Ẹme Ọghẹnẹ O Wo Ẹgba
1. Eme họ uzoẹme okokohọ obọdẹ ọrọ 2014 na?
1 Ebaibol na o wo ohẹriẹ no ebe kpobi nọ ahwo-akpọ a kere, u wo ẹgba nọ u re ro nwene omai, re iroro gbe uruemu mai e rọwo kugbe oreva Jihova. Ẹvẹ Ẹme Ọghẹnẹ o wo ẹgba te? Ẹvẹ ma sae rọ rehọ ẹgba Ẹme Ọghẹnẹ ru iruo evaọ uzuazọ? Ẹvẹ ma sae rọ rehọ iẹe fi obọ họ kẹ amọfa ziezi? Nọ a te kuyo enọ nana evaọ okokohọ obọdẹ ọrọ 2014 na, mai kpobi ma ti wo erere ziezi. Uzoẹme okokohọ na họ: Ẹme Ọghẹnẹ O Wo Ẹgba. A rehọ e riẹ no obe Ahwo Hibru 4:12 ze.
2. Enọ vẹ a te kẹ iyo rai evaọ okokohọ na?
2 Gaviezọ Ziezi nọ A te Kẹ Iyo Enọ Nana: Nọ whọ te gaviezọ kẹ eme nọ a ti ru evaọ okokohọ na, kere iyo enọ nọ e rrọ obotọ na fihọ otọ.
• Fikieme ma je fievahọ Ẹme nọ Jihova ọ ta? (Ol. 29:4)
• Ẹvẹ ma sai ro wo erere no ogaga nọ o rrọ Ẹme Ọghẹnẹ ze? (Ol. 34:8)
• Ẹvẹ whọ sae rọ rehọ Ẹme Ọghẹnẹ ru iruo ziezi nọ whọ tẹ rrọ usiuwoma? (2 Tim. 3:16, 17)
• Ẹvẹ ma sae rọ yọroma re akpọ Setan ọ siọ omai ba ẹviẹhọ? (1 Jọn 5:19)
• Ẹvẹ whai izoge wha sai ro wo evawere evaọ egagọ Ọghẹnẹ? (Jeri. 17:7)
• Ẹvẹ ma sai ro wo ogaga dede nọ oma o lọhọ omai? (2 Kọr. 12:10)
• Eme o re fi obọ họ kẹ omai ru inwene evaọ uzuazọ o tẹ make rọnọ ma wo iruemu jọ nọ e reria omai obọ no? (Ẹf. 4:23)
3. U te no eme nọ a ti ru nọ ma te gaviezọ kẹ no, erere ọfa vẹ ma ti wo no okokohọ obọdẹ na ze?
3 Nọ ma tẹ gaviezọ evaọ okokohọ na, ma ti wo irere buobu. U te no ere no, ikokohọ obọdẹ gbe erọ okogho yọ etoke nọ ma sae rọ reawere omakugbe inievo mai nọ i no ikoko efa ze. (Ol. 133:1-3; 2 Kọr. 6:11-13) Fikiere daoma ru uvẹ nọ who re ro kuomagbe inievo nọ whọ riẹ no vẹre gbe enọ whọ re riẹ hẹ. Otẹrọnọ a vi ọsẹro ubrotọ jọ bru owhai ze hayo a vi oniọvo jọ no obọ Ebẹtẹle ze te kẹ ovuẹ evaọ okokohọ na, daoma dede iei avọ aye riẹ rehọ. Evaọ uzẹme, ẹjiroro buobu e riẹ nọ ma re ro rẹro okokohọ obọdẹ ukpe nana.