Ọruẹrẹfihotọ Ẹdẹ Okokohọ Obọdẹ Ọkpokpọ

Fiki ẹgba nọ ẹzi ọfuafo na ọ kẹ rae, Ileleikristi ọsosuọ na a dao ẹgba rai kpobi re a whowho emamọ usi na kẹre te epanọ o rẹ lọhọ te kpobi. (Iruẹru 1:8; Kọl. 1:23) Ọruẹrẹfihotọ okokohọ obọdẹ ọrọ ukpe iruo 2007 na, ‘Vuẹ Ẹme na Whawha,’ o ti fiobọhọ k’omai rọ aro kele oriruo owoma rai.—Iruẹru 18:5.

Nọ Devidi Ovie na ọ jẹ tẹme kpahe ẹme Ọghẹnẹ, ọ ta nọ: “Isẹri-ise Ọnowo umuẹro, o rẹ rọ areghẹ kẹ iwewe.” (Ol. 19:7) Omaa okokohọ obọdẹ ọrọ 2007 na nọ a nabe ruẹrẹfihọ ziezi na u ti fi elo họ aghare Ikereakere na nọ e rẹ rọ kẹ “ọkpọvio,” yọ o te jẹ tuduhọ omai awọ re ma rehọ Ẹme Ọghẹnẹ ruiruo evaọ usiuwoma ota gbe ewuhrẹ amọfa nọ ma riẹ nọ oke nọ ukiọkọ u tulo ho na. (2 Tim. 3:16, 17) Ọruẹrẹfihotọ ọkpokpọ na o ti dhesẹ epanọ ma sae rọ whaha egbefẹ nọ e rẹ wha enwoma se omai gbe epanọ ma sai ro wo erere ẹkwoma efihiruo ehri-izi Ebaibol evaọ uzuazọ ikẹdẹ kẹdẹ mai. U ti je fiobọhọ k’omai rehọ Ebaibol na fiobọhọ kẹ izoge na gbe ahwo nọ a be ziọ ukoko na obọ re a wo ẹnyaharo abọ-ẹzi.

Daoma ruẹ nọ whọ rẹ jariẹ no emuhọ okokohọ na ze, whọ vẹ jẹ gaviezọ ziezi. Wha obe lele oma re who kere igogo eme nọ whọ sai fihọ iruo. Rọ oma totọ gaviezọ kẹ ithubro gbe ekareghẹhọ nọ a te kẹ, re who je roro kpahe epanọ whọ ti ro fi eware nọ who wuhrẹ na họ iruo.

Ọruẹrẹfihotọ ẹdẹ okokohọ obọdẹ na ọ te lẹliẹ ovuhumuo mai kẹ Ẹme Ọghẹnẹ rro, kareghẹhọ omai re ma ruabọhọ ewhowho emamọ usi Uvie na avọ ajọwha, je dhesẹ k’omai epanọ ma re ro fiobọhọ kẹ amọfa ru epọvo na re. Fikiere, gbaemu nọ ithubro gbe ekpọvio abọ-ẹzi nọ Jihova ọ be rọ idhere nana kẹ na i re vo owhẹ hẹ!—Aiz. 30:20b, 21.