Omaa Okpokpọ orọ Ẹdẹ Okokohọ Obọdẹ

“Jọ Ọkpako Evaọ Ẹgba Otoriẹ” họ uzoẹme ọruẹrẹfihọ ẹdẹ okokohọ obọdẹ nọ o ti muhọ evaọ March 2001 na. (1 Kọr. 14:20) Fikieme u ti ro woma re ma jariẹ? Ma be rria akpọ nọ ọ vọ avọ emuemu. Re ma mudhe kẹ onana, ma rẹ bọ ẹgba otoriẹ abọ-ẹzi mai ga hrọ re ma sae rehọ ewoma fi eyoma kparobọ. Oyena họ oware nọ ọruẹrẹfihọ ẹdẹ okokohọ obọdẹ na o ti fiobọhọ k’omai ru.

Evaọ abọ emuhọ na, ọsẹro okogho na ọ te t’ẹme kpahe “Obufihọ Re A Jọ Ọkpako Evaọ Otoriẹ Ebaibol.” O ti dhesẹ epanọ a rẹ rọ dadamu evaọ ẹrọwọ Oleleikristi k’omai. Oruẹme ọrara na o ti fielo họ epanọ efihiruo, hayo eroruiruo, ọrọ ehri-izi Ebaibol o r’oja te evaọ ẹbọ ovuhumuo obọdẹ, okenọ ọ te t’ẹme kpahe uzoẹme na “Sẹro Edikihẹ Abọ-Ẹzi Ẹkwoma Ewuhrẹ Ẹgba Ereghẹ Ra.”

Izoge na re a rẹ bọ ẹgba otoriẹ hrọ. A te t’ẹme kpahe onana evaọ abọ nọ izoẹme rai e ta nọ, “Oware nọ A Jẹ Jọ Emaha Evaọ Abọ Eyoma” gbe “Izoge nọ I Bi Wo Otoriẹ Enẹna.” Yo mi izoge nọ e te ta oware nọ a bi ru re a rọ thoma vẹrẹ evaọ abọ-ẹzi re a sae kpọ isiuru kpobi kpahe iruẹru imuemu akpọ na jẹ whaha idabolo.

Ẹvẹ ma sai ro duku evawere nọ e mae rro evaọ uzuazọ? Oruẹme ọrara na o ti ru onana vevẹ evaọ ẹme urere na “Wo Erere no Efihiruo Ehri-Izi Ebaibol Ze Ẹkwoma Otoriẹ.” Ọ te kẹ iriruo nọ i dhesẹ nọ efihiruo Ẹme Ọghẹnẹ o re fiobọhọ k’omai yeri kugbe ebẹbẹ, jiroro, je ghine wo erere no oware nọ Jihova o bi wuhrẹ omai ze.

Ahwo nọ a gwọlọ dhesẹ omarọkẹ rai kẹ Ọghẹnẹ via ẹkwoma ame-ọhọ eva okokohọ na a rẹ vuẹ ọsẹro ukoko na ababọ oke oraha. Kpoka họ ukeledẹ ra nọ a tẹ nwani whowho ẹdẹ okokohọ obọdẹ na no, jẹ m’omaa ziezi re who wo erere no ọruẹrẹfihọ obọdẹ nana ze. Whọ jọ abọ ọvuọvo ọrọ ẹdẹ okokohọ obọdẹ na ọ vrẹ owhẹ hẹ! O te bọ owhẹ ga re who thihakọ eyero omuomu ọnana jẹ yọrọ ẹrọwọ kẹ Jihova.