹdẹ Jihova?

• Eme u dhesẹ re ma kru iroro mai ga?

• Erere vẹ o re te ahwo nọ i bi fi eware nọ a bi wuhrẹ họ iruo?

3. Fikieme ma jẹ nya edẹ ivẹ okokohọ na gba, gaviezọ ziezi, je fi eme nọ ma ti yo họ iruo?

³ Setan ọ be daoma gaga re o gbe iroro mai ku. (2 Kọr. 11:3) Fikiere ma rẹ daoma gaga re ma sẹro iroro mai. U fo re uruemu mai evaọ ẹsikpobi u dhesẹ nọ ma wo iroro Kristi, ma vẹ jẹ kẹnoma kẹ iruemu iyoma nọ e da akpọ na fia na. (1 Kọr. 2:16) Fikiere daoma kpohọ okokohọ okogho na evaọ edẹ ivẹ na. Gaviezọ ziezi nọ who te te obei. Ma te fi eme nọ ma ti yo họ iruo, ma ti wo ọwhọ kẹ iruo Ọghẹnẹ.—1 Pita 1:13.