Ẹme Ọghẹnẹ Ọ Rrọ Erere kẹ Ewuhrẹ

1. Eme họ uzoẹme okokohọ okogho ọrọ ukpe 2014, kọ onọ vẹ a te kuyo riẹ evaọ okokohọ na?

¹ Jihova họ owuhrẹ nọ ọ mai woma kpaobọ evaọ erugbakpọ na. (Aiz. 30:20, 21) Kọ ẹvẹ Jihova o bi ro wuhrẹ omai? Ọ kẹ omai obe nọ u vi ebe kpobi, oyehọ Ẹme riẹ, Ebaibol na. Ẹvẹ ewuhrẹ Jihova o sai ro fi obọ họ kẹ omai evaọ ugboma, iroro, udu, gbe evaọ usu mai kugbei? A te kuyo onọ nana evaọ okokohọ okogho ọrọ ukpe 2014. Uzoẹme okokohọ na họ, “Ẹme Ọghẹnẹ Ọ Rrọ Erere kẹ Ewuhrẹ,” onọ a rehọ no obe 2 Timoti 3:16 ze.

2. Enọ vẹ a te kiyo rai evaọ okokohọ na?

² Muẹrohọ Igogo Eme Nana: A te kiyo enọ nọ e rrọ obotọ na evaọ okokohọ na:

• Irere vẹ i re te omai nọ Ọghẹnẹ o te wuhrẹ omai? (Aiz. 48:17, 18)

• Imuẹro vẹ ma wo otẹrọnọ ma ru uzuazọ mai lọhọ re ma sai ru iruo ọkobaro? (Mal. 3:10)

• Eme ma re ru nọ ma tẹ nyaku otu nọ o bi wuhrẹ ahwo ‘iwuhrẹ erue’? (Hib. 13:9)

• Ẹvẹ ma sae rọ rehọ aro kele oghẹrẹ nọ Jesu o je ro ‘wuhrẹ’ ahwo? (Mat. 7:28, 29)

• Fikieme o rọ gwọlọ nọ enọ i bi wuhrẹ evaọ ukoko na a re wuhrẹ omobọ rai re? (Rom 2:21)

• Oghẹrẹ vẹ Ẹme Ọghẹnẹ ọ rẹ rọ kẹ erere? (2 Tim. 3:16)

• Ẹvẹ erẹwho na nọ Jihova o bi “nyuhu” na u bi ro kpomahọ ahwo? (Hag. 2:6, 7)

• Evaifihọ vẹ Jihova o wo kpahe omai? (Ẹf. 5:1)

• Fikieme o rọ gwọlọ nọ ma rẹ daoma gaga re ma daji uwuhrẹ Jihova? (Luk 13:24)

3. Fikieme o rọ roja nọ ma re kpohọ okokohọ na jẹ gaviezọ ziezi?

³ Taure Pọl o te ti kere eme nọ a rehọ uzoẹme okokohọ okogho nana no ze, ọ jọ obọ emuhọ 2 Timoti uzou avọ 3 ta kpahe oke obẹbẹ nọ o te jọ evaọ edẹ urere na. O kere nọ: “Ahwo omuomu gbe otu eviẹhọ a re ti no eyoma ruọ onọ o mai yoma, eviẹwẹ gbe enọ a viẹhọ.” (2 Tim. 3:13) Re a siọ omai ba ẹviẹhọ, o roja gaga re ma gaviezọ kẹ ewuhrẹ Ọghẹnẹ je ru lele eware nọ o wuhrẹ omai. Fikiere, joma daoma mai kpobi re ma kpohọ okokohọ na jẹ gaviezọ ziezi.