Ọruẹrẹfihotọ Ọkpokpọ nọ A rẹ rọ Kiẹ Ọruẹrẹfihotọ Okokohọ Riwi
Nọ akpọ Setan o bi dhe eyeyoma na, Jihova ọ be kẹ omai ẹgba “re ma se edhọ-egọ avọ urusio akpọ na ba, re ma yeri uzuazọ uwowolẹ, avọ ẹrẹreokie, gbe uzuazọ Ọghẹnẹ u yero eva akpọ nana.” (Tait. 2:12) Usu eruẹrẹfihotọ nọ o bi ru ẹkwoma ‘ọrigbo nọ o wo ẹrọwọ avọ areghẹ na’ họ ọruẹrẹfihotọ ikokohọ okogho gbe erọ obọdẹ nọ ma re ru kukpe kukpe na. (Mat. 24:45) Eruẹrẹfihotọ abọ-ẹzi nana e rẹ bọ ẹrọwọ ga kẹhẹ!
Re o sai fiobọhọ kẹ omai kareghẹhọ je fi ithubro nọ a kẹ omai họ iruo, a te rehọ ọruẹrẹfihotọ ọkpokpọ nọ a te rọ kiẹ ọruẹrẹfihotọ ikokohọ nana riwi ro ru iruo evaọ ukpe 2005 na. Izoẹme nọ e kẹ ẹmẹvo ọ oware nọ a te ta kpahe gbe enọ ọkiẹkpemu ikokohọ ivẹ na e rrọ ẹwẹ-obe avọ 5-6 ọrọ uko-obeva nana. Ukoko kpobi o te kiẹ ovuẹ nana riwi eva Ewuhrẹ Odibọgba rai taure a te ti kpohọ okokohọ rai gbe okenọ a tẹ nwani no okokohọ rai ze no. Ẹvẹ a te rọ ruẹrẹ onana họ?
Oka ovo hayo ivẹ taure ukoko na u te ti kpohọ okokohọ okogho rai, a ti ru ẹme iminiti-ikpe rono uzoẹme na ze “Ọruẹrẹfihotọ Okokohọ Okogho Ọkpokpọ” evaọ Ewuhrẹ Odibọgba rọ bọ isiuru kẹ ọruẹrẹfihotọ na. Oruẹme na o ti je si iroro ahwo na kpohọ enọ ọkiẹkpemu na jẹ tuduhọ ahwo kpobi awọ re a kere eme fihọ otọ evaọ oma oruẹrẹkpahe kẹ ọkiẹkpemu nọ a ti ru evaọ oka jọ obaro nọ a te ru okokohọ na no.
Eva umutho eka jọ nọ a te ru okokohọ na no, a ti ru ọkiẹkpemu iminiti 15 ọrọ ọruẹrẹfihotọ ẹdẹ ọsosuọ okokohọ na evaọ Ewuhrẹ Odibọgba na. Evaọ oka nọ u lele i rie, a te rehọ iminiti 15 ro ru ọkiẹkpemu ọruẹrẹfihotọ ẹdẹ avivẹ na. Enọ ọkiẹkpemu nọ a kẹ evaọ uko-obeva nana a ti ro ru abọ ivẹ nana. Ọkiẹkpemu na ọ rẹ tẹrovi aghare efihiruo ovuẹ na. Ekpako na a sai ru ọruẹrẹfihotọ re a ru eme jọ kpẹre, hayo nyasiọ eme jọ ba, hayo wariẹ ma omaa abọ Ewuhrẹ Odibọgba efa re a sai ru abọ nana.
Edhere ọvona a ti ro ru ọruẹrẹfihotọ ẹdẹ okokohọ obọdẹ na re, ajokpanọ abọ iminiti 15 ọvo a te rọ kiẹ ọruẹrẹfihotọ na soso riwi. Mai kpobi ma te gwọlọ sẹro uko-obeva nana jẹ rehọ iẹe ruiruo vọvọ re ma sai wo erere no obọdẹ ithubro nọ Jihova ọ be kẹ ze.—Aiz. 48:17, 18.