Ahwo Buobu A bi Kurẹriẹ
1 Wọhọ epanọ o jọ evaọ ikpe-udhusoi ọsosuọ na, ẹvi nọ ukoko Ileleikristi a be reawere riẹ nẹnẹ u gbunu. (Iruẹru 2:41; 4:4) Ukpe n’ukpo, ilele ekpokpọ 366,579 e họ-ame, a tẹ ghale ai i bu vi 1,000 kẹdẹ kẹdẹ! Bu vi ahwo ima ọvo eye e họ-ame no evaọ ikpe esa nọ i kpemu na. Uzẹme, Jihova o bi ku ahwo buobu kugbe enọ e rọwo na.—Iruẹru 5:14.
2 Ahwo kpokpọ buobu enọ e kare eriariẹ evaọ ẹria Oleleikristi a gwọlọ obufihọ gbe ewuhrẹ no obọ ahwo nọ e ga ze evaọ ẹrọwọ. (Rom 15:1) Evaọ usu Ileleikristi ọsosuọ họ ejọ nọ, dede nọ a họ-ame kri no, a be sae ‘họre te ẹkpako’ ho. (Hib. 5:12; 6:1) Oye jabọ nọ, evaọ ileta riẹ se ahwo Hibru, Pọl o je duobọ te eria nọ u fo nọ Ileleikristi a rẹ jọ rro evaọ ẹzi. Didi eghẹrẹ eria, kọ ẹvẹ ma sae rọ kẹ obufihọ nọ a gwọlọ?
3 Ewo Emamọ Uruemu Ewuhrẹ: Rọwo kugbe uthubro Pọl, re a jọ emamọ ọmọ-uwuhrẹ o gwọlọ oma nọ a re ro kpotọ wuhrẹ, wariẹ oware nọ a wuhrẹ na, jẹ re “emu ọgaga” nọ ukoko Jihova ọ be rọ kẹ. (Hib. 5:13, 14; rri Uwou-Eroro Na ọrọ August 15, 1993 (ọrọ Oyibo), ewẹ-ebe 12-17.) Ẹkwoma eme ọ ẹzi nọ who re lele ahwo kpokpọ ta jẹ ghale eware aghare uzẹme na nọ who duku ẹkwoma ọkiẹriwo omobọ ra ze, whọ rẹ sai ru ai re a wo emamọ uruemu ewuhrẹ. Whọ rẹ sai zizie ohwo kpokpọ ẹsejọ re o kuomagbe owhẹ evaọ uwuhrẹ omobọ ra hayo orọ uviuwou ra.
4 Ekpohọ Iwuhrẹ Ẹsikpobi: Oriruo ẹrọwọ gbe eme uyoyou uduotahawọ ra i re fiobọhọ kẹ ahwo ekpokpọ ukoko na re a whaha abọ ọfa jọ nọ Pọl ọ fodẹ—“uruemu” nọ otu jọ a wo nọ a rẹ rọ siọ iwuhrẹ Ileleikristi ba. (Hib. 10:24, 25) Fiobọhọ kẹ ai wo ovuhumuo inọ ẹkwoma iwuhrẹ na a sae rọ jọ uzuazọ evaọ ẹzi evaọ ukoko na. J’owọ re who ru udu rai totọ wọhọ abọ okugbe-inievo na.
5 Ẹnyabru Jihova avọ Udu: Re a fi oyẹlẹ ugboma gbe ẹthọthọ uruemu kparobọ, ma rẹ gwọlọ Jihova evaọ olẹ, fodẹ iroro ididi gbe ọdawẹ idhere mai kẹe. Ahwo kpokpọ a re wuhrẹ hrọ inọ ẹkwoma Jihova nọ a rẹ lẹ se kẹ obufihọ, wọhọ epanọ Pọl ọ ta na, udu u je te ai otọ. (Hib. 4:15, 16; 10:22) Ẹkwoma ikuigbe eware nọ e via k’owhẹ no evaọ abọ ọnana whọ sae bọ udufihọ ohwo ọkpokpọ na ga inọ Jihova o re yo elẹ nọ i no udu ze.
6 Efihọ Oke kẹ Odibọgba Na: Pọl o te je dhesẹ nọ okenọ ma tẹ “rehọ okẹ iwẹegọ ejiro rọ kẹ Ọghẹnẹ,” o rẹ bọ omai ga evaọ ẹzi. (Hib. 13:15) Kọ whọ sai zizie owhowho-uvie ọkpokpọ jọ re o kuomagbe owhẹ evaọ ọruẹrẹfihọ usiuwoma ota ra? Ẹsejọ whai imava wha sae ruẹrẹ ẹme nọ wha te ta họ hayo t’ẹme kpahe abọ odibọgba na jọ nọ owhowho-uvie ọkpokpọ na ọ re dawo ho.
7 Ahwo buobu nọ a bi kurẹriẹ o be wha oghọghọ ulogbo ze. Oma nọ ma rẹ dawo re ma wuhrẹ jẹ tudu họ ahwo kpokpọ ukoko na awọ u re fiobọhọ kẹ ai wo ẹrọwọ ọgaga nọ a gwọlọ re a ‘ruẹse wo uzuazọ.’—Hib. 3:12, 13; 10:39.