‘Emu Evaọ Ẹruoke’
1. Oghẹrẹ vẹ okokohọ obọdẹ ukpe nana u ro fi obọ họ kẹ owhẹ gbe amọfa?
1 Nọ ma te no ẹdẹ okokohọ obọdẹ kpozi, ẹme nọ ma rẹ mae ta họ “Okokohọ na o tuduhọ omai awọ kẹhẹ!” Ọsẹro okogho jọ ọ niyẹrẹ inọ nọ a no okokohọ obọdẹ ukpe nana kpozi no, inievo jọ nọ e rrọ okogho riẹ a tẹ ta nọ a re fiba iruo rai evaọ odibọgba na. Esẹro okogho gbe erọ ubrotọ efa e ta nọ: “Nọ ma be kiẹ oghẹrẹ uzuazọ nọ ma salọ riwi na, okokohọ na u fi obọ họ kẹ omai roro ziezi kpahe oke nọ ma rrọ na.” “Iwhowho-uvie buobu e ta nọ okokohọ na o tuduhọ ae awọ re a muẹrohọ nọ a rehọ oware nọ o mai wuzou karo, iruo odibọgba na.” Oghẹrẹ vẹ okokohọ obọdẹ na u ro fi obọ họ kẹ owhẹ?
2. Izoẹme jọ vẹ a te ta kpahe evaọ okokohọ obọdẹ ukpe 2011?
2 Okokohọ obọdẹ ukpe n’otha o te jẹ tuduhọ omai awọ. Uzoẹme riẹ họ ‘Dhẹgbalọ Jihova,’ nọ a rehọ no Olezi 118:8, 9 ze. Izoẹme jọ nọ a te ta kpahe họ: “Oghẹrẹ nọ Jihova Ọ Rọ Rrọ Adhẹzọ Evaọ Oke Uye,” “Fi Obọ Họ kẹ Amọfa Dhẹ Ruọ Otọ Ibekpe Jihova,” “Rọ Aro Kele Jihova Jọ Oria Adhẹzọ kẹ Amọfa,” “Izoge, Wha Fi Eva Họ Jihova!” gbe “Aparadase Abọ-Ẹzi Mai Yọ Ọruẹrẹfihotọ Jihova kẹ Adhẹzọ.”
3. Ẹvẹ ma sai ro wo erere vọvọ no okokohọ na ze?
3 Epanọ Ma Sai ro Wo Erere Noi Ze: Nọ a tẹ nwani whowho ẹdẹ na no, mu oma họ ẹruẹrẹ kpahe, je zizie emọ-uwuhrẹ Ebaibol ra. Re ma sae “rehọ odiri mọ ibi,” ma rẹ kareghẹhọ eme nọ ma yo. (Luk 8:15) Fikiere, gaviezọ ziezi kẹ eme okokohọ na, je kere igogo eme nọ who ti fihọ iruo evaọ uzuazọ ra gbe evaọ iruo odibọgba na fihotọ. Wha te no okokohọ na kpozi no, whai uviuwou na soso wha ta ẹme kpahe igogo idhere nọ omomọvo gbe uviuwou na o sai ro fi eme na họ iruo.
4. Fikieme ma je rẹro okokohọ obọdẹ n’otha mai?
4 Wọhọ epanọ a rẹ romatotọ there emamọ emu ọwewere na, ere a nabe romatotọ ruẹrẹ eme okokohọ obọdẹ ukpe 2011 na họ. Jọ Jihova ọ ghale oma nọ whọ te dawo re whọ jọ okokohọ na je wo erere no ‘emu ẹruoke’ nana ze onọ a ruẹrẹ họ re o bọ egbodibo Ileleikristi ga na.—Mat. 24:45.