Kọ Ma Sai Ru April 2000 Fihọ Amara nọ Ọ Mai Woma Kpaobọ k’Omai?
1 Owọwọ Edesa-Oka, April 19, o te jọ ẹdẹ ologbo evaọ ukpe iruo mai. Ẹdẹ ọyena, nọ ọre o te kiediwi no evaọ otọakpọ na soso, ikoko gbe ẹko Isẹri Jihova kpobi evaọ akpọ-soso a ti ru Ekareghẹhọ uwhu Kristi. Ofẹ akpọ na nọ ma be rria kpobi, ekareghẹhọ idhe Jesu Kristi o te jọ ehaa nọ e mai wuzou evaọ ukpe na. A kpokahọ ẹdẹ Ekareghẹhọ na evaọ amara April eva 2000 Calendar of Jehovah’s Witnesses.
2 Amara April na soso ọ k’omai obọdẹ uvẹ nọ ma re ro dhesẹ ovuhumuo udu mai kpobi kẹ aruoriwo nọ Jihova o dhesẹ ẹkwoma idhe Ọmọ riẹ. Evaọ oghẹrẹ vẹ? Pọl ukọ na o kere nọ: “Keme uyoyou Kristi oye o rọ omai esuo, keme umu omai ẹro nọ ọ vo jọ o whu kẹ ahwo kpobi; fikiere ahwo kpobi a te whu re. O te whu kẹ ahwo kpobi re enọ egbẹrọ uzuazọ egbẹ jọ kẹ oma obọ rai ofaha, rekọ a rẹ jọ kẹ e ọnọ o whu fiki rai ọ tẹ jẹ kparoma.” (2 Kọr. 5:14, 15) Ẹhẹ, evaọ April na ma rẹ sai dhesẹ nọ ma be rria kẹ omobọ mai hi rekọ rọkẹ ọnọ o whu k’omai, nọ u re ru amara ọnana fihọ ọnọ ọ mai woma k’omai wọhọ egbodibo Uvie na!
3 Fi Obe họ kẹ Iruo Ọkobaro Obufihọ Evaọ April: Pọl ukọ na ọ k’omai obọdẹ oriruo nọ ọ ta nọ: “Rekọ [me] bi kele uzuazọ mẹ gbe odẹ oware ovoho wọhọ orọ oware nọ o jọ obọ mẹ ghare he, re mẹ ruẹse ru ẹkẹ iruo nọ ite omẹ re jegbe iruẹru odibo ọgba nọ omẹ jọ obọ Ọnowo Jesu mi, re me si isẹri usiuwoma aruoriwo Ọghẹnẹ.” (Iruẹru 20:24) Ma wo uvẹ-ọghọ ovo na nọ ma re ro se uvi isẹri kpahe Jihova Ọghẹnẹ. Fikiere, ma gwọlọ ru April fihọ amara mai nọ ọ mai woma rọkẹ iruẹru ọkobaro obufihọ!
4 Ẹkwoma urere-oka isoi riẹ, April 2000 ọ te jọ obọdẹ amara nọ a rẹ rọ jọ ọkobaro rọkẹ ibuobu. Evaọ March 1997, okenọ ma nyate ute ekobaro obufihọ nọ o mai bu kpobi, ahwo 19,218 nọ e jọ ekobaro na yọ abọ 10 evaọ udhusoi iwhowho-uvie kpobi. Ikpe ivẹ i lele iei no, iwhowho-uvie kpobi nọ e niyẹrẹ evaọ April 1999 a rehọ abọ 7 evaọ udhusoi bu vi epaọ anwẹdẹ no. Onana u dhesẹ nọ ma wo obọdẹ irẹro nọ ma ti bu vi unu ekobaro obufihọ nọ o mai bu kpobi no vẹre. Fibae, a ru unu euwa ekobaro kpotọ no, nọ u ru abọ iruo nana lọhọ kẹ ibuobu no evaọ ukoko na. Owhowho-uvie kpobi nọ ọ họ-ame no ọ rẹ rọ oma olẹ roro sọ ọ sai ti ru iruo ọkobaro obufihọ evaọ April nana.
5 Ẹkwoma obufihọ amara April evaọ 2000 Calendar na, m’omaa iruẹru ra enẹna kẹ amara n’otha na. Jiroro edẹ nọ who ti ro w’obọ evaọ usiuwoma ota na re who kuọ euwa nọ who roro nọ whọ sai ti wo evaọ usiuwoma ota evaọ amara na kpobi kugbe. Kuọ oke nọ who roro nọ whọ sai ti ro se isẹri kẹ amọfa te erọ ọnyakuo gbe enọ whọ wọ no uwou bru kugbei. Kọ unu rai kpobi o nya kẹle ute euwa 50 rọkẹ ekobaro obufihọ na? Otẹrọnọ i te unu euwa nọ a gwọlọ na ha, kọ whọ sai ru inwene efa evaọ omaa ra re whọ sae dẹ oke kẹ ọkobaro obufihọ? Who re le auwa ọvo gbe iminiti 40 ọvo kẹdẹ kẹdẹ re whọ sae nyate euwa 50 evaọ amara.
6 Enẹna nọ a go euwa ekobaro oke-kpobi kpotọ no re na, kọ who bi roro kpahe ẹruọ iruo odibọgba oke-kpobi na? April ọ te jọ obọdẹ amara nọ who re ro muhọ! Otẹrọnọ udu u bi bru owhẹ nọ whọ sae te nyate euwa 70 nọ a gwọlọ kẹ ọkobaro oke-kpobi hi, eme jabọ who gbe ru ọkobaro obufihọ evaọ April he re whọ m’omaa euwa 70 fihọ wọhọ ute ra? Whọ tẹ ruẹ nọ whọ sai ru ei, oma o te wọ owhẹ viere re who kuomagbe ekobaro oke-kpobi na kẹle.—Rri Our Ministry, ẹwẹ-obe avọ 113-114.
7 W’obọ Vọvọ Wọhọ Owhowho-Uvie Usiuwoma Na: Rọ k’omai kpobi, te iwhowho-uvie gbe ekobaro, uvi uyoyou nọ ma wo kẹ Ọghẹnẹ jẹ rọkẹ erivẹ o be wọ omai ru uthoma mai evaọ iruo Jihova. (Luk 10:27) Ma vẹ rọ enẹ dhesẹ nọ ma “be ruẹ uye, be họra, keme ma rehọ ẹruore mai kpahe Ọghẹnẹ uzuazọ na, ọye nọ [ọ] rọ Osiwi ahwo kpobi, omaero kọ otu nọ ọ rọwo.” (1 Tim. 4:10) Oye jabọ ma je rẹro nọ ahwo kpobi a ti w’obọ vọvọ evaọ iruo Uvie na evaọ April.
8 Jọ uthubro Jesu na o thọrọ omai ẹro ho: “Ivuẹvu na i ghine bu, rekọ iruiruo e rẹ kakao. Fikiere wha lẹ Olori ivuẹvu na re o vi iruiruo kpobọ ivuẹvu riẹ.” Nọ ọ nwane ta eme eyena no, Jesu o te zizie ikọ 12 riẹ o te vi ai vrẹ re a nyae ta usiuwoma. (Mat. 9:37, 38; 10:1, 5, 7) Nọ ukpe ovo o ruemu no, nọ o wuhrẹ 12 na ziezi kẹ iruẹru usiuwoma ota na no, Jesu “ọ tẹ jẹ ha udhe ahwo osa gbe imakpe efa ro mu, o te vi ai,” kẹ ai ithubro evo na: “Ivuẹvu na i ghine bu . . . fikiere wha lẹ Olori ivuẹvu na re o vi iruiruo kpo obọ ivuẹvu riẹ.” (Luk 10:1, 2) Obe Iruẹru orọ Ebaibol na o niyẹrẹ epanọ Jihova ọ rọ kuyo elẹ eyena. Evaọ Pẹntikọst 33 C.E., unu ilele na u bu te ole 120 no. Uwhremu na a te ti te ilele 3,000 gbe 5,000. (Iruẹru 1:15; 2:41; 4:4) Kẹsena, “otu ilele na a te dhe evievihọ.” (Iruẹru 6:7) Epọvo na re, evaọ ọgbọna, ma rẹ gbẹ lẹ Olori na kẹ iwhowho Uvie efa! Nya lele elẹ mai, owhowho-uvie ukoko kpobi ọ rẹ gbae mu re o w’obọ evaọ odibọgba na k’amara k’amara.
9 Iviena rri April ziezi evaọ 2000 Calendar na. Nọ edẹ ivẹ ọsosuọ amara na e rọ Ẹdẹ-Ọmaha gbe Ẹdoka na, kọ whọ sae m’omaa re who kpohọ usiuwoma evaọ urere oka oyena, re whọ kaki muhọ evaọ amara na? Kọ whọ sae tha “Ẹdẹ Emagazini” kpobi uke evaọ amara na kugbe utu Uwuhrẹ Obe Ukoko ra? Kọ ẹvẹ kpahe ẹraha auwa ọvo hayo bu viere k’Ẹdoka k’Ẹdoka evaọ odibọgba na? Kọ whọ sai ru ọruẹrẹfihọ re who kpohọ isẹri-ise owọwọ jọ? Yọ o thọrọ owhẹ ẹro ho re who se isẹri ọnyakuo evaọ obọ iruo, isukulu, hayo evaọ iruẹru ekẹdẹ kẹdẹ ra. Kpokahọ edẹ nọ whọ sae te jọ raha oke jọ evaọ odibọgba na, jẹ rehọ ukeledẹ na nya lele oke usiuwoma ota ra evaọ amara na.
10 April ọ te jọ obọdẹ oke kẹ ahwo nọ i te kpobi gbe enọ ekpako na a kuenu kẹ no re a mu iruo họ wọhọ iwhowho-uvie nọ e te họ-ame he. Who te bi wuhrẹ Ebaibol kugbe ohwo jọ, kọ ohwo na ọ nyaharo ziezi no te epanọ ọ sae rọ nyabru ọsẹro ukoko na re ọ yare sọ a sai roro kpahe iẹe kẹ ete wọhọ owhowho-uvie emamọ usi na? Who te wo emọ nọ e te họ-ame he, kọ whọ ta kpahe ẹnyaharo abọ-ẹzi rai kugbe ekpako na no? Kọ onana o gbẹ rọ obọdẹ oke kẹ ae nọ a re ro muọ usiuwoma ota họ?—Rri Our Ministry, ẹwẹ-obe avọ 97-100.
11 Evaọ omodawọ mai re ma ru April 2000 fihọ amara nọ ọ mai woma k’omai, u re fo re mai kpobi ma w’obọ evaọ odibọgba na re ma jẹ niyẹrẹ iruo mai evaọ urere amara na. (Wawo Mak 6:30.) Ma rẹ tuduhọ iwhowho-uvie ekpokpọ nọ e te họ-ame he nọ i muọ usiuwoma ota họ obọ awọ re a niyẹrẹ iruo rai evaọ ẹruoke. Ẹkwoma eruo ẹkabọ mai, ma rẹ sai fiba iyẹrẹ April na je fiba ubo ulogbo orọ ajiri nọ u re te Jihova ẹkwoma omodawọ isẹri-ise mai na.
12 Wha Amọfa Lele Oma Ziọ Ekareghẹhọ Na: Kọ o gbẹ te were omai re ma ruẹ unu okpokpọ nọ o mai bu evaọ Ekareghẹhọ 2000 ọrọ uwhu Kristi na? E! U ti dhesẹ nọ unu ahwo nọ o mai bu kpobi a kuomagbe ti dhesẹ ovuhumuo rai kẹ odhesẹvia uyoyou nọ o mae rro nọ Jihova Ọghẹnẹ gbe Jesu Kristi a dhesẹ k’omai! (Jọn 3:16; 15:13) Ru ọruẹrẹfihotọ nọ o gwọlọ kpobi re whọ ruẹ nọ uvumọ oware o whaha owhẹ gbe uviuwou ra ekpohọ Ekareghẹhọ na ha.
13 Enẹna họ oke nọ ma re ro muọ amọfa họ ezizie ziọ Ekareghẹhọ na. Hai kere edẹ ahwo nọ who ti zizie fihọ otọ. Kuọ ahwo nọ a wuhrẹ Ebaibol no vẹre kugbei, enọ i bi wuhrẹ obọnana, gbe izihebro ra kpobi. Kuọ egbẹrioma ra evaọ obọ iruo, eva obọ isukulu, gbe okegbe ra, gbe enọ who bi lele thueki kpobi kugbei. Egbẹnya ra efa gbe imoni ra e thọrọ owhẹ ẹro ho. Who te kere edẹ na kpobi no, hae r’unu zizie ai. Dhesẹ oke gbe oria nọ a ti jo ru Ekareghẹhọ na vevẹ. Nọ April 19 o bi sikẹle na, hae kareghẹhọ enọ who kere fihotọ na. Ta nọ wha ti gbe kpohọ Ekareghẹhọ na evaọ aso ọyena.
14 Nya lele ọkpọvio anwẹdẹ ọrọ Society na, ugboma ekpako na a ti ru obọdẹ omodawọ re a tuduhọ iwhowho-uvie kpobi nọ e siọ usiuwoma ota ba no evaọ ẹkwotọ na awọ re a ziọ Ekareghẹhọ na. (Mat. 18:12-14) Ekpako na a te gwọlọ kiẹ ileta Society na riwi ọrọ February 2, 1999. Okere-obe ukoko na o re kere edẹ iwhowho-uvie nọ e siọ usiuwoma ota ba no kpobi fihọ otọ, ọsẹro usiuwoma ota na o ve vi ekpako re a se ai je zizie ai ziọ Ekareghẹhọ na. Ẹsejọhọ ẹkwoma ewo iweze ẹruorote uduotahawọ nana evaọ ẹruoke, a rẹ sai fiobọhọ kẹ enana nọ e siọ usiuwoma ota ba no na wariẹ muọ usiuwoma ota họ, makọ evaọ April. O te jọ ọbọga kẹ ae re a zizie ai re a nya lele iwhowho-uvie nọ i wo ona evaọ usiuwoma ota na.
15 Tuduhọ Ahwo Awọ re A Fiobọhọ Evaọ April! O te gwọlọ obọdẹ ọruẹrẹhọ evaọ abọ ekpako na kpobi, idibo iruiruo na, gbe enọ i wuzou uviuwou re a ru April 2000 na fihọ amara nọ ọ mai woma kpaobọ k’omai. Ekpako na a te daoma re a ruẹrẹ eware họ kpatiẹ jẹ kobaro. (Hib. 13:7) A re ru obọdẹ ọruẹrẹfihotọ rọkẹ iwuhrẹ kẹ usiuwoma ota evaọ edẹ oka na gbe urere oka na. A sae ruẹrẹ iwuhrẹ usiuwoma ota efa họ evaọ oke uvo gbe iruẹru akọ owọwọ. A re fi omaa iruo nọ a ruẹrẹhọ kẹ April kpobi fihọ ebọdo ovuẹ na. A rẹ rehọ ohwo jọ mu nọ o re ru ewuhrẹ kẹ usiuwoma ota na kpobi. A rẹ gwọlọ ẹkwotọ fihọ ziezi re enọ e ziọ ewuhrẹ usiuwoma ota na a ruẹ oria nọ a re jo ruiruo.
16 Evaọ etoke April a ti fi emagazini ọ Uwou-Eroro gbe Awake! na họ ada. Evaọ omodawọ re a muọ iwuhrẹ Ebaibol họ, a re fi ibroshọ Gwọlọ na họ ada kẹ ọnọ o dhesẹ isiuru kpobi. Fikiere, wha re wo emagazini gbe ibroshọ na buobu fihọ obọ.
17 Evaọ urere amara na, iwuhrẹ obe-ukoko kpobi gbe ethabọ rai a rẹ tuduhọ enọ e rọ utu rai kpobi awọ re a niyẹrẹ rai vẹrẹ vẹrẹ evaọ urere amara na. A rẹ sai tube ru onana dede evaọ Ẹdoka, April 30. Kẹsena, nọ okere-obe na o bi kere iyẹrẹ na kugbe na, o te muẹrohọ nnọ iwhowho-uvie jọ a te niyẹrẹ hẹ, ọ rẹ sae nọ ae taure May 6 o te ti te, okenọ o re ro vi iyẹrẹ ukoko na se Society. Ọ rẹ sae vuẹ iwuhrẹ obe ukoko re a fiobọhọ kẹe mi iyẹrẹ iwhowho-uvie na.
18 Ezi Ekareghẹhọ na yọ oke nọ o mai w’uzou evaọ ukpe na kẹ ahwo Ọghẹnẹ. O rẹ jọ oke nọ mai kpobi a re ro dhomahọ iruo Jihova vọvọ. O te jọ ere otẹrọnọ ohwo kpobi o w’obọ vọvọ wọhọ owhowho-uvie emamọ usi na, otẹrọnọ enọ oma u vẹ a rẹ sai fi obe họ kẹ ọkobaro obufihọ, yọ otẹrọnọ ma wo osegboja re ma rehọ amọfa kugbe oma ziọ Ekareghẹhọ uwhu Kristi na. Joma lẹ ziezi kẹ eghale efe Jihova nọ ma be daoma ru April 2000 fihọ amara nọ ọ mai woma kpaobọ k’omai na, enana kpobi kẹ ujiro gbe oruaro Ọghẹnẹ!—Hib. 13:15.
[Blurb on page 3]
Ekobaro Obufihọ
Unu nọ O Mai Bu Kpobi: 19,218
(March 1997)
[Box on page 4]
Iwhowho-Uvie
Unu nọ O Mai Bu Kpobi: 226,539
(September 1999)
[Box on page 5]
Enọ E Ziọ Ehaa Ekareghẹhọ
Unu nọ O Mai Bu Kpobi: 598,717
(1997)