‘Obufihọ Evaọ Ẹruoke’
1 Ẹvẹ o rẹ sasa oma te nọ ma te wo obufihọ evaọ uzedhe okenọ ma gwọlọ e riẹ! (Hib. 4:16) Evaọ Okokohọ Ubrotọ “Ewhovuẹ Udhedhẹ Ọghẹnẹ” na, eva e were omai okenọ a k’omai obọdẹ okẹ obufihọ ivẹ evaọ ẹruoke.
2 Obe okpokpọ na, Edidi Evawere Uviuwou, o nyaze evaọ ẹruoke. O t’ẹro vi eware ene nọ i w’uzou nọ e rẹ wha uzuazọ evawere uviuwou haro: (1) Oma-oyọrọ, (2) evuhumu uzou-uwo, (3) emamọ ẹmeọta-kugbe, gbe (4) uyoyou. Ohrẹ nọ a kẹ evaọ obe Evawere Uviuwou na u ti fiobọhọ kẹ iviuwou nọ i fi rie họ iruo duku udhedhẹ Ọghẹnẹ. Fi oke họ re whọ rehọ oma totọ se obe okpokpọ na je wuhrẹ iẹe kugbe wọhọ uviuwou. Riẹ eware nọ e riẹ eva re whọ sae ruẹrẹ oma kpahe re whọ rehiẹe ruiruo oke ọsosuọ nọ a ti fi ei họ ada kẹ ahwo, evaọ March.
3 Ibroshọ ọkpokpọ na, Eme Ọghẹnẹ Ọ Gwọlọ Mi Omai?, o nyaze evaọ ẹruoke re u fiobọhọ ru iruo aru-ilele mai vẹrẹ. Nọ a te mae rehiẹe ruiruo ro fiobọhọ kẹ ahwo nọ a sai se ziezi hi na, ekpako buobu nọ e rẹ sai se gbe emaha a ti wo erere no edhesẹ ọlọlọhọ riẹ kpahe iwuhrẹ ọsosuọ Ebaibol na ze re. O rẹ sae jọ uzedhe oware nọ ma gwọlọ re ma rehiẹe mu uwuhrẹ họ wọhọ owojẹ-ọsosuọ kpohọ obe Eriariẹ na. Avọ imuẹro, okẹ onana o re fiobọhọ kẹ ahwo buobu mae vuhu epanọ a re wo oghale te ẹkwoma e ruo oware nọ Ọghẹnẹ ọ gwọlọ.
4 Devidi o dhesẹ oghẹrẹ nọ o rọ omai oma gbagba okenọ o whowho nọ ‘oja ovo o ro riẹ hẹ, a sasa oma riẹ, egho riẹ ọ vọ hwẹ!’ (Ol. 23:1, 3, 5) Ma be rehọ evawere rri haro kpohọ ẹwha obufihọ ẹzi igbunu enana se amọfa buobu enọ e ghinẹ gwọlọ nọ a rẹ riẹ jẹ gọ Ọghẹnẹ uzẹme na, Jihova.