Dhozọ Jihova Ẹdẹ Okikpo
1 “Ozọodhe kẹ ỌNOWO họ emuhọ areghẹ.” (Ol. 111:10) O rẹ w’omai ru emamọ iruo je fiobọhọ k’omai sioma no oware uyoma. (Itẹ 16:6) Ozodhẹ nana yọ adhẹẹ odidi kẹ Ọnọma omai, nọ o rẹ w’omai whaha eva nọ ma re ru dhae gbe aghẹmeeyo kẹe. O rọ oware nọ u fo nọ ma re wo je dhesẹvia ẹdẹ okikpo.—Itẹ 8:13.
2 N’ẹdẹ ruọ ẹdẹ, ẹzi akpọ Setan o bi tunyẹ omai gaga re ma kie lele idhere imuomu riẹ. (Ẹf. 6:11, 12) Oma-iwo sebaẹgba mai o vọ avọ uzioraha yọ u re siuru oware uyoma. (Gal. 5:17) Fikiere, re ma yoẹme kẹ ijaje Jihova, wereva, je wo uzuazọ, ma rẹ dhozọ riẹ ẹdẹ okikpo.—Izie. 10:12, 13.
3 Eva Ahwo Hibru 10:24, 25, a tuduhọ omai awọ re ma kokohọ re ma tuduhọ ohwohwo awọ ‘vi epaọ anwẹdẹ’ evaọ etoke ọnana nọ ma be rria na. Iwuhrẹ enya kẹse kẹse o r’oja otẹrọnọ ma rẹ zọ vrẹ edẹ urere enana. Ozodhẹ ọ eva nọ ma re ru dha Ọghẹnẹ o rẹ wọ omai re ma kpohọ iwuhrẹ je riwi ẹjiroro rai ghaghae. Enọ e rẹ dhozọ Ọghẹnẹ a re rri abọ-owo evaọ iwuhrẹ Ileleikristi wọhọ uvẹ-ọghọ ofuafo.
4 Ẹmeoyo kẹ uzi na re ma whowho emamọ usi orọ Uvie na yọ edhere ọfa nọ ma re ro dhesẹ ozodhẹ mai kẹ Ọghẹnẹ via. (Mat. 28:19, 20; Iruẹru 10:42) Ute ọsosuọ orọ iruo usiuwoma ota mai họ re ma fiobọhọ kẹ amọfa wo ozodhẹ kẹ Jihova jẹ roma kpotọ kẹ oreva riẹ. Ma re ru onana gba ẹkwoma izihebro, omodawọ re ma mu ebe iwuhrẹ Ebaibol họ, je wuhrẹ amọfa kpahe ijaje Ọghẹnẹ kpobi. Evaọ ere oruo yọ ma bi dhesẹ ozodhẹ mai kẹ Jihova gbe uyoyou mai kẹ ọrivẹ via.—Mat. 22:37-39.
5 Enọ e be dhozọ Ọghẹnẹ hẹ a rẹ sai wo ovuhumuo kẹ eware abọ-ẹzi hi, yọ a re kie kẹ ofou enwoma akpọ na, hayo oghẹrẹ uruemu riẹ. (Ẹf. 2:2) Jọ ọtamuo mai o jọ re ma “gọ uvi egagọ nọ i re je Ọghẹnẹ miẹ, avọ enuho gbe ọwhewhe.” (Hib. 12:28) Ma vẹ rọ ere vu eghale ahwo nọ e rẹ dhozọ Jihova ẹdẹ okikpo.