Ruẹrẹ Odhesẹvia Emagazini Obọra Họ
1 Ma vuhu aghare emagazini ọ Uwou-Eroro Na gbe Awake! kẹ izoẹme ovuẹ ẹruoke rai mu, nọ i duobọhọ eware kpobi no eme akpọ rite “eware ididi Ọghẹnẹ.” (1 Kọr. 2:10) Mai kpobi ma rẹ kareghẹhọ eware ọbọga gbe ekpokpọ nọ ma se evaọ ebe enana, nọ Jihova o bi ro rovie ẹnyaharo uzẹme via na. (Itẹ 4:18) Ma gwọlọ nọ ma re muọwhọ re ma ghale ae kẹre te epanọ o rẹ lọhọ te.
2 Riwi Ẹkwotọ Ra Wariẹ: Oghẹrẹ ahwo vẹ e be rria ẹkwotọ ra? Otẹrọnọ edhere uzuazọ rai yọ onọ a rẹ jọ varioma, whọ rẹ sae ruẹrẹ odhesẹvia ọkpẹkpẹ họ nọ u re dhobọ te ugogo-ẹme na. Otẹrọnọ whọ be rria ẹkwotọ nọ ahwo a rẹ jọ varioma ha, whọ rẹ sae t’ẹme buobu. Otẹrọnọ ahwo iviuwou buobu a re ruiruo evaọ oke uvo, who re wo emamọ obokparọ nọ who te kpohọ iwou rai okenọ ọre o te bi kiediwi hayo evaọ owọwọ. Whọ rẹ sae nyaku ahwo jọ evaọ oke uvo ẹkwoma isẹri ise iyẹrẹ hayo n’uye-eki ruọ uye-eki. Iwhowho-uvie jọ a re wo emamọ erere ẹkwoma ẹnyabru ahwo nọ e rọ oria nọ imoto e rẹ kpahe gbe oria nọ a rẹ jọ dẹ epẹtrol.
3 Riẹ Eme nọ Erọ Emagazini na Eva: Se ukere ọvuọvo nọ o tẹ nwani te owhẹ obọ no. Salọ izoeme nọ who roro nọ i ti si ahwo nọ e rọ ẹkwotọ ra urru. Izoeme vẹ i kpoma họ ae? Gwọlọ uzedhe ibi-eme nọ whọ rẹ sae wariẹ no ukere nọ whọ gwọlọ fihọ ada na ze. Roro kpahe onọ nọ whọ rẹ sae rọ kpare isiuru. Salọ ikereakere nọ u fo nọ whọ rẹ sai se kẹ ọnọ o wo uwou na nọ who te wo uvẹ nọ who re ro ru ere. Roro kpahe epanọ whọ sai ro ru ọruẹrẹfihotọ kẹ ozihebro.
4 Ruẹrẹ Eme Emuhọ Ra Họ: Rehọ oma totọ salọ eme nọ whọ ma-oma nọ who ti ro dhesẹ oma ra je mu ẹmeọta họ. Ahwo jọ a ruẹ obokparọ no avọ ẹme emuhọ ọnana: “Me se uzoẹme awere jọ no evaọ emagazini ọnana, yọ mẹ gwọlọ ghale iẹe kugbe amọfa.” Ahwo buobu a rẹ rehọ onọ nọ o riobọhọ ugogo-ẹme nọ a gwọlọ ro ruiruo na muhọ. Wọhọ oriruo:
5 Otẹrọnọ who bi fielo họ uzoẹme ọ emuemu nọ o da eria kpobi fia, whọ rẹ sae nọ inọ:
◼ “Eme o rẹ rehọ re ma sae wezẹ evaọ aso ababọ ozodhẹ iji hayo enwoma?” Dhesẹ nọ who wo evuẹ jọ kpahe ifue ẹbẹbẹ ọnana. Ifue na u ti si oghoghẹrẹ ozighi uyerakpọ efa no kẹle re. Rovie kpohọ ẹme jọ evaọ emagazini na nọ o kẹ ẹruore otiọye na jẹ tudu họ ohwo na awọ re o vi emagazini na evaọ ẹgbukpe eva unu ọ azọhọ riẹ. Okenọ who te zihe, whọ rẹ sae si iroro ọnọ o wo uwou na kpohọ uzou 1 evaọ obe ọ Eriariẹ na.
6 Okenọ who te bi fi ukere kpahe uzuazọ uviuwou họ ada, whọ rẹ sae ta onana:
◼ “Esẹ gbe ini buobu a ruẹ nọ o rọ use-abọ ulogbo re a yọrọ emọ evaọ edẹ enana. A kere ebe buobu kpahe ẹme ọnana no, rekọ makọ ewena dede a rọwo kugbe ohwohwo ho. Kọ ohwo jọ ọ riẹ nọ ọ rẹ sae kẹ ọkpọvio ọgbagba?” Dhesẹ uzedhe ọkpahefihọ no emagazini na ze nọ u dhesẹ uthubro areghẹ nọ a re duku evaọ Ebaibol na. Ru re o vi emagazini na. Otẹrọnọ ọ rẹ sai vi hi, fi emagazini họ ada eva unu azọhọ rai. Okenọ who te kpohọ ozihebro, t’ẹme kpahe ẹjiroro Ikereakere na kpahe ẹyọrọ emọ nọ a fodẹ evaọ obe ọ Eriariẹ na, ewẹ-obe 145-148.
7 Nọ who te bi dhesẹ uzoẹme kpahe ẹbẹbẹ uyerakpọ, whọ rẹ sae ta nọ:
◼ “Ahwo buobu a rọ otọ otunyẹ fiki etoke idhọvẹ nọ ma be rria. Kọ who roro nọ orọ ẹjiroro Ọghẹnẹ re ma rria evaọ edhere ọnana?” Riobọhọ uzoẹme nọ u dhesẹ epanọ a re ro thihakọ ebẹbẹ inẹnẹ hayo nọ o kẹ ẹjiroro nọ a re ro riwi kpohọ obaro nọ o kare awaruọ. Kẹsena who ve ru ohwo na vi emagazini. Otẹrọnọ ọ sai vi hi, fi emagazini họ ada eva unu azọhọ rai. Evaọ iweze notha ra, t’ẹme kpahe ifoto gbe ẹme nọ a kere fihiẹe evaọ ewẹ-obe 4-5 ọrọ obe Eriariẹ na, who ve su ei ovavo kpohọ obe uwuhrẹ Ebaibol.
8 Nwene Lele Ọnọ O Wo Uwou Na: Whọ rẹ te nyaku ahwo nọ a wo oghoghẹrẹ isiuru gbe oria-ẹria. Ruẹrẹ odhesẹvia nọ o mai wuzou nọ whọ rẹ sae nwene kẹ ọnọ o wo uwou ọvuọvo. Ruẹrẹ oma họ re whọ sai nwene ẹme nọ whọ te ta kẹ ọzae, aye, ọkpako, hayo uzoge. Uzi ọgbahọ o riẹ kpahe ẹme nọ whọ rẹ ta hrọ họ. T’ẹme nọ u kiehọ owhẹ oma kpobi nọ o rẹ wha erere ze. Ghele, jọ jajaja, t’ẹme no udu ze, jẹ gaviezọ ziezi. Ahwo nọ a ‘wo eva ezi’ a ti muẹrohọ ọriẹruo ra yọ a te k’ezọ ziezi re.—Iruẹru 13:48.
9 Fiobọhọ kẹ Ohwohwo: Ẹkwoma iroro jẹ kugbe ohwohwo, ma re wuhrẹ idhere kpokpọ nọ ma rẹ rọ t’ẹme. Ma te bi wuhrẹ odhesẹvia mai kugbe o rẹ k’omai orimuo gbe uduowha. (Itẹ 27:17) Otẹrọnọ who dhe ẹme nọ whọ be te ta ẹwẹwariẹ, ẹwẹ ra o re t’otọ evaọ unuẹthẹ na. O r’oja re esẹ gbe ini a ru uvẹ ro fiobọhọ kẹ emọ rai ruẹrẹ oma họ, gaviezọ evaọ oke nọ a bi wuhrẹ odhesẹvia rai, a vẹ jẹ kẹ ezọhọfihọ rọkẹ ẹnyaharo. Ahwo kpokpọ a sai wo erere ẹkwoma iruo ru kugbe iwhowho-uvie nọ e mai wo eriariẹ.
10 Oma ruẹrẹhọ obọra kẹ odhesẹvia emagazini o rẹ jọ gaga ha. Wo uzedhe oware jọ họ iroro nọ whọ rẹ t’ẹme kpahe whọ vẹ tae evaọ edhere isiuru. Avọ owojẹ gbe eroro kparo, whọ rẹ sae ruẹrẹ emamọ odhesẹvia nọ a re dede rehọ fihọ.
11 Ẹghale emagazini yọ edhere ọsosuọ jọ nọ ma rẹ rọ vaha ovuẹ Uvie na vọ akpọ-soso. Otẹrọnọ whọ rẹ sae fi Uwou-Eroro Na gbe Awake! họ abọ ahwo evezi, emagazini na e rẹ sae t’ẹme na kẹ ai. Hẹ kareghẹhọ aghare rai ẹsikpobi gbe epanọ ovuẹ rai o sai ro siwi izuazọ. Oghẹrẹ ọ ‘ewoma o ruo gbe ẹghale eware kugbe amọfa’ otiọna o rẹ were Jihova gaga.—Hib. 13:16.