Bọ Ẹgba Ereghẹ Ra
1 Edẹ urere ebẹbẹ na, enọ ma rrọ eva rai na, e wha itunyẹ nọ i bi vihọ gbe edawọ egaga oghẹrẹ buobu se ahwo Ọghẹnẹ evaọ eria kpobi no. (2 Tim. 3:1-5) Mai kpobi ma gwọlọ uduotahawọ re ma dikihẹ ga evaọ ẹrọwọ na. (1 Kọr. 16:13) Ma rẹ sai ru ere avọ obufihọ Jihova nọ ma be ruabọhọ Ẹme riẹ ọrọko oma kẹse kẹse na, rẹroso ẹzi riẹ, je bigba ukoko riẹ na.—Ol. 37:28; Rom 8:38, 39; Evia. 2:10.
2 Avọ emamọ ẹjiroro, uzoẹme nọ a ro ru ọruẹrẹfihọ ẹdẹ okokohọ obọdẹ n’okpo na họ “Jọ Ọkpako Evaọ Ẹgba Otoriẹ.” A si rie no 1 Ahwo Kọrint 14:20 (NW ) ze, oria nọ ma jọ se eme ọ Pọl ukọ na: “Inievo, wha jọ emaha ha evaọ ẹgba otoriẹ, rekọ wha jọ emaha evaọ abọ eyoma; ghele na wha jọ ọkpako evaọ ẹgba otoriẹ.” Ẹvẹ who roro kpahe ọruẹrẹfihotọ na?
3 “Ẹvẹ o jọ uduotahawọ te!” “Nwanọ onana họ oware nọ ma gwọlọ!” Eyena yọ ivẹ ọvo evaọ udevie eme nọ ahwo a ta kpahe iẹe. Makọ ohwo jọ nọ ọ rrọ Osẹri hi nọ ọ ziọ okokohọ obọdẹ na re ọ ruẹ ọmọtẹ ikpe 12 riẹ nọ ọ be họ-ame ọ ta nnọ ọruẹrẹfihotọ na ọ were riẹ gaga yọ ọ ruẹ nnọ o te kẹ uviuwou riẹ erere. Kọ ere o rrọ owhẹ oma re? J’oma kareghẹhọ igogo abọ ọruẹrẹfihotọ na jọ.
4 Eriariẹ Egbagba E r’Oja Rọkẹ Ẹbọ Ẹgba Ereghẹ: Evaọ ẹme emuhọ na, “Bọ Ẹgba Otoriẹ Ra Enẹna,” eme oruẹme na o fiẹgbahọ nnọ o r’oja re ma sae nyate use-abọ inẹnẹ? Ma gwọlọ vi ẹgba iroro. Ma rẹ bọ je ru ẹgba otoriẹ Ebaibol mai kodo hrọ, re eyoma kpobi nọ ma rẹriẹ ovao ku ọ siọ omai ba efikparobọ. Ewo otoriẹ onana o gwọlọ ekpakpọ Ọghẹnẹ. Wọhọ ọso-ilezi na, ma rẹ yare Jihova evaọ olẹ hrọ re o ru omai w’otoriẹ izi gbe ekareghẹhọ riẹ re ma sae rehọ udu mai kpobi gọe.—Ol. 119:1, 2, 34.
5 Evaọ abọ nọ ọ kẹle riẹ na, ọsẹro okogho na o dhesẹ nnọ Jihova, ẹkwoma Ẹme gbe ukoko riẹ, ọ be k’omai “Obufihọ Re A Jọ Ọkpako Evaọ Ẹgba Otoriẹ Ebaibol.” A fa otoriẹ wọhọ “ẹgba nọ a rẹ rọ ruẹ ẹme lafi jẹ ruẹ uzou riẹ ẹkwoma evuhumu abọ riẹ gbe oma riẹ kpobi, rọ ere riẹ otọ riẹ.” Ono ọ rẹ sai fiobọhọ k’omai bọ ẹgba nana? Jihova ọ kẹ ekẹ ahwo re a fiobọhọ k’omai ru ẹnyaharo abọ-ẹzi. (Ẹf. 4:11, 12) Ukoko otọakpọ riẹ o be tuduhọ omai awọ re ma se Ẹme Ọghẹnẹ kẹdẹ kẹdẹ je kpohọ iwuhrẹ ukoko kpobi ẹsikpobi. (Ol. 1:2) A bi wuhrẹ omai epanọ ma rẹ rọ rehọ Ebaibol na gbe ebe Ileleikristi mai ro ruiruo evaọ uwuhrẹ omobọ ohwo gbe orọ uviuwou jegbe evaọ omaruẹrẹhọ kẹ iwuhrẹ ukoko avọ usiuwoma ota. Kọ who bi wo erere no eruẹrẹfihotọ enana ze? Who wo omaa isase Ebaibol omobọ ra orọ ikẹse kẹse? Onana o r’oja re o sae sẹro mai no ekie kẹ iruemu, ẹgọ, eriariẹ-ifofe gbe iruẹru eviẹhọ akpọ na.—Kọl. 2:6-8.
6 Ma re Wuhrẹ Ẹgba Ereghẹ Mai Hrọ: Evaọ ẹme ọsosuọ riẹ, onọ uzoẹme riẹ o ta nnọ “Sẹro Edikihẹ Abọ-Ẹzi Ẹkwoma Ewuhrẹ Ẹgba Ereghẹ Ra,” oruẹme ọrara na o dhesẹ nnọ akpọ na ọ sae hẹriẹ uwoma no uyoma ha. (Aiz. 5:20, 21) Onana o rọ ere keme a siọ ekoko ijaje ikiẹrẹe Ọghẹnẹ. Wo ohẹriẹ, mai enọ i wo ewuhrẹ abọ-ẹzi no evaọ ukoko Jihova ma vuhu itee Ọghẹnẹ mu, enọ e rẹ kpọ iruẹru gbe uruemu mai. Fikiere, ma rẹ sai dhesẹ kẹ oma mai oware nọ u woma je kiehọ evaọ aro Jihova gbe onọ o rọwo kugbe oreva ogbagba riẹ.—Rom 12:2.
7 Re ma whaha iroro ewhọwhọhọ akpọ na gbe iyẹrẹ ethọthọ nọ i re noi ze, ma re wuhrẹ ẹgba ereghẹ mai ẹsikpobi. Ẹvẹ a re ro ru onana? Wọhọ epanọ a kere evaọ Ahwo Hibru 5:12-14, Pọl ukọ na o fiẹgba họ ẹgwọlọ nọ ma rẹ rọ rehọ eware nọ i vi “ame-ivie” ọrọ ẹme na ko oma mai. Ma gwọlọ emu abọ-ẹzi ọgaga, wọhọ ọnọ ma be re no ewuhrẹ eruaruẹ Ebaibol ze na. Ma re fi oware nọ ma wuhrẹ h’iruo evaọ izuazọ mai hrọ. Okenọ ma te ru ere, ẹgbagba ọrọ ehri-izi gbe itee Jihova u re mu omai ẹro. Onana u re wuhrẹ ẹgba ereghẹ mai re o hẹriẹ uwoma no uyoma ziezi.
8 Uyoma kẹhẹ inọ ahwo jọ a kie no evaọ abọ-ẹzi. Fikieme? A tẹro rai vi oware nọ u woma je kiete evaọ aro Jihova ha. Fikiere, a kie ruọ agbefẹ idhesẹvia ẹmeọta iredio gbe etẹlivisiọne nọ e rọwo kugbe Ikereakere he no, ile ogbekuo, hayo usu uyoma evaọ eria ẹmeọta-kugbe ekọmputa. Ẹkwoma ẹnya avọ areghẹ, ma rẹ whaha okpomahọ ahwo ọfariẹ-ogbe, ahwo ogheghẹ, hayo ahwo omuomu.—Itẹ 13:20; Gal. 5:7; 1 Tim. 6:20, 21.
9 Izoge E rẹ “Jọ Emaha Evaọ Abọ Eyoma” Hrọ: Ọruẹrẹfihotọ na o wo abọ ivẹ nọ e tuduhọ izoge na awọ dẹẹ re a bọ ẹgba ereghẹ rai. Iruẹme na a dhesẹ nnọ re a “jọ emaha evaọ abọ eyoma” u dhesẹ nọ a rẹ jọ ogbori, koyehọ, a rẹ riẹ onahona ha wọhọ emaha, kpahe eware nọ e rrọ gbegbe evaọ ibiaro Jihova. (1 Kọr. 14:20) A tuduhọ omai kpobi awọ re ma muẹrohọ epanọ ma rẹ rehọ oke mai ruiruo re ma whaha oma-ukpefihọ kẹ oghẹrẹ eyoma kpobi gbe ekpakpọ riẹ. (Ẹf. 5:15-17) A tuduhọ omai awọ re ma kele unu oke nọ ma be raha ro se ebe nọ i w’obọ kpahe orro mai evaọ otoriẹ eware abọ-ẹzi hi. Kọ who ru ere no? Eme iyẹrẹ na i dhesẹ via? Fiba isase Ebaibol ikẹdẹ kẹdẹ, gbae mu re whọ nya lele isase ebe nọ ukoko na u bi kporo. Onana uruo u ti fiobọhọ k’omai kpobi, te emaha na, re ma ‘wo otoriẹ.’—Itẹ 4:7-9.
10 “Wo Erere No Efihiruo Ehri-Izi Ebaibol Ze Ẹkwoma Otoriẹ”: Oye o jọ uzoẹme ẹme urere ọrọ ọruẹrẹfihotọ ẹdẹ okokohọ obọdẹ na. Oruẹme ọrara na o dhesẹ nnọ Jihova họ Ehri otoriẹ nọ o rẹ kẹ uzuazọ, onọ u kpehru vi orọ ahwo-akpọ kpobi. Dai roro epanọ o rẹ jọ re who wo uvẹ nọ whọ sae rọ rehọ no eriariẹ Jihova ze! O re siobọnoi vẹrẹvẹrẹ kẹ enọ e be rọ eva efuafo gwọlọ iẹe jẹ be yare iẹe evaọ ẹrọwọ. (Itẹ 2:3-5, 9; 28:5) Kọ who bi wo erere no okẹ onana ze vọvọ?
11 A tuduhọ omai awọ re ma wuhrẹ epanọ ma re ro vuhu ehri-izi mu nọ ma te bi se Ebaibol na. (2 Tim. 3:16, 17) Romatotọ wuhrẹ ai re who wo eriariẹ egbagba ọ oware nọ Jihova ọ be ta. Rehọ oke ro roro kpahe ehri-izi enana je fi ai họ iroro gbe udu ra. Onana u ti wuhrẹ ẹgba ereghẹ ra re whọ sae kparobọ evaọ okenọ whọ tẹ be jiroro uzuazọ. (Jos. 1:8) Joma roro kpahe umutho iyero jọ nọ ahwo buobu a rẹriẹ aro dhe re ma ruẹ oghẹrẹ nọ efihiruo ehri-izi Ebaibol o sai ro fiobọhọ k’omai kparobọ.
12 ‘Kọ u fo re mẹ wha oghẹrẹ ẹgọ gbe osẹ jọ?’ Uruemu akpọ na evaọ abọ oghẹrẹ emuẹgọ gbe osẹ u re dhesẹ ẹzi ọkparesuọ. Ẹzi otiọye na o re ru ahwo sẹ-osẹ owhọwhọhọ hayo onọ u re dhesẹ oma rai via. Kọ ehri-izi Ebaibol vẹ i re fiobọhọ k’omai za oghẹrẹ iroro itieye na dhe? Nọ ma wuhrẹ ẹgba ereghẹ mai no na, ma re wo ehri-uzi nọ o rọ 1 Timoti 2:9, 10 na fihọ iroro inọ ma gọ “umutho ẹgọ . . . avọ omarokpotọ . . . utionọ u fo kẹ [ahwo nọ a be rọ egagọ kẹ Ọghẹnẹ].” Ehri-izi efa nọ i kie kpahe iẹe họ enọ a fodẹ evaọ 2 Ahwo Kọrint 6:3 gbe Ahwo Kọlọsi 3:18, 20.
13 ‘Eme mẹ rẹ sai ru re me ru ọgbakugbe uviuwou mẹ jọ gaga?’ Emamọ ẹmeọta-kugbe evaọ udevie ahwo uviuwou o r’oja. Jemis 1:19 o ta kẹ omai nọ: “Jọ kohwo kohwo o he yo vẹrẹ, ọ vẹ rọ ẹrera ruọ ẹme-ọta, je muofu ẹrera.” U fo re ahwo uviuwou a gaviezọ jẹ t’ẹme kugbe ohwohwo keme ẹmeọta-kugbe uviuwou yọ oware obọ-wozẹ-obọ. Ma tẹ be make t’ẹme nọ ọ rrọ uzẹme, otẹrọnọ ma ta riẹ evaọ edhere nọ ọ kare ọdawẹ, o rẹ sae wha eyoma ze viukpọ ewoma. Fikiere makọ ọzae hayo aye uwou-orọo ma rrọ, ọyewọ hayo ọmọ, u fo re ẹme mai “ọ vọ avọ aruoriwo, jẹ hẹ mere wọhọ uwhei kẹse kẹse.”—Kọl. 4:6.
14 ‘Kọ isiuru ekwakwa-efe i bi Kpomahọ omẹ?’ Isiuru ekwakwa-efe yọ otunyẹ akpọ na jọ nọ o rẹ lẹliẹ uzuazọ jọ kpakre-kpakre. O rẹ k’ohwo uvi evawere he. (Ọtausi. 5:10; Luk 12:15; 1 Tim. 6:9, 10) Re u fiobọhọ k’omai whaha agbefẹ isiuru ekwakwa-efe, Jesu o wuhrẹ omai ehri-uzi nana nọ u w’uzou na: Wo ẹro ọlọlọhọ. Eyeri uzuazọ owowa, onọ o kpakre he o kẹre te ẹro mai nọ ma rẹ tọvi isiuru Uvie na, fi eware efa kpobi họ oria avivẹ.—Mat. 6:22, 23, 33.
15 Oware nọ O rẹ Jọ Ute Mai: Ma jọ Ẹme Ọghẹnẹ wo ehri-izi ikiẹrẹe nọ a re fievahọ nọ e rẹ kpọ omai evaọ iroro ejẹ. O gwọlọ re ma wuhrẹ ehri-izi enana, roro kpahe ae didi, je w’otoriẹ epanọ a re ro fi ai h’iruo evaọ izuazọ mai. Ẹkwoma ‘ewuhrẹ ẹgba ereghẹ mai re ma vuhu uwoma gbe uyoma,’ ma ti wo erere jẹ rọ ọghọ kẹ Jihova.—Hib. 5:14.