Obọfihọ kẹ Iviuwou re A Gbobọkru Obaro nọ O rẹ Tọ
1 “Oriobọ o rẹ kẹ erere,” ere okru-igho jọ ọ vuẹ eklase ekọleji nọ i je nwrotọ, o te fibae nọ: “Whọ rẹ sae jọ ohwo oriobọ ababọ omovuọ nọ who re wo.” Oyena yọ uvi oriruo epanọ akpọ na ọ be rọ wha isiuru-omobọ ohwo haro wọhọ edhere nọ a rẹ rọ gbobọkru obaro ohwo. Hẹriẹ gaga no oyena, Jesu o wuhrẹ nọ Oleleikristi ọ rẹ “vro oma riẹ . . . keme didi erere ọ rẹ ruọ ohwo, otẹrọnọ o wo akpọ na kpobi re uzuazọ riẹ u te vru?” (Mat. 16:24-26) Re a gbobọkru obaro nọ o rẹ tọ, ohwo ọ rẹ ta uzuazọ riẹ kpobi vi eruo oreva Ọghẹnẹ—ute nọ o mai wuzou kẹ iviuwou nẹnẹ. (Ol. 143:10; 1 Tim. 4:8) A kẹ ovuẹ oyena evaọ uzou urere ọ obe na Edidi Evawere Uviuwou. Obe okpokpọ onana u re fiobọhọ kẹ ahwo ruẹ oware nọ o ghinẹ mai wuzou evaọ uzuazọ gbe epanọ a sae rọ j’owọ evaọ erere kpahe iviuwou rai. Nọ ma bi whowho emamọ usi na evaọ eria kpobi na, eme ma rẹ sae ta nọ o rẹ tudu họ ahwo nọ ma nyaku awọ re a se obe ọ Evawere Uviuwou na? Enana họ ezọhọfihọ jọ:
2 Te evaọ unuẹthẹ gbe evaọ iyẹrẹ, whọ rẹ sae daoma rehọ omobe-ovẹvẹ na “Reawere Uzuazọ Uviuwou” ruiruo ro mu ẹmeọta họ. Whọ vẹ nọ nọ:
◼ “Avọ awaruọ nọ uzuazọ ọgbọna ọ wha se omai na, kọ who roro nọ o ghinẹ lọhọ re a wo uzuazọ evawere uviuwou? [Kuvẹ kẹ uyo.] Omobe-ovẹvẹ onana o k’omai imuẹro inọ o lọhọ. Kọ whọ gwọlọ sei?” Otẹrọnọ a rehe riẹ, whọ rẹ sae gbẹ ta haro nọ: “Nọ who wo isiuru kpahe ẹme ọnana na, whọ rẹ sae jẹ reawere obe onana nọ o kẹ ohrẹ ukokodo kpahe epanọ a re ro duku evawere evaọ uviuwou na.” Dhesẹ eware nọ e riẹe eva evaọ obe ọ Evawere Uviuwou na. Riobọhọ umutho izoẹme nọ i wo isiuru. Rovie kpohọ ẹwẹ-obe avọ 10, je se no uye-ẹme urere na ze evaọ edhe-ẹme avọ 17 rite ukuhọ edhe-ẹme avọ 18 na. Fi obe na họ ada, jẹ fodẹ unu azọhọ riẹ. Dhesẹ nọ who wo eware efa nọ whọ gwọlọ ta kpahe, jẹ nọ kpahe oke nọ whọ sae rọ wariẹ zihe ze.
3 Whọ rẹ sae nya lele ẹmeọta ọsosuọ ra kpahe uzuazọ evawere uviuwou whọ vẹ ta nọ:
◼ “Mẹ gwọlọ dhesẹ oware jọ k’owhẹ evaọ obe nọ who wo na nọ me roro nọ o te were owhẹ. Uzou urere na o riobọhọ uvi edidi evawere uviuwou. [Se edhe-ẹme avọ 2 evaọ ẹwẹ-obe avọ 183.] Muẹrohọ nọ iruo ru kugbe evaọ eruo oreva Ọghẹnẹ họ usiavẹ na. Ma gwọlọ nọ iviuwou a wuhrẹ Ebaibol na kugbe re a wuhrẹ oware nọ oreva Ọghẹnẹ o rọ gbe epanọ a re ro fi ei họ iruo evaọ uviuwou na. Ma rẹ kẹ uwuhrẹ Ebaibol ọvọvẹ nọ o rẹ rehọ umutho emerae ọvo re a ru ei re. Otẹrọnọ whọ k’omẹ uvẹ, me ti dhesẹ epanọ a re ru ei k’owhẹ.” Zihe avọ ibroshọ na Eme Ọghẹnẹ Ọ Gwọlọ Mi Omai? hayo obe Eriariẹ na ọnọ ọ mai kiehọ kpobi.
4 Okenọ whọ tẹ be t’ẹme kugbe ibe-eklase evaọ obọ isukulu hayo kugbe izoge nọ e rọ ẹkwotọ na, whọ rẹ sae wo uyo kẹ onọ onana:
◼ “Ẹvẹ u wuzou te kẹ eyewọ avọ emọ rai re a rovie uvẹ kẹ ẹmeọta-kugbe ohwohwo? [Kuvẹ kẹ uyo.] Muẹrohọ oware nọ obe ọ uzuazọ uviuwou onana o ta kpahe uzoẹme ọ ‘Ẹmeọta-Kugbe Avọ Oruọzewọ nọ U no Eva Ze.’ [Se edhe-ẹme avọ 4 na kpobi gbe uye-ẹme ọsosuọ edhe-ẹme avọ 5 evaọ ẹwẹ-obe avọ 65 evaọ obe Evawere Uviuwou na.] Edhe-eme nọ i lele i rie na e kẹ ezọhọfihọ nọ i w’iruo kpahe epanọ a re ro ru ẹmeọta-kugbe nyaharo evaọ uviuwou na. Uzoẹme obe onana họ Edidi Evawere Uviuwou. Mẹ te nyase obe nana ba k’owhẹ evaọ azọhọ ₦80.” Dhesẹ nọ who ti zihe ze oke ọfa re who yo ọkpahe-fihọ riẹ kpahe oware nọ o se.
5 Whọ rẹ sae ru ẹnyaharo kpahe ẹmeọta ọsosuọ ra kugbe uzoge kpahe ẹmeọta-kugbe ọyewọ-avọ-ọmọ whọ vẹ ta nọ:
◼ “Me vuhu aghare isiuru nọ who dhesẹ mu evaọ epanọ u wuzou te re a wo emamọ ẹmeọta-kugbe evaọ udevie uviuwou ra. Uzoẹme vẹ who roro nọ o mai wuzou nọ eyewọ avọ emọ a rẹ ta kpahe?” Kuvẹ kẹ uyo. Rovie kpohọ ẹwẹ-obe avọ 68 evaọ obe Evawere Uviuwou na, je se uyo nọ a re duku evaọ abọ ọsosuọ edhe-ẹme avọ 11 na. “Ewo uwuhrẹ Ebaibol k’oka k’oka yọ emamọ edhere nọ a re ro wo eriariẹ Ọghẹnẹ.” Dhesẹ ibroshọ na Eme Ọghẹnẹ Ọ Gwọlọ Mi Omai? Dhesẹ nọ iwuhrẹ 16 riẹ e kẹ evuẹ Ebaibol nọ e mai wuzou. Se erovie via riẹ evaọ ẹwẹ-obe avọ 2, wha vẹ rehọ uwuhrẹ ọsosuọ na t’ẹme kugbe.
6 Otẹrọnọ whọ nyaku ọyewọ evaọ iruo n’uwou ruọ uwou na, hayo evaọ ogege-eriosehọ hayo ogege-arozaha, whọ rẹ sae kpare isiuru riẹ whọ vẹ ta nọ:
◼ “Me wo imuẹro nọ whọ te rọwo nọ o re gaga nẹnẹ re a yọrọ emọ. Eme who roro nọ o rẹ thọ uviuwou ra no ọwhẹruọ ọraha? [Kuvẹ kẹ uyo.] Onana họ emamọ ohrẹ jọ nọ me vuhu mu no.” Gbiku ifoto nọ e rọ edhe-ẹme 1, je se edhe-ẹme avọ 2 evaọ ẹwẹ-obe avọ 90 evaọ obe Evawere Uviuwou na. Dhesẹ epanọ o rọ kẹ ọkpọvio owowa nọ u ghine w’iruo nọ o rẹ thọ iviuwou no ọwhẹruọ ọraha. Dhesẹ nọ whọ gwọlọ nyase obe na ba evaọ azọhọ ₦80, jẹ ta nọ whọ te kuyo enọ kpobi nọ e roma via.
7 Evaọ iweze avivẹ ra bru ọyewọ nọ ọ rehọ obe ọ “Evawere Uviuwou” na, whọ rẹ sae t’ẹme na haro evaọ edhere ọnana:
◼ “Okenọ ma kake ruẹ-oma, mẹ ruẹ nọ whọ be ghinẹ sẹro emọ ra gbe nọ whọ gwọlọ ru utho ra kpobi re whọ thọ ae no ọwhẹruọ ọthọthọ. Otiẹsejọ who ri sei hi, rekọ obọdẹ oware jọ o riẹ nọ a muẹrohọ evaọ obe nọ mẹ nyase ba k’owhẹ na nọ u fo nọ whọ rẹ ruẹ. [Se edhe-ẹme avọ 19 evaọ ẹwẹ-obe avọ 59.] Ẹbọ usu kugbe Ọghẹnẹ o gwọlọ ẹriẹ nọ ma rẹ riẹe ẹkwoma Ẹme riẹ nọ a kere, Ebaibol na. Kọ whọ gwọlọ nọ me dhesẹ epanọ ma re wuhrẹ Ebaibol na wọhọ uviuwou k’owhẹ?”
8 Ekohrẹ ahwo akpọ a rẹ sai dhesẹ edhere evawere kẹ iviuwou hu rekọ a rẹ viẹ ae họ. Joma ghale obe Evawere Uviuwou na kẹre haro ziezi re Ẹme Ọghẹnẹ ọ sai fiobọhọ kẹ ahwo evaọ eria kpobi gbobọkru obaro nọ o rẹ tọ.—1 Tim. 6:19.