Fi Obe ọ Evawere Uviuwou na họ Ada kẹ Ahwo Unuikpe Kpobi
1 Ọmọ ikpe 11 jọ evaọ obọ California o dhesẹ ovuhumuo riẹ via kpahe obe ọ Edidi Evawere Uviuwou na. O kere nọ: “Mẹ rẹ kẹ uyere fiki riẹ, yọ mẹ tudu họ iviuwou efa awọ re a se obe onana keme u woma gaga. U bi . . . fiobọhọ kẹ uviuwou mẹ ruẹ udhedhẹ gbe evawere evaọ uwou mai.” Oriruo ọmaha ọnana ọ rẹ tudu họ omai awọ re ma fi obe ọ Evawere Uviuwou na họ ada kẹ ahwo ọ unuikpe kpobi. Iroro-ejẹ jọ nọ whọ sae dao evaọ odibọgba ra evaọ etoke February ena.
2 Nọ whọ tẹ be t’ẹme kẹ uzoge, whọ sae ta nọ:
◼ “Izoge buobu a bi roro kpahe orọo. Rekọ okenọ a tẹ nọ ae sọ a ruẹrẹ oma kpahe kẹ orọo no hayo a te ruẹrẹ oma kpahe he, ibuobu e rẹ ta nnọ u mu rae ẹro ho. J’omẹ ghale oware nọ obe onana o ta kpahe ẹme na kugbe owhẹ.” Rovie kpohọ ẹwẹ-obe avọ 14 evaọ obe ọ Evawere Uviuwou na, je se edhe-ẹme avọ 3. Whọ vẹ riobọhọ uzoẹme-osese kpobi evaọ uzou na. Fi obe na họ ada evaọ unuigho riẹ na, je ru ọruẹrẹfihọ re who zihe.
3 Nọ whọ tẹ ruẹ ọyewọ, whọ sae ta nọ:
◼ “Ma bi dhesẹ obọdẹ ekpọvio nọ i re ruiruo kẹ eyewọ evaọ ẹyọrọ emọ. A kere i rai fihọ obe onana Edidi Evawere Uviuwou.” Rovie kpohọ ẹwẹ-obe avọ 55. Se edhe-ẹme avọ 10, who ve se Iziewariẹ 6:6, 7, lele ei evaọ edhe-ẹme avọ 11. Kẹsena whọ vẹ riobọhọ eme nọ a kere jẹlẹ nọ e rrọ edhe-ẹme avọ 12 rite 16. Nyaharo re whọ ta nọ: “Obe nana u fiobọhọ kẹ ahwo buobu wo obokparọ no wọhọ eyewọ. Whọ tẹ gwọlọ se ei, o te were omẹ re mẹ nya siọ ojọ ba k’owhẹ evaọ azọhọ ₦55 (onọ u wo uke ọ obe-olọlọhọ, ₦50).”
4 Okenọ whọ tẹ be t’ẹme kugbe ọkpako, whọ sae ta nọ:
◼ “Okenọ me te se ubro ẹme ọnana no, iviena ta oware nọ who roro kpahe iẹ k’omẹ.” Rovie obe Evawere Uviuwou na kpohọ ẹwẹ-obe avọ 169, re who se ihie-ẹme ivẹ ọsosuọ na evaọ edhe-ẹme avọ 17. Kẹsena whọ vẹ yare iẹ re ọ kpahe fihọ iẹ. Oghẹrẹ nọ uyo riẹ o rrọ, whọ sai se eria efa jọ no obe na ze taure who te ti fi ei họ ada.
5 Nọ who te bi zihe bru ohwo nọ who fi obe ọ Evawere Uviuwou na họ ada kẹ, wo iroro ọ emuhọ uwuhrẹ Ebaibol h’eva. Uwuhrẹ avọ 8 evaọ ibroshọ Gwọlọ na hayo uzou avọ 15 evaọ obe Eriariẹ na o sai fo oria nọ a re ro muhọ. Nọ ma bi ru ere na, j’oma daoma fiobọhọ kẹ ahwo unuikpe kpobi re a bọ uzuazọ uviuwou evawere ọ Oleleikristi.