Ọruẹrẹfihotọ Okokohọ Okogho Ọkpokpọ
Otofa ọ ozodhẹ jọ họ “adhẹẹ egagọ gbe adhẹẹ odidi, maero rọkẹ Ọghẹnẹ.” Onana u dhesẹ uvi ozodhẹ nọ a jọ Ikereakere na ta kpahe wọhọ “emuhọ areghẹ” na. (Ol. 111:10) Wo ohẹriẹ, oghẹrẹ ozodhẹ ofa jọ o dafia evaọ akpọ Setan nọ ọ wariẹ omai họ na. Ẹvẹ ma sae rọ whaha oghẹrẹ iroro ethọthọ eyena nọ ma be bọ ozodhẹ egagọ orọ Jihova na? Ọruẹrẹfihotọ okokohọ okogho ọkpokpọ rọkẹ ukpe 2002 na o k’uyo onọ onana. Uzoẹme na họ “Dhozọ Ọghẹnẹ jẹ Rehọ Oruaro Kẹ E.” (Evia. 14:7) Ma ti wo otoriẹ idhere buobu nọ ozodhẹ Jihova o rẹ rọ k’omai omomọvo gbe ukoko na soso erere.
Dede nọ ozodhẹ o sai dhesẹ awa-ọruọ hayo ababọ udu gbe oma usikpemu re a rẹriẹ ovao ku uyero obẹbẹ, Ebaibol na ọ ta nọ: “Oghale u te ahwo kpobi nọ a be dhẹozọ ỌNOWO.” (Ol. 128:1) Ọruẹrẹfihotọ okokohọ na o ti dhesẹ k’omai epanọ ma sai ro yerikugbe use-abọ egagọ uzẹme avọ obokparọ. Ma te ruẹ epanọ ma re ro fiobọhọ kẹ ahwo ọkpokpọ re a bọ uvi ozodhẹ Ọghẹnẹ utioye na, onọ o rẹ ghinẹ wọ ae gwọlọ gọe avọ udu, ẹwẹ, iroro, gbe ogaga ra kpobi. (Mak 12:30) Ẹdẹ ọsosuọ na o ti kuhọ avọ ẹme ọsẹro ubrotọ na “Si Kẹle Ahwo nọ Who You Kpekpe Viere.” O ti dhesẹ epanọ ma re ro muẹrohotọ kẹ omodawọ Ẹdhọ re o si omai no abọ Jihova, uviuwou mai, gbe inievo Ileleikristi mai.
Uzoẹme ọzọhọkugbe-eriariẹ abane jọ evaọ ẹdẹ avivẹ na họ “Dhozọ Jihova, Orọnikọ Ahwo-Akpọ Họ.” U ti dhesẹ oware nọ o soriẹ gbe oghẹrẹ nọ ma rẹ rọ kparobọ vi ozodhẹ kpobi nọ o rẹ whaha omai erugba odibọgba mai vọvọ hayo ẹyọrọ ẹgbakiete gbe emamọ iroro-oziẹbro evaọ isukulu gbe evaọ oria iruo. Ovuẹ ogbotu na “Dhozọ Ọghẹnẹ re Who Koko Ijaje Riẹ” u no eware othotha nọ a dhesẹ evaọ Eviavia uzou avọ 14 ze. Okokohọ okogho na o ti kuhọ avọ ọkpọvio uduotahawọ re ma “Gbẹ Hae Nya Evaọ Ozodhẹ Jihova.”
Isukulu Odibọgba Esuo-Ọghẹnẹ na, Ewuhrẹ Odibọgba oriruo, ẹme ame-ọhọ, gbe orukpẹre ọ Uwuhrẹ Uwou-Eroro na yọ igogo eme efa ọruẹrẹfihotọ na nọ whọ te gwọlọ nọ i vo owhẹ hẹ. Zizie emọ-uwuhrẹ Ebaibol ra re a lele owhẹ nya. Ahwo kpobi nọ a gwọlọ họ-ame a rẹ kake ta kẹ ọsẹro ukoko na. Mai kpobi ma te gwọlọ dhesẹ uvi ozodhẹ Jihova jẹ rehọ oruaro kẹe ẹkwoma uvumọ abọ ọruẹrẹfihotọ obọdẹ ọnana nọ o re vo omai hi!