Ọruẹrẹfihotọ Ẹdẹ Okokohọ Obọdẹ Ọkpokpọ

Uzoẹme ọruẹrẹfihotọ ẹdẹ okokohọ obọdẹ ọrọ enukpe nana u wo otọhotọ ogaga rono Ikereakere na ze: “Wha Rehọ Omarai kẹ Ọghẹnẹ—Mudhe kẹ Ẹdhọ.” (Jem. 4:7) Onana yọ uvi ohrẹ rọkẹ etoke use-abọ nana! Ẹmeoyo mai kẹ ijaje Ọghẹnẹ o ru omai rẹriẹ ovao dhe ohọre Setan. Ọruẹrẹfihotọ na o ti wuhrẹ omai epanọ ma re ro mudhe kẹ emaa imuomu Ẹdhọ nọ e rẹ raha ẹrọwọ. Evẹ họ efe abọ-ẹzi jọ nọ ma ti wo no okokohọ ọnana ze?

Ọsẹro okogho na o ti dhesẹ epanọ “Edhesẹ Omarokpotọ kẹ Ọghẹnẹ Wọhọ Ahwo Uviuwou” o rẹ rọ bọ iviuwou ga re a za itunyẹ akpọ na dhe. Ẹme ọsosuọ oruẹme ọrara na, “Oware nọ U Dhesẹ re A Mudhe kẹ Ẹdhọ,” u ti dhesẹ oware nọ o soriẹ gbe oghẹrẹ nọ ma rẹ rọ j’owọ ogaga ro mudhe kẹ ẹjiroro Setan re ọ raha edikihẹ abọ-ẹzi mai. A nabe ruẹrẹ eme ivẹ jọ họ kẹ izoge, enọ o gwọlọ nọ a re muẹrohotọ kẹ omaa Ẹdhọ re. Ileleikristi buobu nọ e kpako no enẹna a se nọ a re kielele isiuru akpọ na evaọ okenọ a jọ emaha. Ma te reawere eyo mi ejọ nọ a ti gbiku eware nọ a rọ ẹro ruẹ.

A gwọlọ omarokpotọ kẹ udu-esuo mi ahwo kpobi nọ a rọ okogho ahwo-akpọ. Fikiere, ẹme ekuhọ oruẹme ọrara na o ti fielo họ eria ene nọ ma re jo dhesẹ omarokpotọ mai kẹ Ọghẹnẹ: (1) kẹ egọmeti, (2) evaọ ukoko na, (3) evaọ iruẹru okọ, gbe (4) evaọ uviuwou na. Ọruẹrẹfihotọ na o woma kẹhẹ!

U fo nọ ahwo nọ a gwọlọ họ-ame eva ẹdẹ okokohọ obọdẹ ọnana a rẹ vuẹ ọsẹro ukoko na ababọ oke oraha. Mai kpobi ma re kpoka họ ideti na evaọ ukeledẹ mai jẹ m’omaa re ma jariẹ evaọ etoke ọruẹrẹfihotọ okokohọ na kpobi. Ma ti wo eghale nọ e rẹ jọ bẹdẹ bẹdẹ nọ ma be roma mai kpotọ kẹ Jihova bẹdẹ bẹdẹ na.