April—Okenọ Ma re ro ‘Ruiruo Gaga jẹ Daẹgba Mai Kpobi’

¹ Ekpoka nọ e wariẹ etoke ehaa Ekareghẹhọ na họ yọ oke ọ eroro rọkẹ ahwo Jihova. Onana yọ oke eroro kpahe oware nọ uwhu Kristi u rugba jegbe eroro kpahe ẹruore mai nọ o n’obọ Ọghẹnẹ ze nọ azẹ Jesu nọ o hwẹ u ru lọhọ. Nọ who te roro kpemu kpohọ ẹdẹ avọ 19 ọrọ April ukpe n’ukpo, eme ọ rẹ ziọ iroro ra? Kọ whọ sae kareghẹhọ ahwo nọ whọ ruẹ eva owọwọ oyena? uyero ojaja abọ-ẹzi nọ o jọ eva ehaa Ekareghẹhọ na? ẹmeọta osegboja Ebaibol na gbe elẹ nọ i no udu ze na? Ẹsejọhọ who ru ọtamuo re who dhesẹ vọvọ viere epanọ uyere ra rọkẹ uyoyou nọ Jihova gbe Jesu a dhesẹ k’owhẹ u kodo te. Ẹvẹ eroro otiọye na o kpomahọ owhẹ te enẹna?

² U re vevẹ nọ ahwo Jihova a rẹ kẹ uyere nọ u vi orọ ẹmeunu ọvo. (Kọl. 3:15, 17) Maero, evaọ April ukpe n’ukpo, ma romavia re ma dhesẹ ovuhumuo mai rọkẹ ọruẹrẹfihotọ Jihova kẹ esiwo ẹkwoma omodawọ mai evaọ odibọgba Oleleikristi na. Ekobaro obufihọ i bu te idu buobu, nọ o rehọ 32 evaọ udhusoi bu vi unu ọ ukpe nọ o vrẹ na evaọ amara ọvona evaọ Nigeria. Omodawọ rai, avọ erọ iwhowho Uvie efa kpobi, o wha unu okpokpọ ze evaọ euwa, emagazini nọ a fihọ ada, gbe izihebro. U fiba oghọghọ mai nọ ma ruẹ idu iwuhrẹ Ebaibol ekpokpọ nọ a muhọ gbe unu okpokpọ nọ o mai bu orọ ahwo nọ a kpohọ ehaa Ekareghẹhọ na!

³ Evaọ uzẹme, imuẹro ẹruore mai o rẹ w’omai kp’iruo. O nwane wọhọ epanọ Pọl ukọ na o kere inọ: “Fiki onana ma jẹ be ruẹ uye, be họra, keme ma rehọ ẹruore mai kpahe Ọghẹnẹ uzuazọ na, ọye nọ rọ Osiwi ahwo kpobi, omaero kọ otu nọ ọ rọwo.”—1 Tim. 4:10.

⁴ Evaọ ezi ehaa Ekareghẹhọ ọnana, ẹvẹ who ti ro dhesẹ ẹrọwọ ra fihọ ọruẹrẹfihotọ Jihova rọkẹ uzuazọ? Evaọ April ukpe n’ukpo ma ruẹ unu avivẹ nọ o mai bu kpobi orọ iwhowho Uvie nọ a rọ ẹro ruẹ no evaọ Nigeria. Kọ ma sai bu vrẹ unu oyena evaọ April ukpe nana? O lọhọ re ma nyate ute onana. Rekọ o gwọlọ nọ owhowho-uvie kpobi, te enọ e họ-ame no gbe enọ e te họ-ame he, a jariẹ w’obọ. Ahwo ekpokpọ efa a sai je te re a jariẹ w’obọ. Fikiere, nọ whọ be m’omaa re who ruiruo gaga jẹ daẹgba ra kpobi evaọ April nana, roro kpahe idhere nọ whọ sae rọ kẹ amọfa ọwhọ, te ahwo ọkpokpọ gbe enọ i wo ona tere he, re a lele owhẹ ruiruo.

⁵ Obufihọ kẹ Ejọ re A Wariẹ Mu Iruo Rai Họ: Whọ tẹ riẹ ahwo jọ nọ i re ti kpohọ usiuwoma ota evaọ amara ọvo hayo ivẹ hẹ, ẹsejọhọ whọ rẹ sae tuduhọ ae awọ je zizie ae re a lele owhẹ ruiruo evaọ usiuwoma ota na. Otẹrọnọ ejọ evaọ ukoko na a se iruo uvie ba no, ekpako na a re ru omodawọ obọdẹ re a weze bru ae jẹ tuduhọ ae awọ re a wariẹ muhọ evaọ April.

⁶ Mai kpobi ma rẹ ruabọhọ ẹyare kẹ ẹzi Jihova re o k’omai ẹgba evaọ iruo riẹ. (Luk 11:13) Eme ma re ru hrọ re ma wo ẹzi ọyena? Se Ẹme Ọghẹnẹ nọ ẹzi ọ kẹ ẹgba na. (2 Tim. 3:16, 17) Ma re je ‘yo epanọ ẹzi na ọ ta kẹ ukoko na’ ẹkwoma ekpohọ iwuhrẹ isoi ẹkpoka na kpobi. (Evia. 3:6) Onana yọ ẹruoke nọ a re ro fiobọhọ kẹ iwhowho-uvie ẹdhigodo gbe enọ e siọ iruo uvie ba no re a ru woma viere evaọ ona uwuhrẹ rai je ru iwuhrẹ kpohọ rai fihọ uruemu ekẹse kẹse. (Ol. 50:23) Ma re ru onana je muẹrohọ uyero abọ-ẹzi omobọ mai kpekpekpe. Ghele na, o gwọlọ oware ofa jọ.

⁷ Pita ukọ na o ru rie vevẹ inọ Ọghẹnẹ ọ rẹ rehọ ẹzi ọfuafo riẹ “rọkẹ enọ i [bi yo] ẹme riẹ” wọhọ osu. (Iruẹru 5:32) Ẹmeoyo otiọye na u kugbe ẹmeoyo kẹ ujaje na “re ma vuẹ ahwo [usiuwoma na] je se isẹi.” (Iruẹru 1:8; 10:42) Fikiere, dede nọ o rọ uzẹme nọ ma gwọlọ ẹzi Ọghẹnẹ re o k’omai ẹgba rọ ta usiuwoma na, o rọ uzẹme re inọ nọ ma te muọ isiuru mai re ma ru Jihova eva were họ edhesẹ, o re fiobọhọ k’omai viere. Ajo ma rri epanọ u wuzou te re ma j’owọ ọsosuọ ẹmeoyo unevaze eyena vo vievie he!

⁸ Obufihọ kẹ Emaha Na: Eyewọ, kọ wha ruẹ imuẹro no inọ emọ rai a gwọlọ t’ẹme kẹ amọfa kpahe uzẹme na? Kọ a be hai lele owhẹ evaọ usiuwoma ota na? Kọ uruemu rai u fo onọ a rẹ raro kele? O tẹ rọ ere, kemejabọ who je sioma-họ-emu? Nya bru omọvo jọ evaọ Ogbẹgwae Iruo Ukoko na, re whọ ruẹ sọ ọmọ ra o te ohwo nọ a re kele wọhọ owhowho-uvie evaọ April. (Rri obe Our Ministry na, ẹwẹ-obe avọ 99-100.) Vuhumu nọ emọ ra a sai fiba ubo ujiro kẹ Jihova evaọ edhere ologbo evaọ ezi ehaa Ekareghẹhọ ọnana.—Mat. 21:15, 16.

⁹ Oniọmọ Oleleikristi jọ evaọ Georgia, U.S.A., ọ rẹ tuduhọ ọmọtẹ ọboba riẹ awọ ẹsikpobi re ọ t’ẹme kẹ amọfa kpahe Jihova. Ukpe n’ukpo na, nọ ọmọtẹ na ọ jọ odibọgba na kugbe oni riẹ, o te fi ibroshọ Gwọlọ na họ ada kẹ ọzae jọ o te je dhesẹ eware nọ e riẹ eva vevẹ. Ọzae na ọ tẹ nọ ọmọtẹ na nọ: “Br’ikpe whọ rọ?” Ọmọtẹ na ọ tẹ ta nọ: “Ikpe ihrẹ.” U gbe ọzae na unu nọ ọ ruẹ nọ ọ ta ẹme ziezi ere. Kpakiyọ uzẹme na a jọ yọrọ ọzae na rekọ o se rie gboja wọhọ edhere uzuazọ họ. U kri hi, a te muọ uwuhrẹ Ebaibol họ eru kugbe ọzae na, aye riẹ, gbe ọmọtẹ riẹ.

¹⁰ Emaha buobu e rọ iwhowho-uvie no, yọ ma rẹ reawere usu rai nọ a bi lele omai ruiruo evaọ usiuwoma ota na. Izoge enana a rẹ sae kẹ ọwhọ jẹ tuduhọ amọfa nọ e rọ ehwa rai awọ. Rekọ April yọ oke ofa nọ u kiehọ rọkẹ uviuwou ọvuọvo re a ru okugbe rai ga jẹ bọ edikihẹ abọ-ẹzi ẹkwoma iruo i ru kugbe evaọ iruo efuafo na. Enọ i wo uzou uviuwou a rẹ k’obaro evaọ onana.—Itẹ 24:27.

¹¹ Obufihọ kẹ Ahwo Ọkpokpọ: Kọ ẹvẹ kpahe ahwo ọkpokpọ nọ who bi lele wuhrẹ Ebaibol na? Kọ a sae zọhọ kugbe omodawọ obọdẹ na evaọ April ukpe nana? Ẹsejọhọ a dhesẹ isiuru re a ta kẹ amọfa kpahe oware nọ a bi wuhrẹ evaọ okenọ wha je wuhrẹ uzou avọ 2, edhe-ẹme avọ 22, hayo uzou avọ 11, edhe-ẹme avọ 14, evaọ obe Eriariẹ na. Wha tẹ kẹle urere obe na no, ruẹrẹ oma kpahe re who lele iei t’ẹme nana vevẹ nọ wha te bi wuhrẹ uzou avọ 18, edhe-ẹme avọ 8, onọ o ta nọ: “Ẹsejọhọ oma o rẹ kpakpa owhẹ re whọ ta eware nọ who bi wuhrẹ kẹ imoni ra, egbẹnyusu ra, gbe amọfa. Evaọ uzẹme, ẹsejọhọ who muọ onana họ eruo no vẹre, nwane wọhọ epanọ Jesu ọ jẹ ghale usiuwoma na kugbe amọfa evaọ edhere ọnyakuo. (Luk 10:38, 39; Jọn 4:6-15) Ẹsejọhọ enẹna whọ gwọlọ ru vi ere.” Kọ enẹ o rọ kẹ ahwo nọ who bi wuhrẹ?

¹² Kọ ọmọ-uwuhrẹ ra ọ rọwo Ẹme Ọghẹnẹ na? Kọ ọ be hai fi ehri-izi Ebaibol họ iruo? Kọ o ru uzuazọ riẹ rọwo kugbe itee Ọghẹnẹ no? Kọ ọ be hai kpohọ iwuhrẹ ukoko na? Kọ ọ gwọlọ gọ Jihova Ọghẹnẹ? O tẹ rọ ere, kemejabọ whọ gbẹ tuduhọ iẹe awọ re o lele ekpako na t’ẹme re a ruẹ sọ o te re ọ jọ owhowho-uvie nọ ọ te họ-ame he je lele owhẹ ru iruo evaọ April? (Rri obe ọ Our Ministry, ẹwẹ-obe avọ 97-99.) Evaọ edhere ọnana ọ rẹ sai muhọ ẹruẹ k’omobọ riẹ epanọ ukoko Jihova o te rọ thae uke evaọ omodawọ riẹ re ọ gọ Jihova.

¹³ Uzẹme, emọ-uwuhrẹ jọ a re ru ẹnyaharo kpata vi efa. Fikiere, rọwo kugbe ọkpọvio nọ ọ rọ Odibọgba Uvie Mai ọrọ June 2000, ẹwẹ-obe avọ 4, edhe-ẹme avọ 5-6 na, ibuobu a be hai wuhrẹ obe avivẹ kugbe ahwo nọ e kaki dhesẹ isiuru rekọ a gwọlọ obufihọ ofiba re a kuomagbe omai vọvọ. Ma re rẹro nọ ahwo udu-oruọzewọ enana a ti zihe ruọ uvi ilele ọ Kristi, “o tẹ maki lehie hayo ovẹrẹ.” (Iruẹru 26:29) Ghele na, o tẹ make rọnọ unu emerae nọ who bi ro wuhrẹ kugbe ohwo otiọye na u “lehie” no, kọ ezi ehaa Ekareghẹhọ ọnana o sae jọ emamọ uvẹ kẹ ọmọ-uwuhrẹ ra re o muọ epanọ ovuhumuo riẹ rọkẹ ẹtanigbo Kristi na o kodo te họ edhesẹvia?

¹⁴ Epanọ A re ro Fiobọhọ Kẹ Ae w’Obọ: Ma re wuhrẹ eware buobu kpahe epanọ a re ro fiobọhọ kẹ ahwo nọ i te re a muọ odibọgba na họ ẹkwoma ẹkiẹriwi epanọ Jesu o ro wuhrẹ amọfa. Orọnikọ ọ nwane ruẹ ogbotu jọ ọ jẹ ta kẹ ikọ riẹ re a mu ẹmeọta họ họ. Ọ kaki fiẹgbahọ ẹgwọlọ iruo usiuwoma ota na, tuduhọ ae awọ kpahe uruemu olẹ, kẹsena ọ tẹ kẹ ae igogo eware esa: ọrivẹ usiuwoma ota, ẹkwotọ iruo, gbe ovuẹ. (Mat. 9:35-38; 10:5-7; Mak 6:7; Luk 9:2, 6) Whọ sai ru ere re. O tẹ make rọnọ ọmọ obọ ra, ọmọ-uwuhrẹ ọkpokpọ, hayo ohwo nọ ọ re n’iyẹrẹ iruo evaọ okejọ họ who ti fiobọhọ kẹ, u re fo re who ru omodawọ obọdẹ re who le itee enana t’obọ.

¹⁵ Ru Ẹgwọlọ na Vẹ: Dhesẹ epanọ iruo usiuwoma ota na i w’uzou te vevẹ kẹ ohwo na. Wereva kpahe iẹe. Gbiku eware nọ i dhesẹ oware nọ ukoko na u bi rugba evaọ odibọgba na. Dhesẹ ẹzi nọ Jesu o dhesẹ evaọ Matiu 9:36-38 na. Tuduhọ ọnọ o ti zihe ruọ owhowho-uvie na hayo ọnọ ọ se iruo uvie ba no na awọ re ọ lẹ kpahe obọ nọ o re wo evaọ odibọgba na gbe obokparọ iruo na evaọ akpọ-soso.

¹⁶ Tuduhọ Ohwo na re O Roro Kpahe Uvẹ Buobu nọ E Riẹ re O Se-Isẹri: Fodẹ epanọ o lọhọ te re o kuomagbe utu obe uwuhrẹ na kẹ isẹri-ise n’uwou ruọ uwou. Ta kpahe ẹmeọta kugbe imoni gbe egbẹrioma hayo ẹmeọta kugbe ibe-iruiruo hayo ibe-isukulu evaọ etoke eriosehọ. Okenọ a tẹ ruọ omoto-ofa, ohwo ọ rẹ sai mu ẹmeọta họ ẹkwoma uvi isiuru nọ o re dhesẹ kẹ ahwo nọ a gbẹ ruọ omoto. Okenọ ma tẹ j’owọ na, onana u re rovie edhere fihọ ẹsibuobu re ma se emamọ isẹri. Evaọ uzẹme, uvẹ buobu e riẹ nọ ma rẹ rọ ghale ẹruore mai kugbe amọfa “kẹdẹ kẹdẹ.”—Ol. 96:2, 3.

¹⁷ Ghele na, ẹsejọhọ o te mai woma re whẹ avọ owhowho-uvie ọkpokpọ na a ru iruo kugbe n’uwou ruọ uwou nọ a tẹ nwani kuenu kẹe no. Otẹrọnọ who fi ute họ re who wo ẹvi evaọ usiuwoma ota ra evaọ April, nọ ọsẹro ọ ẹkwotọ na sọ ẹkwotọ jọ nọ ọ kẹle owhẹ obọ ọ riẹ. O tẹ rọ ere, onana o te k’owhẹ uvẹ re whọ jariẹ ruiruo muotọ ziezi . Wọhọ oriruo, nọ whọ tẹ ta usiuwoma reno hayo nọ who te bi kpohọ iwuhrẹ hayo eria efa, whọ rẹ sai muẹrohọ nọ ohwo jọ ọ rọ uwou nọ who jo duku ohwo ọvuọvo vẹre he hayo oria jọ nọ a jo dhesẹ isiuru. U te kiehọ, wẹriẹ re whọ t’ẹme kpẹkpẹe evaọ okenọ o te mai ro w’iruo. Onana u re je fiba iroro erugba gbe oghọghọ evaọ odibọgba na.

¹⁸ Ruẹrẹ Ovuẹ nọ U re Siuru Kpahe: Re ohwo ọ gwọlọ ghale ovuẹ Uvie na kugbe amọfa yọ oware jọ, rekọ re o wo imuẹro kpahe oghẹrẹ nọ ọ rẹ rọ tae yọ ẹme ọfa, maero otẹrọnọ ọ rọ ohwo ọkpokpọ hayo otẹrọnọ u kri no nọ o ro kpohọ usiuwoma ota. Obufihọ kẹ ahwo ọkpokpọ gbe enọ e se iruo uvie ba no re a ruẹrẹ oma kpahe yọ oke nọ a riẹ raha ziezi. Iwuhrẹ Odibọgba na gbe iwuhrẹ kẹ usiuwoma ota e rẹ sae kẹ eme obufihọ, rekọ a rẹ rehọ oware ovo ro nwene omaruẹrẹhọ omobọ ohwo ho.

¹⁹ Ẹvẹ whọ sai ro fiobọhọ kẹ ahwo ọkpokpọ ruẹrẹ oma kpahe kẹ usiuwoma ota? Rehọ odhesẹvia efihọ ada emagazini muhọ, yọ who re ru ei lọlọhọ jẹ jọ kpẹkpẹe! Ta kẹ ae re a roro kpahe eware usi jọ nọ e via kele na nọ e te jọ ọdawẹ kẹ enọ e rọ ẹkwotọ na, kẹsena whọ vẹ gwọlọ ugogo-ẹme jọ evaọ emagazini ekpokpọ na jọ nọ o ta kpahe iẹe. Wha wuhrẹ odhesẹvia na kugbe, wha vẹ jẹ rehọ iẹe ruiruo evaọ odibọgba na nọ wha tẹ nwani wuhrẹ iẹe no.

²⁰ Bọ Irẹro ọ Ẹvi Obaro Mai Na: Ukpe n’ukpo na ahwo nọ i kpohọ ehaa Ekareghẹhọ na evaọ akpọ-soso a bu vi ima 14.8. Unu ọ ahwo nọ a n’iyẹrẹ wọhọ iwhowho-uvie o rehọ omojọ bu vi ima ezeza ọvo. Onana u dhesẹ nọ oware wọhọ ahwo ima 8.8 a wo isiuru te epanọ a rọ nyaze ọruẹrẹfihotọ obọdẹ ọnana nọ a jọ gaviezọ kẹ oruvẹ ọ ugogo ewuhrẹ Ebaibol na jọ. Ae ọvo a riẹ otujọ evaọ usu mai, ẹsejọhọ nọ o lẹliẹ e rae wo emamọ eriwo kpahe omai. Ibuobu rai a rẹ ta emamọ eme kpahe omai, ru okẹ unevaze kẹ iruo akpọ-soso mai, jẹ thọ omai evaọ aro amọfa. Utu ologbo ọnana ọ kẹ imuẹro ọrọ ẹvi obaro. Eme ma rẹ sai ru re ma fiobọhọ kẹ ae ru ẹnyaharo viere?

²¹ Ibuobu ahwo ọkpokpọ nọ e be hai kpohọ ehaa Ekareghẹhọ na a be nya fiki uzizie nọ omọvo mai jọ o zizie i rai. Ẹsibuobu, onana u dhesẹ nọ o tẹ kao a riẹ omọvo jọ evaọ ogbotu na. Otẹrọnọ ohwo jọ ọ nyaze fiki uzizie mai, ma wo owha-iruo re ma dede iei rehọ je fiobọhọ kẹe wo erere vọvọ no ọruẹrẹfihotọ na ze. Nọ orọnọ ọgwa na ọ te vọ na, fiobọhọ kẹe gwọlọ oria nọ ọ rẹ keria. Kẹe Ebaibol jọ, je zizie ei re ọ ghale obe-ile ra kugbe owhẹ. Kuyo kẹ enọ kpobi nọ ọ te nọ. Ẹromuhọ ọsasa ra ọ sae jọ abọ ologbo jọ evaọ ẹbọ isiuru riẹ. Dede na, mai kpobi ma wo owha-iruo nana—whọ tẹ ruẹ ohwo nọ whọ riẹ hẹ, dede iei rehọ sasasa je lele iei t’ẹme kpẹkpẹe re whọ riẹe.

²² Ẹnya ziọ ehaa Ekareghẹhọ na o rẹ sai duobọte iroro ohwo gaga. Uzẹme na inọ ọ nyaze omakugbe na o sai dhesẹ nọ ọ re jọ oria ọfa ruẹ oware nọ ọ be gwọlọ na ha gbe nnọ ma wo oware jọ nọ ọ gwọlọ kiẹriwi gaga viere. Oruvẹ ọ ọruẹrẹfihotọ igbunu ọrọ ẹtanigbo na o sae jọ oware ulogbo jọ nọ u rovie via kẹ ohwo nọ ọ riẹ kpahe uyoyou ulogbo Jihova ha. Ọ sae nwane ruẹ nọ ma wo ohẹriẹ—ma rọ oruọzewọ, ma rọ whẹtiẹwhẹtiẹ, ma wo uyoyou, yọ ma rẹ kẹ amọfa adhẹẹ. Ọgwa mai o wo ohẹriẹ no iwou ichọche nọ ọ ruẹ no nọ i wo emema gbe iruemu nọ i fioka ha. Ahwo ọkpokpọ a rẹ nwane ruẹ nọ ogbotu na yọ ahwo nọ a no k’abọ k’abọ uzuazọ ze jegbe nọ a re ghoro umudo ho. Eware nana nọ a ruẹ na e sai kpomahọ ae gaga re a wariẹ nyaze.

²³ Nọ ehaa Ekareghẹhọ na o tẹ vrẹ no, u fo re ohwo jọ o fiẹrohotọ re ọ kẹ ohwo ọkpokpọ kpobi nọ ọ nyaze obufihọ. Who te zizie ahwo ọkpokpọ, koyehọ who wo owha-iruo obọdẹ. Taure a te ti kpo, wo imuẹro inọ a riẹ kpahe iwuhrẹ efa evaọ Ọgwa Uvie na. Fodẹ uzoẹme ovuẹ ogbotu n’otha. Jọ a riẹ oria gbe oke Uwuhrẹ Obe Ukoko nọ o mae kẹle ae.

²⁴ Ru ọruẹrẹfihotọ kẹ iweze ọruọruọ eva obọ uwou rai. Jọ u mu owhẹ ẹro nọ a wo ibroshọ Gwọlọ na gbe obe Eriariẹ na, enọ i re wuhrẹ ai kpahe igogo iwuhrẹ ọ Ebaibol na. Otẹrọnọ a ti muhọ ewuhrẹ hẹ, ru re who ru uwuhrẹ Ebaibol kugbe ai. Ta kẹ ae re a se ibroshọ Isẹri Jihova na, onọ u dhesẹ vevẹ epanọ ma bi ruiruo riwi wọhọ ukoko. Oria nọ o jọ lọhọ zizie ai re a rri ividio mai, wọhọ Our Whole Association of Brothers. Ru ọruẹrẹfihotọ re a riẹ amọfa evaọ ukoko na. Evaọ emerae nọ i lele i rie na, hai weze bru ahwo okpokpọ na; zizie ai re a kpohọ iwuhrẹ evaọ okenọ ọsẹro okogho o te weze ze hayo evaọ okenọ wha te wo okokohọ okogho hayo ẹdẹ okokohọ obọdẹ. Kẹ ae uvẹ kpobi nọ a re ro dhesẹ omarai wọhọ ahwo “nọ a ro mu kẹ uzuazọ ebẹdẹ bẹdẹ”!—Iruẹru 13:48.

²⁵ Oware nọ Ekpako na A rẹ Sai Ru: Obokparọ omodawọ obọdẹ evaọ odibọgba na evaọ April nana, evaọ abọ ologbo, o te mae r’oma hwa ekpako na. Otẹrọnọ whẹ yọ owuhrẹ ọ uwuhrẹ obe ukoko, kere eware nọ whọ rẹ sai ru re who ro fiobọhọ kẹ ahwo kpobi evaọ utu obe uwuhrẹ ra re a w’obọ evaọ iruẹru obọdẹ na fihọ otọ. Kọ ahwo jọ a rọ utu ra nọ e rọ emaha, ahwo ọkpokpọ, ẹdhigodo, hayo nọ e se iruo uvie ba no? Nọ re whọ ruẹ sọ esẹ gbe ini na, ekobaro, hayo iwhowho-uvie efa a j’owọ no re a fiobọhọ kẹ ae. Kẹ obufihọ omobọ ra kpobi nọ whọ rẹ sae kẹ. Oniọvo-ọmọtẹ jọ nọ ọ jọ ẹdhigodo evaọ usiuwoma ota evaọ ikpe ivẹ ọ raha bu vi euwa 50 evaọ odibọgba na evaọ April ukpe n’ukpo na. Eme ọ wha enwene nana ze? Ọ ta nọ oware na họ iweze ẹruorote ọbọga nọ ekpako na a ru.

²⁶ Ekpako gbe idibo iruiruo a re ruiruo kugbe re a ruẹ nọ ẹkwotọ, emagazini, gbe ebe buobu e riẹ rọkẹ amara n’otha na. Kọ a rẹ sae ruẹrẹ iwuhrẹ kẹ usiuwoma ota efa họ? Otẹrọnọ ere, jọ ohwo kpobi riẹ kpahe ọruẹrẹfihotọ obọdẹ na. Maero, evaọ elẹ ẹgbede ra gbe erọ omobọ ra, yare oghale Jihova kpahe amara ọ erubu iruẹru Uvie mai na.—Rom 15:30, 31; 2 Tẹs. 3:1.

²⁷ Evaọ April ukpe n’ukpo na evaọ ukoko jọ evaọ North Carolina, ekpako na a ghinẹ tuduhọ erubu iruẹru evaọ odibọgba na. Evaọ iwuhrẹ na k’oka k’oka, a rẹ tuduhọ iwhowho-uvie na re a roro avọ oma olẹ sọ a te sai kere odẹ fihọ otọ wọhọ ekobaro obufihọ. Evaọ uvẹ kpobi, ekpako gbe idibo iruiruo na kpobi a t’ẹme kpahe April nọ a re ru fihọ amara nọ ọ mai woma kpobi. Fikiere, abọ 58 evaọ udhusoi ọ iwhowho-uvie na, kugbe ekpako gbe idibo iruiruo na kpobi, a ru iruo ọkobaro evaọ amara ọyena!

²⁸ Oghọghọ Abọ-Owo Vọvọ: Eme họ eghale ‘iruo i ru gaga gbe eru omodawọ mai kpobi’ evaọ odibọgba na? (1 Tim. 4:10) Rọ kpahe iruẹru ọwhọ ukoko rai evaọ April ukpe n’ukpo na, ekpako ukoko nọ a fodẹ evaọ obehru na a kere nọ: “Ẹsibuobu inievo na kpobi a rẹ t’ẹme kpahe epanọ uyoyou gbe usu okpekpe nọ a wo kẹ ohwohwo o rro te anwẹnọ a ro muọ iruo họ eru viere evaọ usiuwoma ota na.”

²⁹ Oniọvo-ọmọzae ọmaha jọ nọ ọ rẹ sae nya ziezi hi o wo isiuru re o w’obọ evaọ iruẹru obọdẹ na evaọ April ukpe n’ukpo. Ẹkwoma emamọ ọruẹrẹfihotọ gbe obufihọ oni gbe iniẹvo abọ-ẹzi riẹ, ọ reawere amara ẹvi wọhọ ọkobaro obufihọ. Ẹvẹ o roro kpahe oware nọ o ru na? Ọ ta nọ: “Evaọ uzuazọ mẹ kpobi, ẹsiẹe mẹ jọ wọhọ ọzae udu.”

³⁰ Avro ọ riẹ hẹ inọ Jihova ọ rẹ ghale ahwo nọ i rri uvẹ-ọghọ rai ọrọ ẹmeọta kpahe ọkwa-ovie riẹ ghaghae. (Ol. 145:11, 12) Nọ ma bi ru ehaa uwhu Olori mai na, ma wo otoriẹ nọ eghale omarọkẹ Ọghẹnẹ i ti bu viere evaọ obaro na. Pọl ukọ na o wo isiuru egaga kẹ osohwa ọ uzuazọ ebẹdẹ bẹdẹ na. Ghele na, ọ riẹ nọ onana o rọ oware nọ ọ rẹ riabọ h’otọ ọvo o ve rẹro riẹ hẹ. O kere nọ: “Fiki onana mẹ jẹ be ruẹ uye, họre avọ ogaga mẹ kpobi fiki iruo riẹ, nọ o rọ oma mẹ ru iruo ilogbo.” (Kọl. 1:29) Jihova, ẹkwoma Jesu, o ru Pọl jọ gaga re o ru odibọgba uzuazọ-usiwo gba, yọ O re ru ere k’omai nẹnẹ re. Kọ oyena o te jọ oware ikuigbe omobọ ra evaọ April ọnana?

[Box on page 3]

Ono Whọ Te Sae Tuduhọ re Ọ Niyẹrẹ Evaọ April?

Ọmọ ra?

Ọmọ-uwuhrẹ Ebaibol ra?

Ohwo nọ ọ se iruo uvie ba no?