Wo Udu Re Who Ru Izihebro

¹ Kọ whọ rẹ reawere eruo izihebro? Iwhowho-uvie buobu e rẹ reawere riẹ. O sae jọ nọ ozọ u je mu owhẹ eva oke ọsosuọ, maero nọ who te bi zihe bru ahwo nọ i wo uwou nọ i dhesẹ emamọ isiuru hu evaọ okenọ a kake nyaku ai. Rekọ nọ who bi ‘wo udu ẹkwoma Ọghẹnẹ mai re whọ ta emamọ usi na’ evaọ izihebro na, o sai gbe owhẹ unu re whọ ruẹ epanọ o lọhọ te gbe epanọ iruo nana i re wo osaohwa te. (1 Tẹs. 2:2) Evaọ oghẹrẹ vẹ?

² Evaọ uzẹme, ohẹriẹ o riẹ gaga evaọ udevie ozihebro avọ iweze ọsosuọ. Ogbẹrioma a re zihe bru, orọnikọ ọrara ha, yọ o rẹ jọ lọlọhọ re a t’ẹme kugbe ogbẹrioma vi ọrara. Rọkẹ emamọ osaohwa nọ u re no iruo nana ze, ozihebro rẹ sai su kpohọ iwuhrẹ Ebaibol nọ u re w’ẹvi.

³ Okenọ ma te bi ruiruo n’uwou ruọ uwou, ma rẹ zoma nyabru ahwo nọ a wo isiuru hu evaọ okenọ ma kake weze bru rai. Kọ, fikieme ma je zihe kẹse kẹse? Ma vuhumu nọ eyero ahwo o re nwene gbe ohwo nọ ọ jọ ababọ-isiuru hayo tubẹ jẹ wọso dede evaọ iweze ọsosuọ ọ sai wo isiuru evaọ oke ọfa nọ ma te zihe. Ma te wo oyena họ iroro, ma rẹ ruẹrẹ oma kpahe ziezi jẹ lẹ kẹ oghale Jihova re ẹme nọ ma te ta enẹna o ruẹse were ahwo na.

⁴ Otẹrọnọ, evaọ iruo n’uwou ruọ uwou mai, ma rehọ unevaze ta usiuwoma kẹ ahwo nọ i dhesẹ isiuru vẹre vievie he, kọ u gbe fo re ma rehọ unevaze zihe bru ohwo kpobi nọ o dhesẹ isiuru jọ kpahe ovuẹ Uvie na?—Iruẹru 10:34, 35.

⁵ Ibuobu mai e rọ ukoko na nẹnẹ fikinọ owhowho-uvie jọ ọ rehọ odiri zihe bru omai. Otẹrọnọ whẹ yọ omọvo ahwo enana, whọ rẹ sae nọ omobọ ra nọ: ‘Didi uruemu mẹ kaki dhesẹ kẹ owhowho-uvie ọyena? Kọ mẹ nwani dede ovuẹ Uvie na rehọ ovavo evaọ oke ọsosuọ nọ me yoi? Kọ o sae jọ nọ me dhesẹ ababọ-isiuru?’ U fo nọ eva e rẹ were omai inọ owhowho-uvie nọ o zihe ze na o vuhu omai mu nọ ma te kẹ ezihebro je ‘wo udu ẹkwoma Ọghẹnẹ,’ o te zihe ze, o te mu omai họ ewuhrẹ kpahe uzẹme na. Kọ ẹvẹ kpahe ahwo nọ a dhesẹ isiuru evaọ oke ọsosuọ rekọ uwhremu na a te bi siuke kpemu? Irẹro ewoma o r’oja, wọhọ epanọ iku obotọ na u dhesẹ.

⁶ Okenọ a je sisẹri iyẹrẹ evaọ ohiohiẹ jọ, iwhowho-uvie ivẹ a tẹ nyaku aye jọ avọ ọmọ riẹ. Aye na ọ tẹ rehọ emagazini je zizie isẹri na re a nyaze uwou riẹ evaọ Ẹdoka nọ u lele i rie. A te etẹe evaọ oke nọ a fihọ, rekọ ọnọ o wo uwou na ọ tẹ vuẹ ai nọ o wo uvẹ nọ ọ te rọ t’ẹme he. Rekọ ọ yeyaa nọ ọ te jariẹ evaọ oka nọ o kẹle riẹ. Inievo emetẹ na a wo avro sọ o ti koko oke na, rekọ aye na ọ jẹ hẹrẹ ae evaọ okenọ a zihe. A te mu uwuhrẹ họ, yọ ẹnyaharo aye na o jọ oware igbunu. Evaọ umutho oke, o te mu iwuhrẹ họ ẹnya kẹse kẹse je bi w’abọ evaọ iruo usiuwoma ota na. Ọ họ-ame no enẹna.

⁷ Ru Otọhotọ Evaọ Iweze Ọsosuọ: Otọhotọ kẹ ozihebro obokparọ a re ru ei ẹsibuobu evaọ iweze ọsosuọ na. Gaviezọ ziezi kẹ eme ọkpahe-fihọ ọnọ o wo uwou na. Eme a ta k’owhẹ? Kọ o wo isiuru kpahe egagọ? Ọ be ruawa kpahe eware uyerakpọ? O wo isiuru kpahe otọkiẹ-eriariẹ? ikuigbe? okegbe na? Evaọ ukuhọ iweze na, whọ rẹ sae nọ onọ nọ u re dhobọ te iroro riẹ jẹ yeyaa nọ whọ te kẹ uyo onọ na no Ebaibol ze okenọ who te zihe ze.

⁸ Wọhọ oriruo, otẹrọnọ ọnọ o wo uwou na o wo isiuru kpahe eyaa Ebaibol ọrọ otọakpọ aparadase, o rẹ sai fo re a gbẹ t’ẹme haro kpahe uzou-ẹme ọyena. Taure whọ tẹ te nya vrẹ, whọ rẹ sae nọ inọ: “Ẹvẹ o sai ro mu omai ẹro nọ Ọghẹnẹ o ti ru eyaa ọnana gba?” Who ve fibae nọ: “Ẹsejọhọ mẹ te wẹriẹ nọ ahwo uviuwou edekọ a tẹ rọ uwou, me ve ti dhesẹ uyo onọ onana no Ebaibol ze k’owhẹ.”

⁹ Otẹrọnọ ọnọ o wo uwou na o ri dhesẹ isiuru kpahe uzedhe uzoẹme ọvo ho, whọ rẹ sae nọ onọ jọ nọ a nọ evaọ idhesẹvia nọ e rọ uke ọ Odibọgba Uvie Mai na whọ vẹ rehọ oyena ruiruo wọhọ ehri ẹmeọta ra evaọ oke ọfa.

¹⁰ Sẹro Okerefihotọ Ọgbagba: Okerefihotọ n’uwou ruọ uwou ra o rẹ jọ gbagba jẹ gb’unu. Kere odẹ gbe adrẹse ọnọ o wo uwou na fihọ otọ nọ whọ tẹ nwani no uwou na no. Who mu roro inọmba uwou hayo odẹ iyẹrẹ na ha—kiẹ ovuẹ na riwi re u mu owhẹ ẹro nọ o rọ gbagba. Kere epanọ ohwo na ọ rọ. Kere uzoẹme nọ wha t’ẹme kpahe, ikereakere nọ wha se, obe kpobi nọ whọ nyase ba, gbe onọ nọ whọ te k’uyo riẹ nọ who te zihe. Ku ẹdẹ gbe oke iweze ọsosuọ na gbei gbe okenọ whọ ta nọ who ti ro zihe. Enẹna nọ okerefihotọ ra ọ gba no na, who ku ei fiẹ hẹ! Fi ei họ emamọ oria re whọ sai rovie kpohiẹe oke ọfa. Hai roro kpahe ohwo na gbe epanọ who ti ro ru ozihebro na oke ọfa.

¹¹ Riẹ Oware nọ Ẹjiroro Ra O Rọ: Orọ ọsosuọ, ẹkwoma omosasọ avọ oma ogbẹnyusu, daoma ra kpobi re who ru udu ọnọ o wo uwou na t’otọ. Dhesẹ nọ who wo isiuru kpahiẹe, rekọ whọ nọ enọ hrọ họ. Ofariẹ, kareghẹhọ iẹe kpahe enọ nọ whọ nọ evaọ iweze ọsosuọ ra. Gaviezọ ziezi kẹ iroro riẹ, je yere ei kẹ ọkpahe-fihọ riẹ. Kẹsena, who ve dhesẹ oware nọ eriwo Ebaibol u je w’iruo. O tẹ lọhọ, kpọ iroro riẹ kpohọ oghẹrẹ eme evo na evaọ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na. Woi họ iroro ziezi nọ uzedhe ẹjiroro ra kẹ izihebro họ re who mu uwuhrẹ Ebaibol họ.

¹² Ẹliọliọ obe Eriariẹ na o kẹ omai ẹgba buobu no re ma “wo udu” evaọ iwuhrẹ Ebaibol jẹ tudu họ emọ-uwuhrẹ awọ re a kpohọ iwuhrẹ ukoko jẹ nyusu kugbe ukoko Jihova. Evaọ oke nọ u kpemu, ma jẹ hae hẹrẹ bẹsenọ ohwo na o re wuhrẹ evaọ etoke jọ taure ma te zizie ai re a nyusu kugbe omai. Enẹna, emọ-uwuhrẹ buobu a bi kpohọ iwuhrẹ ukoko nọ a tẹ nwani muhọ ewuhrẹ no, yọ a be mae nyaharo vẹrẹ fiki oyena.

¹³ Imava-orọo jọ a ta usiuwoma ọnyakuo kẹ ibe-oruiruo jọ. Okenọ o dhesẹ isiuru kẹ uzẹme na, a te zizie ei re o mu uwuhrẹ Ebaibol họ evaọ obe Eriariẹ na. Eva oke ovona, a vuẹ riẹ nọ u fo re o kpohọ iwuhrẹ, oria nọ a te jọ k’iyo enọ riẹ buobu. U no ọzae na eva ze orọnikọ re ọ jẹ uzizie rai rehọ re o wuhrẹ ọvo ho rekọ o je wuhrẹ isiava ẹkpoka o te je mu iwuhrẹ ukoko họ ẹnya evaọ obọ Ọgwa Uvie na.

¹⁴ Rehọ Ibroshọ na Eme Ọghẹnẹ Ọ Gwọlọ Mi Omai? Ruiruo: Eva Okokohọ Ubrotọ “Ewhovuẹ Udhedhẹ Ọghẹnẹ” na, ibroshọ na Eme Ọghẹnẹ Ọ Gwọlọ Mi Omai? u t’omai obọ. Ibroshọ ọnana o w’iruo evaọ emuhọ iwuhrẹ Ebaibol kugbe ahwo nọ e rẹ dhẹozọ Ọghẹnẹ makọ epanọ a riẹ obe te dede. Eware ididi e riẹ eva, nọ i kugbe iwuhrẹ Ebaibol nọ i wuzou. Obe na o te jọ okwakwa nọ u w’ẹgba gaga nọ a rẹ rọ kẹ eriariẹ Ọghẹnẹ. U dhesẹ uzẹme na vevẹ gaga jẹ lọhọ te epanọ unwenọ ahwo kpobi a sae rọ rehọ iẹe ruiruo ro wuhrẹ amọfa kpahe ẹgwọlọ Ọghẹnẹ. Otiẹsejọ, iwhowho-uvie buobu a ti wo uvẹ nọ a rẹ rọ rehọ ibroshọ nana ru uwuhrẹ Ebaibol.

¹⁵ Ahwo jọ nọ a roro nọ a ti wo oke nọ a re ro wuhrẹ obe Eriariẹ na ha o rẹ sai no ai eva ze re a wo uwuhrẹ ọkpẹkpẹe evaọ ibroshọ Ọghẹnẹ Ọ Gwọlọ na. Oware nọ a ti wuhrẹ u ti gbe ai unu! Evaọ ewẹ-obe ivẹ hayo esa ọvo, a ti duku iyo kẹ enọ nọ ahwo a rehọ ikpe udhusoi buobu roro kpahe no: Ono họ Ọghẹnẹ? Ono họ Ẹdhọ na? Eme họ ẹjiroro Ọghẹnẹ kpahe otọakpọ na? Eme họ Uvie Ọghẹnẹ? Ẹvẹ whọ sai ro duku egagọ uzẹme na? Dede nọ ibroshọ na o rehọ eme elọlọhọ dhesẹ uzẹme na, ovuẹ riẹ u w’ẹgba gaga. Eme nọ i wuzou nọ ekpako a rẹ rọ kiẹ kugbe ahwo nọ e be te họ-ame e riẹ eva yọ o rẹ sae jọ wọhọ okwakwa ọsosuọ kẹ ewuhrẹ obe Eriariẹ na.

¹⁶ Re whọ sai dhesẹ uwuhrẹ evaọ ozihebro, whọ rẹ sae ta lọlọhọ nọ: “Kọ whọ riẹ nọ ẹkwoma efihiruo umutho iminiti jọ, whọ rẹ sai wo uyo kẹ onọ Ebaibol jọ nọ u wuzou?” Kẹsena, whọ vẹ nọ onọ jọ nọ o roma via evaọ emuhọ uwuhrẹ na jọ evaọ ibroshọ na. Wọhọ oriruo, otẹrọnọ who bi weze bru ohwo nọ ọ kpako no, whọ rẹ sae ta nọ: “Ma riẹ nọ evaọ oke nọ u kpemu Jesu o je siwi ahwo. Rekọ evaọ obaro, eme Jesu o ti ru kẹ enọ e be mọ? ekpako? iwhuowhu?” A re duku iyo na evaọ uwuhrẹ avọ 5. Onọ onana o rẹ sae jaja ohwo nọ o wo isiuru kpahe egagọ oma: “Kọ elẹ kpobi Ọghẹnẹ ọ rẹ gaviezọ kẹ?” A k’uyo riẹ evaọ uwuhrẹ avọ 7. Ahwo uviuwou a te gwọlọ riẹ: “Eme Ọghẹnẹ ọ gwọlọ mi eyewọ gbe emọ?” A re duku ei nọ a te wuhrẹ uwuhrẹ avọ 8 na. Enọ efa họ: “Kọ iwhuowhu na e sae nwa enọ e be rria uzuazọ oma?” onọ a dhesẹ evaọ uwuhrẹ avọ 11; “Fikieme egagọ buobu e jẹ riẹ nọ i bi se oma rai Ileleikristi?” onọ a t’ẹme kpahe evaọ uwuhrẹ avọ 13; gbe “Eme who re ru hrọ re whọ sae jọ ogbẹnyusu Ọghẹnẹ?” onọ a t’ẹme te evaọ uwuhrẹ avọ 16.

¹⁷ Fiobọhọ Kẹ Ahwo nọ A Rẹ Ta Ẹvẹrẹ Ọfa: Kọ ẹvẹ kpahe enọ i wo uwou nọ e rẹ ta ẹvẹrẹ ọfa? O tẹ lọhọ, u fo re a wuhrẹ ai evaọ ẹvẹrẹ nọ a mae riẹ. (1 Kọr. 14:9) Ma re muẹrohọ odẹ gbe adrẹse ahwo yena jẹ ruẹrẹhọ kugbe owhowho-uvie ọnọ ọ rẹ ta ẹvẹrẹ rai re o zihe je ru uwuhrẹ Ebaibol kugbe ai. Otẹrọnọ ikoko hayo itu itieye na e kẹle he yọ iwhowho-uvie nọ e rẹ sae ta ẹvẹrẹ ọnọ o wo uwou na e riẹ hẹ, owhowho-uvie na ọ rẹ sae daoma wuhrẹ kugbe ọnọ o wo uwou na, ọ vẹ rehọ ibroshọ Ọghẹnẹ Ọ Gwọlọ evaọ evẹrẹ ivẹ na ruiruo.

¹⁸ Owhowho-uvie nọ ọ rẹ ta Oyibo o mu uwuhrẹ họ kugbe ọzae jọ nọ ọ rẹ ta Vietnamese gbe aye riẹ, ọnọ ọ rẹ ta Thai. Ebe gbe Ebaibol Oyibo, Vietnamese, gbe Thai a je wuhrẹ. Dede nọ obrudhe ẹvẹrẹ o wha ẹbẹbẹ ze evaọ oke ọsosuọ, owhowho-uvie na o kere nọ: “Ẹnyaharo ẹzi imava-orọo na o vẹrẹ gaga. A ruẹ epanọ u wuzou te no re a kpohọ iwuhrẹ ukoko kugbe emọ ivẹ rai, yọ a bi se Ebaibol k’aso k’aso wọhọ uviuwou. Ọmọtẹ ikpe ezeza rai o wo ebe uwuhrẹ Ebaibol obọ riẹ nọ o bi wuhrẹ.”

¹⁹ Okenọ who te bi wuhrẹ kugbe ohwo nọ ọ rẹ ta ẹvẹrẹ ọfa, t’ẹme ẹmẹrera, ta ẹme vevẹ, jẹ ta eme elọlọhọ. Woi họ iroro nọ u fo re a kẹ ahwo nọ a rẹ ta ẹvẹrẹ ọfa ọghọ. A re ru ai wọhọ ẹsenọ a rọ emefofa ha.

²⁰ Rehọ ifoto iwowoma nọ e rọ ibroshọ Ọghẹnẹ Ọ Gwọlọ na ru emamọ iruo. Otẹrọnọ “ifoto ọvo ọ rẹ ta odu eme,” ifoto buobu nọ e rọ ibroshọ na e te kẹ ọnọ o wo uwou na evuẹ buobu. Zizie ei re o se ikereakere na evaọ Ebaibol obọ riẹ. Otẹrọnọ a rẹ sai ru uwuhrẹ na evaọ okenọ ohwo uviuwou na nọ ọ riẹ Oyibo ọ rẹ rọ jariẹ re ọ fa otọ eme na, ababọ avro onana o rẹ kẹ erere.—Rri Odibọgba Uvie Mai, July 1984, ẹwẹ-obe avọ 8 (ọrọ Oyibo).

²¹ Ru Izihebro Ababọ Okioraha: Ẹvẹ whọ rẹ hẹrẹ te taure who te ru ozihebro? Iwhowho-uvie jọ a re zihe evaọ udevie ẹdẹ ọvo hayo ivẹ nọ iweze ọsosuọ o tẹ vrẹ no. Amọfa a re zihe oke ofa evaọ ẹdẹ ọvona! Kọ oyena o vẹrẹ hrọ? Ahwo buobu a rẹ daezọ họ. Ẹsibuobu owhowho-uvie nọ o bi zihe na họ ọnọ o re wo irẹro ewoma avọ umutho aruọwha. Roro kpahe eware enana nọ e via na.

²² Owhowho-uvie ikpe 13 jọ o je ruiruo n’uwou ruọ uwou ẹdẹ jọ ọ tẹ ruẹ eyae ivẹ nọ e be nyusu kugbe. Nọ ọ kareghẹhọ uduotahawọ nọ a kẹ nọ ma ta usiuwoma kẹ ahwo evaọ oria kpobi nọ ma jọ rue rai, ọ tẹ nyabru eyae na evaọ iyẹrẹ na. A dhesẹ isiuru kpahe ovuẹ Uvie na, yọ omomọvo ọ tẹ rehọ obe Eriariẹ na. Oniọvo ọmọzae ọboba na ọ tẹ rehọ adrẹse rai, o te zihe nọ edẹ ivẹ e vrẹ no, je mu uwuhrẹ Ebaibol họ kugbe ai omomọvo.

²³ Oniọvo ọmọtẹ jọ ọ tẹ ruẹrẹhọ re ọ wariẹ zihe evaọ oka nọ o kẹle riẹ. Rekọ ẹdẹ ọvo hayo ivẹ e vrẹ no nọ o ro ru iweze ọsosuọ, ọ tẹ wẹriẹ re ọ kẹ ọnọ o wo uwou na emagazini kpahe uzoẹme nọ a kake t’ẹme te vẹre. Ọ tẹ ta kẹ ọnọ o wo uwou na nọ: “Mẹ ruẹ uzoẹme ọnana me te roro nọ whọ te gwọlọ sei. Mẹ te sae dikihẹ t’ẹme obọnana ha, rekọ me ti zihe ze evaọ uvo Edesa-Oka wọhọ epanọ ma gbẹ ta. Kọ oke oyena u gbe kiehọ owhẹ oma?”

²⁴ Okenọ ohwo jọ o te dhesẹ isiuru kẹ uzẹme na, o rẹ sai mu omai ẹro nọ ọ te nyaku ọwọsuọ evaọ edhere jọ. Ẹkaki zihe mai nọ iweze ọsosuọ mai o tẹ vrẹ no o rẹ kẹe ẹgba dadamu kẹ otunyẹ kpobi nọ o rẹ rẹriẹ ova dhei no obọ imoni, egbẹnyusu ekpekpe, gbe amọfa ze.

²⁵ Bọ Isiuru Ahwo nọ A Ruẹ Evaọ Ẹgbede Ga: O rẹ were ibuobu mai re ma ta usiuwoma evaọ iyẹrẹ, oria nọ imoto e rẹ kpahe, evaọ ofa-edhere ogbotu, evaọ oria eki, evaọ ogege-arozaha, gbe eria efa. Fiba ebe nọ a re fihọ ada, o gwọlọ nọ ma rẹ bọ isiuru. Evaọ ẹjiroro ọyena, u re fo re ma kere odẹ, adrẹse gbe, o tẹ lọhọ, inọmba ifonu ọ ohwo kpobi nọ o wo isiuru nọ ma nyaku fihọ otọ. Re a wo evuẹ enana o ga te epanọ ma re roro ho. Nọ ẹmeọta na o bi te ekuhọ na, rehọ obe ekere ra ze jẹ nọ inọ: “Kọ edhere jọ ọ rọ nọ ma sae rọ t’ẹme ọnana haro evaọ oke ọfa?” Hayo ta nọ: “Mẹ gwọlọ nọ who se uzoẹme jọ nọ u mu omẹ ẹro nọ u ti si owhẹ urru. Kọ mẹ sae rehọ iẹe ze obọ uwou hayo ọfisi ra?” Oniọvo jọ ọ nọ inọ: “Inọmba ifonu vẹ a rẹ rọ t’ẹme kugbe owhẹ?” Ọ niyẹrẹ nọ evaọ emerae esa eva e were rai kpobi re a kẹ inọmba ifonu rai ajokpa imasa ọvo.

²⁶ Rehọ Ifonu Gwọlọ jẹ Bọ Isiuru: Oniọvo ọmọtẹ ọkobaro jọ ọ rehọ ifonu nyate ahwo nọ e rẹ rria iwou nọ a diogba ilogbo wariẹ họ. Ọ rẹ rehọ edhere ọvona ru izihebro re. Evaọ iweze ọsosuọ, ọ rẹ ta nọ: “Mẹ riẹ nọ whọ riẹ omẹ hẹ. Me bi ru omodawọ obọdẹ re mẹ nyate ahwo evaọ eria ra re mẹ ghale eme jọ no Ebaibol na ze kugbe ai. Otẹrọnọ who wo umutho oke, mẹ gwọlọ se eyaa nọ a re duku eva . . .” Nọ o je se ikereakere na no, ọ vẹ ta nọ: “Kọ o gbẹ te jọ oware igbunu otẹrọnọ ma rẹ sae ruẹ oke oyena nọ o tẹ nyaze? Eva e were omẹ inọ me se onana k’owhẹ. Otẹrọnọ o were owhẹ re, mẹ gwọlọ nọ mẹ rẹ wariẹ zihe ze re mẹ t’ẹme kpahe ikereakere ọfa k’owhẹ.”

²⁷ Okenọ ọ wariẹ fonu, ọ tẹ kareghẹhọ ọnọ o wo uwou na kpahe ẹmeọta ọsosuọ rai ọ tẹ ta nọ ọ gwọlọ se no Ebaibol na ze kpahe oghẹrẹ nọ eyero ọ te jọ okenọ a te si emuemu no. Kẹsena o te ru ẹmeọta Ebaibol kpẹkpẹe kugbe ọnọ o wo uwou na. Evaọ ẹmeọta ifonu buobu, ahwo 35 a zizie i rie kpohọ uwou rai no yọ iwuhrẹ Ebaibol ihrẹ o muhọ no! Kọ ẹsejọ o rẹ jọ bẹbẹ k’owhẹ re who ru izihebro bru ahwo nọ i wo isiuru evaọ ezi oso fiki idhere nọ a rẹ sae nya vrẹ hẹ hayo ẹyao? Otẹrọ ere, kemejabọ whọ gbẹ rehọ ifonu t’ẹme kugbe ai hi?

²⁸ Nya Lele Isiuru nọ A Duku Evaọ Eria Ekiọthuọ: Eware efa buobu e riẹ evaọ iruo ọ n’uye-eki ruọ uye-eki vi emagazini nọ a re fihọ ada ọvo. Ahwo nọ e rẹ thueki buobu a wo emamọ isiuru kẹ uzẹme na, yọ a rẹ bọ isiuru yena hrọ. Ẹsejọ, o sae lọhọ re a wo ẹmeọta Ebaibol kugbe hayo tube wuhrẹ evaọ uwou-eki na dede. Evaọ eria efa, whẹ avọ ohwo nọ o wo isiuru na a sai zere oma evaọ oke-eriosehọ uvo hayo oke ọfa nọ u kiehọ.

²⁹ Ọsẹro ọnyawariẹ jọ ọ nyabru ohwo nọ o wo uwou-eki ọsese jọ ọ tẹ gwọlọ nọ o re dhesẹ uwuhrẹ Ebaibol kẹe. Okenọ a nọe nọ ẹvẹ udhesẹ na u ti kri te, ọsẹro ọnyawariẹ na ọ tẹ ta nọ o te rehọ iminiti 15 ọvo. Fiki oyena, ọnọ ọ be sẹro uwou-eki na o te fi oka họ unuẹthẹ na nọ: “Zihe ze evaọ Iminiti 20,” ọ tẹ wọ egbara ivẹ ze, ai imava a tẹ rehọ edhe-eme isoi ọsosuọ ọrọ obe Eriariẹ na t’ẹme. Oware nọ o wuhrẹ o were ọzae oruọzewọ ọnana te epanọ o ro kpohọ Uwuhrẹ Ovuẹ Ogbotu gbe Uwou-Eroro Na evaọ Ẹdoka ọyena ọ tẹ jẹ rọwo nọ uwuhrẹ na o nyaharo evaọ oka nọ u lele i rie.

³⁰ Re a ru uwuhrẹ evaọ oria ekiọthuọ, whọ rẹ sae ta onana: “Iminiti 15 ọvo a re ro dhesẹ ọruẹrẹfihotọ uwuhrẹ Ebaibol mai. U te kiehọ, eva e te were omẹ re me dhesẹ epanọ a re ro ru ei k’owhẹ.” Kẹsena, who ve ru mu umuo oke na. Otẹrọnọ o lọhọ re a t’ẹme thethei evaọ oria ekiọthuọ họ, o rẹ mai fo re a zihe bru ọnọ ọ be sẹro uwou-eki na evaọ obọ uwou riẹ.

³¹ Wariẹ Zihe Makinọ A Fi Obe Ovo Họ Ada Ha: Isiuru kpobi nọ a kpare u fo ozihebro, te a fi obe họ ada hayo a fihọ họ. Dede, otẹrọnọ u ri vevẹ nọ ọnọ o wo uwou na o ghine wo isiuru kpahe ovuẹ Uvie na ha, o rẹ mai woma re whọ kpọ omodawọ ra kpohọ oria ọfa.

³² Evaọ iruo n’uwou ruọ uwou na, oniọvo ọmọtẹ jọ ọ nyaku aye nọ ọ rọ whẹtiẹwhẹtiẹ rekọ ọ se thahethahe nọ ọ rẹ rehọ emagazini. Owhowho-uvie na o kere nọ: “Evaọ edẹ buobu me je roro kpahiẹe jẹ jiroro epanọ mẹ rẹ rọ wariẹ t’ẹme kugbei.” Uwhremu na, oniọvo ọmọtẹ na ọ tẹ lẹ, o te fi udu dhe, o te kporo ẹthẹ aye na. U gbe rie unu nọ ọnọ o wo uwou na o zizie ei nọ ọ ruọ uwou. A te mu uwuhrẹ Ebaibol họ, a tẹ jẹ wariẹ ru ei evaọ ẹdẹ nọ ọ kẹle riẹ. Evaọ ukuhọ riẹ, ọnọ o wo uwou na o te kurẹriẹ ruọ ukoko na.

³³ Roro Haro re Who Ru Onọ O Mai Woma Gba: A jiroro riẹ nọ ma raha oke jọ k’oka k’oka ro ru izihebro. Ma re ru eware buobu gba nọ ma tẹ moma ziezi. Ruẹrẹ izihebro họ evaọ eria vona nọ whọ te jọ ruiruo n’uwou ruọ uwou na.

³⁴ Ahwo nọ a wo obokparọ evaọ no eruo izihebro gbe emuhọ iwuhrẹ Ebaibol a ta nọ o r’oja re a wo isiuru kpahe ahwo na jẹ hai roro kpahe ae makọ okenọ ma te weze bru rai no dede. U wuzou re re a wo uzoẹme Ebaibol nọ u re siuru nọ a rẹ t’ẹme kpahe je ru otọhotọ kẹ ozihebro taure whọ tẹ te nya vrẹ no iweze ọsosuọ. Ofariẹ, u wuzou re a zihe evaọ ẹruoke rọ nya lele isiuru na. U fo re a wo ẹjiroro emuhọ uwuhrẹ Ebaibol họ iroro vevẹ ẹsikpobi.

³⁵ Okwakwa nọ u wuzou kẹ obokparọ evaọ iruo izihebro họ aruọwha. Ẹvẹ a re ro woi? Pọl ukọ na ọ k’uyo nọ ọ rọ ta nọ “ma wo udu” nọ ma re ro whowho emamọ usi na kẹ amọfa ‘ẹkwoma Ọghẹnẹ mai.’ Otẹrọnọ whọ gwọlọ rro evaọ abọ ọnana, lẹ se Jihova kẹ obufihọ. Kẹsena, rọwo kugbe elẹ ra, whọ vẹ nya lele isiuru kpobi. Ababọ avro, Jihova ọ te ghale omodawọ ra!

[Box on page 3]

Epanọ A re ro Wo Obokparọ Evaọ Eruo Izihebro

■ Dhesẹ isiuru kpahe ahwo.

■ Salọ uzoẹme Ebaibol nọ u re siuru nọ a rẹ t’ẹme kpahe.

■ Ru otọhotọ kẹ iweze n’otha kpobi.

■ Gbẹ hai roro kpahe ohwo na nọ whọ tẹ nya vrẹ no.

■ Zihe evaọ ẹdẹ ọvo hayo ivẹ re whọ nya lele isiuru na.

■ Wo ẹjiroro emuhọ uwuhrẹ Ebaibol họ iroro.

■ Lẹ kẹ obufihọ re whọ wharo evaọ iruo nana.