Wo “Ajọwha kẹ Iruo Iwoma” Evaọ April!

¹ Ukpe n’ukpo a se isẹi nọ u wo ibe he nọ a rọ ghale ima ebe-vẹvẹ ọ Kingdom News No. 34 nya akpọ-wariẹ. Te iwhowho-uvie ukoko gbe ekobaro a rehọ ajọwha w’obọ evaọ iruo evawere enana. Kọ whọ jọ omọvo rai? Otẹrọnọ whọ jariẹ, ababọ avro whọ reawere abọ o wo evaọ iruo usi ovravra oyena. Enẹna o sae gbe owhẹ unu inọ, Didi ‘iruo iwoma’ e be hẹrẹ omai evaọ ukpe onana?—Taitọs 2:14.

² Evaọ etoke April gbe emuhọ May, ma ti wo omawere ẹghale obọdẹ ukere emagazini Awake! ọrọ April 22, 1996, nọ o be t’ẹme te “Okenọ Emo E Gbẹ te Jọ Họ.” Nọ uzoẹme onana u ti si ahwo buobu urru na, ma te daoma re ma kẹ emagazini na ẹghale nọ ọ mai rro kpobi. Fiki oghẹrẹ nọ evuẹ nọ e riẹe eva i wuzou te, ma te rọ ukere Awake! onana ruiruo evaọ etoke April jẹ nya ruọ May, bẹsenọ enọ e r’omai obọ kpobi i re ti re no.

³ Ute Mai—Iwhowho-Uvie Kpobi A re Wo Abọ: O te jọ oware ọbọga otẹrọnọ owhowho-uvie kpobi evaọ orẹwho ọnana ọ sai w’obọ evaọ usiuwoma ota evaọ April. Avọ ehaa Ekareghẹhọ uwhu Kristi nọ o gbẹ rọ omai iroro, ababọ avro ma rẹ gwọlọ dhesẹ ovuhumuo ewoma Ọghẹnẹ ẹkwoma ‘idhe ajiri’ nọ ma rẹ kẹ evaọ iruẹru usiuwoma ota na.—Hib. 13:15.

⁴ A rẹ daoma re a riẹ ẹgwọlọ omomọvo ukoko na re aikpobi a sae wo abọ avọ ajọwha evaọ odibọgba April na. (Rom 15:1) Iwuhrẹ obe Ukoko a rẹ riẹ uvẹ ahwo nọ e rọ utu rai re a kẹ uthubro nọ u re fiobọhọ nọ o tẹ gwọlọ erei oruo. Kọ ohwo jọ ọ gwọlọ ofa-edhere? Ono ọ rẹ sae kẹe? Kọ ejọ e rẹ dhozọ hayo wo udu-bruo? Kọ iwhowho-uvie nọ e mai wo eriariẹ e sai ruiruo kugbe ai? Kọ ẹvẹ kpahe enọ e be mọ gbe enọ e ga t’ere he? Kọ a sai ru usiuwoma ota ẹkwoma ileta i kere hayo evaọ edhere ọfa jọ nọ ẹvi ọrọ?

⁵ Ejọ nọ i go oma h’emu no a be hai kẹ ai uduotahawọ ẹzi kẹse kẹse, yọ oma o rẹ sae wọ ae re a wariẹ w’abọ evaọ iruo usiuwoma ota na. Ẹvravra usi na avọ obọdẹ Awake! na o te kẹ ae emamọ uvẹ re o wariẹ fi ajọwha họ ai oma.

⁶ Wuhrẹ Emaha re A Wo Abọ: Emọ Isẹri Jihova a lele esẹ gbe ini rai evaọ iruo ọ nuwou ruọ uwou ikpe buobu no, dede nọ a rẹ te jọ iwhowho-uvie nọ e re họ-ame he. Kọ oke onana họ okenọ a ro muhọ? Kọ u no udu rai ze jẹ ruẹrẹ oma họ no re a wo emamọ abọ evaọ iruo ọ nuwou ruọ uwou na? Enọ i wo uzou uviuwou a rẹ rehọ oke evaọ etoke uwuhrẹ Ebaibol uviuwou na fiobọhọ kẹ emọ rai nọ i te re a ruẹrẹ ẹmeọta nọ o fo nya lele ikpe gbe ẹgba rai. Enọ ekpako no a rẹ sae salọ onọ nọ u re dhobọ te iroro nọ a rẹ sae rọ kpare isiuru ọnọ o wo uwou na a vẹ jẹ riobọ kpohọ uyo na evaọ emagazini na. Emọ nọ e maha gaga e rẹ sae ta usiwoma nọ u w’ẹgba evaọ umutho eme. Wọhọ oriruo, a sae tudu họ ọnọ o wo uwou na awọ re o “se emagazini obọdẹ na nọ a bi fihọ ada nya akpọ-wariẹ evaọ amara ọnana.” Wọhọ abọ oma ruẹrẹhọ uviuwou ra, jọ u muowhẹ ẹro nọ who ku gbei ezọhọfihọ nọ a re ro fi inoma odode kparobọ. Who ti duku emamọ eme iroro buobu evaọ obe ọ Reasoning na. Eva oke emuore gbe oke ofa nọ u fo, tudu họ ahwo uviuwou na awọ re a gbiku eware nọ a ruẹ evaọ usiuwoma ota.

⁷ Emọ-Uwuhrẹ Ebaibol nọ I te A Rehọ Iruo nọ Jesu O Ru: Jesu o ru uwuhrẹ riẹ nyaba uthubro kpahe eme iwuhrẹ ọvo ho. O lele emọ-iwuhrẹ riẹ kpohọ odibọgba je wuhrẹ ai epanọ a rẹ ta usiuwoma na. (Luk 8:1; 10:1-11) Kọ ẹvẹ o rọ nẹnẹ? Ebe iwuhrẹ Ebaibol nọ i bu vi abane ima a bi ru evaọ Nigeria. Ababọ avro, avọ ọbọga nọ u fo emọ-iwuhrẹ enana buobu a sae jowọ ọfa nọ o kẹle riẹ evaọ ewuhrẹ rai re a je te kẹ iruo wọhọ iwhowho-uvie nọ e re họ-ame he evaọ April.

⁸ Otẹrọnọ who bi ru uwuhrẹ Ebaibol, roro kpahe enọ enana: Kọ ọmọ-uwuhrẹ na ọ be nyaharo, lele ikpe gbe ẹgba riẹ? Kọ o mu ẹrọwọ riẹ họ ẹghale kugbe amọfa no evaọ edhere usiwoma ota ọnyakuo? Kọ ọ be whẹ “uruemu okpokpọ” na họ oma? (Kọl. 3:10) Kọ o te ute iwhowho-uvie nọ e re họ-ame he, nọ a fihọ ewẹ-obe 97 rite 99 ọrọ obe ọ Our Ministry na? Otẹrọnọ who roro nọ o te, keme jabọ whọ gbẹ ta ẹme na kugbei hi? Emọ-iwuhrẹ jọ uzizie ọvo a gwọlọ re a w’abọ evaọ iruo na. Rekọ, otẹrọnọ u no ọmọ-uwuhrẹ na eva ze, u wuzou re ọsẹro ukoko na ọ kake ruẹrẹ ẹmeọta họ kugbe ekpako ivẹ tau. Evaọ abọdekọ riẹ, oware jọ o sae da ọmọ-uwuhrẹ na ji. Ẹsejọhọ omọvo ekpako na jọ ọ rẹ sai lele owhẹ evaọ uwuhrẹ Ebaibol na ọ vẹ nọ ọmọ-uwuhrẹ na kpahe iroro riẹ kẹ uzẹme na. Nọ ọ tẹ gaviezọ kẹ oware nọ ọmọ-uwuhrẹ na ọ ta no, ọkpako na ọ rẹ sai dhesẹ ezọhọfihọ nọ i re fiobọhọ rọ kẹe, avọ obọfihọ Ikereakere na.

⁹ ‘Ru Uvẹ,’ re Who ru Ọkobaro Ubroke: Kukpe kukpe evaọ ezi ehaa Ekareghẹhọ na, edẹro rọ kẹ ẹtanigbo na o rẹ wọ idu ahwo re a ‘ru’ uvẹ re a jọ ekobaro ubroke. (Ẹf. 5:15-17) Dede nọ o gwọlọ inwene jọ, osohwa riẹ o re ruaro. Izoge buobu a rẹ rehọ uvẹ ehọlide isukulu ro ru ọkobaro ubroke. Ekpako soso nọ i re ruiruo ẹsikpobi a rẹ rehọ owọwọ gbe urere ẹkpoka ruiruo vọvọ evaọ iruo ọvo nana. Koyehọ iviuwou kpobi a ru iruo ọkobaro ubroke kugbe no! Evaọ ikoko jọ ekpako na buobu gbe idibo iruiruo gbe eyae rai a fi obe họ wọhọ ekobaro ubroke no. Ọwhọ nọ oriruo ajọwha rai ọ kẹ, o lẹliẹ amọfa lele oriruo rai no, nọ ahwo buobu evaọ ukoko na a je ruiruo wọhọ ekobaro ubroke evaọ April.

¹⁰ Te make whọ sae ru ọkobaro ubroke hayo whọ rẹ sae ru hu, kiẹ idhere nọ whọ sae ro fi ẹvi họ iruo usiuwoma ota ra evaọ April. Fi ute họ kẹ omobọ ra, onọ o rẹ gwọlọ omodawọ re a tei rekọ onọ a rẹ sai te. Ẹgwọlọ ra re whọ “raha jẹ raha riẹriẹriẹ” evaọ iruo Jihova, wọhọ epanọ uvẹ ra u te, u ti wo eghale riẹ.—2 Kọr. 12:15, NW.

¹¹ Okuomagbe kẹ Usiuwoma Ota: A re ru oma okuomagbe usiuwoma ota họ kẹdẹ kẹdẹ rọ kẹ usi ovravra Awake! na, evaọ oke nọ a rẹ rọ kaki mu odibọgba na họ. A re je ru ọruẹrẹfihọ kẹ isẹri ise owọwọ. Iwhowho-uvie buobu a ti kpohọ usiwoma ota evaọ urere ẹkpoka na, fikiere ikoko a rẹ ma-oma ẹgwa odibọgba obọ otafe fihọ Ẹdẹ-Ọmaha, te ohiohiẹ gbe uvo, evaọ etoke ẹghale obọdẹ Awake! na.

¹² Ahwo nọ a bi su okuomagbe kẹ usiuwoma ota na a rẹ ruẹ nọ ẹkuotọ nọ u re te ahwo na ru o riẹ. Ẹkuotọ nọ a ri ru kẹle he ọye a rẹ kaki ruẹ. Rekọ, ẹkuotọ nọ a ghale k’omai hi nọ Ukoko-Ulogbo o be rẹro te, a re ru ei hi ajokpa nọ a mi uvẹ no obọ Ukoko-Ulogbo ze tao. Kọ who wo ẹkuotọ ọvo hayọ ivẹ er’obọ ra nọ who ri ru re kẹle he? Otẹrọnọ whọ te gwọlọ obọfihọ re a ru ai evaọ etoke usi ovravra na, vuẹ ọsẹro iruo usiuwoma ota na hayo oniọvo nọ ọ be rẹro te ẹkuotọ na yọ o rẹ te were ai eva re a fiobọhọ k’owhẹ.

¹³ Bro Emagazini Who ti Fihọ-Ada? Oyena yọ onọ nọ omomọvo ọ rẹ k’uyo riẹ. Re whọ sae riẹ unu emagazini nọ whọ rẹ sae fihọ-ada evaọ etoke usi ovravra na, roro kpahe oghẹrẹ ẹkuotọ nọ who ti jo ruiruo, oghẹrẹ nọ whọ kpako te, oghẹrẹ nọ oma ra orọ, oke nọ whọ sae raha kẹ iruo na, gbe eware efa. Ghele na, muẹrohọ ọjọriẹ nọ a kẹ evaọ Uwou-Eroro Na, ukere ọ January 1, 1994, (ọrọ Oyibo): “Wọhọ ọzọhọfihọ, iwhowho-uvie a rẹ sai wo ute, emagazini 10 evaọ amara, wọhọ epanọ uvẹ rai u te; ekobaro a rẹ sae daoma le 90.” Kọ a sai le ute otiọye na t’obọ evaọ abọ ra?

¹⁴ Ekpako—A Gwọlọ Oma-Ma nọ O rọ Kpatiẹ: A rẹ ruẹ nọ, otẹrọnọ o lọhọ, a rẹ rehọ ukere Awake! obọdẹ na ro ru ekuotọ ukoko na kpobi. A rẹ ruẹ nọ a ru ẹkuotọ ekiọthuọ nọ a ghale kẹ ukoko na. Ahwo nọ a bi ru ei a rẹ thoma kpahe ziezi a vẹ gọ ẹgọ nọ ọ rọ kpatiẹ. O gwọlọ ẹmeọta othethei hi. Okenọ whọ tẹ be nyabru ohwo nọ ọ be thueki, whọ rẹ sae ta nọ ẹsibuobu who re di ethueki họ uwou ho, fikiere whọ be nyaze oria iruo riẹ re whọ rehọ uzoẹme nọ u ti si ei urru rọ kẹe. Oke oyena who ve dhesẹ ugogo ẹme jọ evaọ emagazini na. A rẹ jẹ ruẹrẹ iruo emagazini ọ isẹri ise iyẹrẹ fihọ ẹkuotọ ukoko na ziezi. Edhere nọ ọ mai w’ẹgba nọ a re ro ru iruo iyẹrẹ họ udu obọ mai nọ ma rẹ rọ nyabru ahwo nọ e be nya vrẹ, ukpenọ ma rẹ hẹrẹ re a nyabru omai ze. Fikinọ whọ te rọ oma via evaọ ẹgbede na, whọ rẹ ruẹ nọ who ru oma ra fihọ jevejeve he. Eria efa jọ e sae jariẹ evaọ ẹkuotọ ra nọ a rẹ sai ru evaọ etoke usi ovravra na, wọhọ igege-irupre, ẹsipito, oria nọ imoto e rẹ kpahe, ogege-arozaha gbe eki. Ugboma ekpako na a rẹ jiroro kpahe oghẹrẹ ọruẹrẹfihọ nọ u fo nọ a re ru kẹ isẹri ise evaọ eria enana nọ e rọ ekuotọ ukoko ra.

¹⁵ Jihova yọ oruiruo nọ oma o rẹ rọ họ. (Jọn 5:17) Ọye ọ ma idhiwu gbe akpọ jegbe ekakọ gbe erao; rekọ o ruiruo bẹsenọ ọ rọ ma oware urere iruo abọ riẹ evaọ otọakpọ—ohwo. Uzẹme na inọ ma wo uzuazọ yọ fiki unevaze Ọghẹnẹ nọ o re ro ru iruo. Wọhọ “enọ e be raro kele Ọghẹnẹ,” uyoyou nọ ma wo kẹe o rẹ w’omai re ma wo “ajọwha kẹ iruo iwoma.” (Ẹf. 5:1; Taitọs 2:14, NW ) Nọ Jihova o te kẹ ọnọ ma rẹ rọ uvi omodawọ mai kpobi kẹ na, yọ nọ o rọ ẹgwọlọ ohwo ajọwha re o wo erere no omodawọ riẹ ze na, u re si omai urru re ma ru emamọ iruo evaọ odibọgba na. Eva uzẹme, Jihova o re vuhu omodawọ kpobi nọ ma dhesẹ kẹe, yọ iruo mai e rẹ jọ ifofe oke ovo ho. (1 Kọr. 15:58) Fikiere, avọ idu edẹro, jọ ma rehọ oma mai kẹ iruo ajọwha evaọ April, avọ imuẹro ọjẹrehọ gbe eghale Jihova jegbe obọkparọ ulogbo!