Ghale Obe ọ Edidi Evawere Uviuwou na Kugbe Amọfa
1 Uviuwou na họ ugogo ehri nọ u ru ukoko ahwo-akpọ via, yọ iwhre, ikpewho, ibretọ, gbe erẹwho soso i no uviuwou ze. Nẹnẹ na, uviuwou na o rọ otọ otunyẹ vi epaọ anwẹdẹ kpobi. Ikpomahọ egaga e rọ iruo nọ i bi guegue uzedhe ẹria uzuazọ uviuwou na. Ẹvẹ ma rẹ kẹ uyere te inọ Jihova, Ọwena ọruẹrẹfihọ uviuwou na, ọ k’omai ekwakwa no re ma sai le evawere uviuwou t’obọ! Enọ i bi lele ọkpọvio riẹ a rẹ ruẹ nọ ebẹbẹ rai e rẹ jọ kakao yọ uviuwou obokparọ oye o rẹ r’oma via. Evaọ etoke ọ September ma wo uvẹ ẹghale obe ọ Edidi Evawere Uviuwou na kugbe amọfa. Rehọ udu-obọra rọ nyae ta kẹ ahwo kpahe ẹme ọ uzuazọ uviuwou. Dhesẹ oma ogbẹnyusu, rẹro ewoma, je dhesẹ orimuo. Eme whọ sae ta?
2 Whọ sai muhọ ẹkwoma onọ wọhọ:
◼ “Kọ who muẹrohọ no inọ o rọ bẹbẹ kẹ iviuwou buobu re a thihakọ ọyawọ uzuazọ? [Kuvẹ kẹ uyo.] Iyẹrẹ i dhesẹ nọ ahwo buobu a be ruẹ ebẹbẹ evaọ uwou na. Kọ eme who roro nọ u ti fiobọhọ re a ruẹ ọdọmuo ologbo gbe evawere? [Kuvẹ kẹ uyo.] Nọ o rọ nọ Ọghẹnẹ ọ rehọ ọruẹrẹfihotọ uviuwou ro mu na, kọ o gbẹ rọ oware areghẹ re a kiẹ ọkpọvio nọ ọ kẹ riwi? [Se 2 Timoti 3:16, 17.] A dhesẹ ọkpọvio erere otiọye fihọ obe onana, “Edidi Evawere Uviuwou.” Whọ vẹ nọ ohwo na oware nọ o rri wọhọ ẹbẹbẹ nọ ọ vọ eva uviuwou, dhesẹ uzoẹme nọ o t’ẹme kpahe ẹbẹbẹ ọyena, who ve fi obe na họ ada evaọ azọhọ ₦55.
3 Evaọ oke ozihebro na, whọ sai le ute emuhọ obe-uwuhrẹ Ebaibol evaọ edhere otiọna:
◼ “Me roro kpahe eme nọ whọ ta kpahe uzoẹme ọ uzuazọ uviuwou na no, yọ mẹ rehọ oware jọ ro se owhẹ nọ me roro nọ whọ te reawere riẹ. [Dhesẹ ibroshọ Ọghẹnẹ Ọ Gwọlọ na, rovie kpohọ ẹwẹ-obe avọ 16, who ve se enọ ezeza nọ e rọ obehru na.] U re vevẹ, omomọvo evaọ uviuwou na o re ru ẹkẹ-abọ riẹ hrọ re ọ zọhọ fihọ evawere uviuwou na. Who te wo umutho iminiti jọ, me ti dhesẹ k’owhẹ oghẹrẹ nọ whọ sai ro wo erere nọ ọ maero n’eva ovuẹ onana ze.” Who ve muọ uwuhrẹ avọ 8 họ. Who ve fi ibroshọ na h’ada kẹe evaọ azọhọ ₦15.
4 Edhere ọfa nọ a re ro muọ ẹme họ ẹta họ a rẹ fodẹ ẹbẹbẹ jọ, wọhọ:
◼ “Dede nọ ohwo kpobi ọ gwọlọ wo iroro ufuoma gbe evevọwẹ, o wọhọ nọ iviuwou buobu a te ghinẹ sai fikparobọ evaọ onana no ho. Kọ eme who roro nọ o rẹ sai fiobọhọ kẹ ae duku evawere uzẹme? [K’uvẹ kẹ uyo.] Oke krẹkri nọ u kpemu, Ebaibol na o rovie oghẹrẹ ebẹbẹ nọ ma te ruẹ evaọ iviuwou nẹnẹ. [Se 2 Timoti 3:1-3.] Dede na, Ebaibol na ọ ta kẹ iviuwou re kpahe oware nọ a re ro kuọ ebẹbẹ enana họ je wo evawere ukrẹkri. A dhesẹ ehri-izi riẹ fihọ obe onana, Edidi Evawere Uviuwou.” Who ve dhesẹ ẹkpẹti ọkiẹkpemu na evaọ ekuhọ uzoẹme nọ u fo, who ve sei, who ve fi obe na họ ada evaọ unuigho riẹ.
5 Nọ who te zihe, rehọ ibroshọ “Ọghẹnẹ Ọ Gwọlọ” na ro muọ obe-uwuhrẹ họ. Whọ sae ta nọ:
◼ “Unevaze ra re whọ kiẹ ehri-izi Ebaibol nọ i kiekpahe uzuazọ uviuwou na u siomẹ urru gaga. Eware nọ e via no i dhesẹ nọ a re wo iyẹrẹ nọ e mai woma ẹkwoma ẹnya lele ehrẹ nọ i w’iruo nọ e rọ evaọ Ebaibol na. Oruvẹ jọ kpahe oware nọ osoriẹ ze nọ o jẹ rọ ere ona.” Se edhe-ẹme ọsosuọ ọrọ uwuhrẹ 1 na evaọ ibroshọ Ọghẹnẹ Ọ Gwọlọ na, kugbe Olezi 1:1-3 hayo Aizaya 48:17, 18. Uvẹ o tẹ riẹ, se abọ uwuhrẹ na nọ u kiọkọ who ve fi ibroshọ na h’ada kẹe evaọ unuigho riẹ. Ta nọ who ti zihe ze re wha wuhrẹ uwuhrẹ nọ o kẹle riẹ na kugbe.
6 Wha Ebe Buobu: Ọkobaro jọ o fiọ ibroshọ Ọghẹnẹ Ọ Gwọlọ na họ ada kẹ ọzae jọ nọ a gbẹ jọ omoto je kpohọ erẹ. Oware nọ ọzae na o se no uwhrẹ avọ 10 ibroshọ na ze u te duobọ họ iẹe te epanọ o ro zihe igho buobu nọ o tho evaọ ẹkpa ohwo jọ nọ a gbẹ jọ omoto na. U te gbe ohwo kpobi nọ ọ jọ omoto na unu a tẹ yare ibroshọ Ọghẹnẹ Ọ Gwọlọ na. O te fi isoi efa họ ada rọkẹ ahwo nọ a jọ omoto na. Onana u te dhesẹ areghẹ ebe buobu nọ a rẹ wha lele oma ẹsikpobi.
7 Kpahe Ebe Mai: Wo irẹro ewoma evaọ okenọ who te bi mi azọhọ kẹ ebe mai. Azọhọ nọ ma bi mi fihọ ebe mai na i kpotọ gaga vi araha nọ a ro kere ai. Re a rẹro ewoma u dhesẹ nọ ma re ku ei họ k’oma mai no ho inọ ọnọ o wo uwou na ọ sae te hwa osa obe na ha. Umutho ẹtẹzẹ kakao mai o rẹ sae wha iyẹrẹ iwoma ze. Nọ ma te rẹro ewoma u re fiobọhọ kẹ ahwo ọ udu-oruọzewọ nọ a jẹ zọhọ unuigho kakao nọ ma re ro fi ebe mai họ ada na.
8 Joma daoma mai kpobi re ma lele amọfa ghale edidi nọ u re su kpohọ evawere uviuwou—nya lele ọkpọvio nọ a dhesẹ fihọ Ẹme Ọghẹnẹ.—Ol. 19:7-10.