Wo Ọwhọ kẹ Oware Uwoma!

¹ Nọ ma be ruọ ezi Ekareghẹhọ ọrọ ukpe ọ 2003 na, ma wo ẹjiroro buobu nọ ma re ro dhesẹ ‘ọwhọ kẹ oware uwoma.’ (1 Pita 3:13) Onọ o mae jọ enana karo họ idhe ẹtanigbo Jesu Kristi na. (Mat. 20:28; Jọn 3:16) Kpahe onana, Pita ukọ na o kere nnọ: “A ta owhai no idhere uvru nọ e reria owhai obọ . . . orọnikọ orọ eware ne rẹ raha rọ idọlọ-efuafo hayo idọlọ-oro ho; rekọ orọ azẹ ọghaghae Kristi, wọhọ ọrọ omogodẹ nọ kare ẹyao hayo epe.” (1 Pita 1:18, 19) Uyere nọ ma rẹ kẹ fiki odhesẹvia ologbo ọrọ uyoyou nana o rẹ wọ omai ru iruo buobu evaọ ewoma oruo, vuhumu nnọ Jesu “ọ rehọ omariẹ kẹ omai re ọ ta omai no eyoma kpobi je ru ahwo riẹ fo kẹ oma riẹ enọ e rehọ oma rai kẹ iruo iwoma iruo.”—Tait. 2:14; 2 Kọr. 5:14, 15.

² Okenọ ma te ru oware nọ o rẹ were Ọghẹnẹ, ma rẹ reawere emamọ usu kugbe ei ma vẹ jẹ jọ otọ ẹruọsa oyoyou riẹ. Pita ọ ta haro nnọ: “Ọnọ o re you uzuazọ ọ jẹ ruẹ edẹ iwoma, . . . jọ [o si oma] no oware uyoma re o ru onọ ukiẹrẹe; [jọ ọ] guọlọ udhedhẹ re o lele ei. Keme Ọnowo ọ be tẹro riẹ muẹ enọ ikiẹrẹe, ezọ riẹ i rovie kẹ elẹ rai.” (1 Pita 3:10-12) Evaọ etoke imuozọ nana, ẹvẹ oghale riẹ o rro te re ma riẹ nnọ Jihova ọ be sẹro mai yọ u no rie eva ze re ọ thothọ mai, re ọ “sẹro [mai] wọhọ ọmọ-ẹro riẹ.”—Izie. 32:10; 2 Irv. 16:9.

³ Ghelọ edawọ nọ a rẹriẹ aro dhe, Ileleikristi ọsosuọ nọ Pita o kere se na a vọ avọ ọwhọ nọ a rẹ sai furie he, yọ a vuẹ emamọ usi na kẹre te epanọ o sae lọhọ te. (1 Pita 1:6; 4:12) Epọvo na o rrọ kpahe ahwo Ọghẹnẹ inẹnẹ re. Dede nọ ma be rria “oke ẹbẹbẹ,” ovuhumuo kẹ ewoma Jihova o rẹ wọ omai rehọ ọwhọ ru oreva Ọghẹnẹ. (2 Tim. 3:1; Ol. 145:7) Jọ ma roro kpahe iruo iwoma jọ nọ ma rẹ jọ owhreze rai evaọ ezi Ekareghẹhọ nana.

⁴ Zizie Amọfa Kpohọ Ekareghẹhọ Na: Edhere jọ nọ ma sai ro dhesẹ ovuhumuo mai kẹ okẹ ulogbo orọ ẹtanigbo na họ ekpohọ ekareghẹhọ ẹgbukpe orọ uwhu Jesu na, onọ a ti ru enukpe nana evaọ Edesa-Oka, April 16, nọ ọre o te kiediwi no. (Luk 22:19, 20) Ukpe n’ukpo, evaọ ikoko 94,600 nọ e n’iyẹrẹ wariẹ akpọ na họ, ahwo kpobi nọ a nya a bu te 15,597,746! Oyena o rehọ 220,000 bu vi ahwo nọ a nya evaọ ukpe odekọ.

⁵ Bro ahwo a te nya enukpe nana? O te mae rọ oma hwa omodawọ osegboja mai nọ ma rọ ta udu họ amọfa awọ re a kokohọ kugbe omai. Muhọ ẹkwoma ekere fihotọ edẹ ahwo nọ whọ gwọlọ zizie. Ahwo uviuwou ra whọ rẹ kaki kere. Otẹrọnọ ọrivẹ-orọo ra ọ rrọ ukoko ho, ta kẹe epanọ o rrọ owhẹ oja te re o lele owhẹ nya. Ọzae ọ oniọvo jọ nọ ọ rrọ ukoko ho ọ ta nnọ oware nọ u ru rie kpohọ Ekareghẹhọ na ukpe n’ukpe họ fiki nọ o vuhumu inọ ẹnya riẹ o rrọ oware ulogbo kẹ aye riẹ. Who te kere ahwo uviuwou ra no who ve je kere imoni ra, ahwo okegbe ra, ibe-iruiruo, hayo ibe emọ-isukulu ra. Ruẹ nnọ who zizie emọ-uwuhrẹ Ebaibol ra.

⁶ Nọ who te kere edẹ na no, ruẹrẹ oke fihọ nọ whẹ oma ra dẹẹ o re ro zizie ai omomọvo. Kẹ ae obe-uzizie Ekareghẹhọ na. Re u fi obọ họ kẹ ahwo na kareghẹhọ oke gbe oria nọ a te jọ ru ehaa na, roma totọ kere oke gbe oria Ekareghẹhọ na fihọ obotọ obe-uzizie na. Nọ April 16 o bi si kẹle na, kareghẹhọ ahwo nọ who kere fihọ otọ, whọ sai weze bru ai hayo whọ sai fonu rai. J’oma fi obọ họ kẹ ahwo buobu te epanọ o rẹ sae lọhọ te re a jariẹ evaọ etoke nana nọ ọ mae rrọ oke ọghọ na.

⁷ Fi Obọ Họ kẹ Ahwo nọ A Kpohọ Ekareghẹhọ Na: Aso Ekareghẹhọ na ọ rẹ kẹ omawere gaga. Ma wo uvẹ nọ ma re ro dede ahwo nọ a re kpohọ iwuhrẹ mai vẹre he rehọ. Ru ọruẹrẹfihotọ re whọ kaki te obei jẹ rria lehie, wọhọ epanọ uyero obonẹ o kẹ uvẹ riẹ. Rọ iroro obọra bikẹle ahwo ọkpokpọ nọ a nyaze na re whọ riẹ ae ziezi. Jọ sasasa je dhesẹ oma odederehọ.—Rom 12:13.

⁸ Kọ a sai fi obọ họ kẹ ahwo jọ nọ a kpohọ Ekareghẹhọ na re a ru ẹnyaharo abọ-ẹzi viere ẹkwoma obe-uwuhrẹ Ebaibol? Daoma rehọ odẹ gbe adrẹse ọrara kpobi nọ a bi weze bru enẹna ha re who fi obọ họ kẹe. Ẹkwoma uketha uyoyou, ahwo nana jọ a sae nyaharo te epanọ a re ro te wọhọ iwhowho-uvie nọ e re họ-ame he taure Ekareghẹhọ ukpe n’otha u te te. Oke nọ who te bi zihe bru ahwo nọ a kpohọ Ekareghẹhọ, zizie ai kpohọ ovuẹ ogbotu obọdẹ nọ a te kẹ evaọ April 27 na re.

⁹ Kọ Whọ Sai Ru Ọkobaro-Obufihọ Evaọ Ezi Ekareghẹhọ Nana? K’ukpe k’ukpe ọwhọ mai kẹ Jihova ọ rẹ wọ omai rọ ẹgba mai ruiruo vọvọ evaọ odibọgba na evaọ etoke emerae ọ obọdẹ iruo na. Ukpe n’ukpo evaọ Nigeria, ekobaro obufihọ i bu te 16,101 evaọ March gbe 13,487 evaọ April. Omodawọ okugbe orọ ukoko na soso re a vuẹ emamọ usi na avọ ọwhọ evaọ ezi Ekareghẹhọ na o rẹ sae wha iyẹrẹ iwoma ze.

¹⁰ Ukoko jọ nọ u wo iwhowho-uvie 107 gbe ekobaro oke-kpobi 9 o n’iyẹrẹ nnọ April n’okpo na ọ jọ “amara nọ ọ viodẹ,” keme ahwo 53 a ru ọkobaro obufihọ, te ekpako gbe idibo-iruiruo na kpobi. Ẹvẹ ekpako na a rọ bọ ọwhọ kẹ iruo ọkobaro obufihọ amara yena? A mu rie họ ẹruoke, jẹ ta udu họ ahwo buobu awọ re a fi obe họ. A je ru iwuhrẹ kẹ usiuwoma ota evaọ oke sa-sa evaọ okpẹdẹ na re u kiehọ ahwo ukoko na kpobi oma.

¹¹ Oniọvo-ọmọtẹ jọ nọ ọ kpako te ikpe 86 no, ọnọ ọ rẹ sae nya-onya ha fiki ẹbẹbẹ ẹyao, o fi obe họ kẹ ọkobaro obufihọ. O re muhọ evaọ ohiohiẹ, o ve ru isẹri-ise ifonu umutho euwa jọ yọ ọ keria obọ ikichini, o ve serihọ umutho euwa jọ, ọ vẹ wariẹ zihe ze ti ru isẹri-ise nya h’aro. Ọzae gbe izoge-emezae ivẹ erọ aye jọ nọ o lele ta ẹme a whu evaọ ikpe ivẹ nọ i kpemu, yọ aye na o wo otoriẹ oware nọ Ọghẹnẹ ọ jẹ kẹ eyoma otiọye uvẹ re ọ via ha. O se isẹri kẹe ziezi, a te muọ uwuhrẹ Ebaibol họ. Onana u dhesẹ nnọ ọwhọ kẹ Jihova ọ rẹ sae wọ makọ enọ oma rai o ga ha re a dao ẹgba rai kpobi evaọ odibọgba na evaọ etoke emerae obọdẹ iruo na. Ahwo nọ a wo ifonu hu a rẹ sae jẹ daoma re. Ahwo jọ nọ a sae nya ha a rẹ sae keria oria nọ a jẹ sae ta usiuwoma kẹ ahwo nọ a be nya vrẹ.

¹² Ekpako na i ku iyẹrẹ na họ inọ: “Ma wo omawere gaga ma tẹ jẹ kẹ uyere fiki uvẹ iruo na gbe eghale nọ Jihova o ru lọhọ k’omai omomọvo.” Ẹkwoma emamọ omaa, ukoko rai o sae reawere eghale itieye na re.

¹³ Daoma Wo Obọ Vọvọ Evaọ Odibọgba Na: Uyoyou mai kẹ Ọghẹnẹ gbe ọrivẹ o rẹ wọ omai dẹ oke k’amara k’amara re ma vuẹ amọfa emamọ usi na. (Mat. 22:37-39) Esẹro Uwuhrẹ Obe Ukoko gbe ethabọ rai a rẹ daoma re a fi obọ họ kẹ ahwo nọ a rrọ utu rai re a w’obọ evaọ odibọgba na k’amara k’amara. Obọdẹ edhere jọ nọ a re ro ru onana họ ẹkwoma eruẹrẹfihotọ nọ a re ru ẹruoke re a lele uzedhe ahwo jọ evaọ utu na ru iruo evaọ odibọgba na. Viukpenọ whọ hẹrẹ te urere amara re who te ru onana, kaki muhọ re a sae n’iyẹrẹ evaọ udevie amara na. Onana o te kẹ owhẹ uvẹ buobu nọ whọ rẹ rọ kẹ uketha uyoyou.

¹⁴ Kọ ahwo nọ oma rai o ga ha nọ o rrọ bẹbẹ kẹ re a w’obọ evaọ odibọgba na a rrọ utu obe uwuhrẹ ra? Otẹrọnọ ejọ e rrọ ẹsipito hayo a rrọ evaọ iwou obọrai, o rrọ vevẹ inọ uvẹ isẹri ise rai o te jọ kakao. Rekọ ẹkwoma umutho uvẹ nọ a wo na nọ a re ro ru re elo rai o lo via, a rẹ sai ru nọ ahwo nọ a be ruẹ iruo iwoma rai a je wo uvi isiuru kẹ uzẹme na. (Mat. 5:16) Esẹro uwuhrẹ obe ukoko a re muẹrohọ nnọ ahwo otiọye na a riẹ nnọ a sae n’iyẹrẹ usiuwoma ota iminiti 15. Nọ a tẹ sae n’iyẹrẹ oke nọ a raha ro se isẹri na o rẹ ta udu họ iwhowho-uvie ẹrọwọ nana awọ, yọ o rẹ wha iroro evevọwẹ avọ oghọghọ se ai. U re je fi obọ họ ruẹ nnọ iyẹrẹ akpọ soso erọ iruo ahwo Ọghẹnẹ e gbunu.

¹⁵ Izoge nọ E Rrọ Owhreze Oware Uwoma Uruo! Ẹvẹ o rẹ sasa oma te re a ruẹ izoge Ileleikristi nọ e be rehọ ẹgba rai ruiruo evaọ iruo Jihova! (Itẹ 20:29) Otẹrọnọ whẹ yọ uzoge, ẹvẹ whọ sai ro dhesẹ ọwhọ ra kẹ Jihova evaọ etoke emerae iruo obọdẹ nana?

¹⁶ Otẹrọnọ who ri te owhowho-uvie nọ ọ re họ-ame he evaọ ukoko na, kọ whọ sai te kẹ uvẹ-ọghọ yena? Nọ oma ra enọ nana: ‘Kọ me wo eriariẹ uzẹme Ebaibol nọ e r’oja? Kọ mẹ gwọlọ w’obọ evaọ odibọgba Uvie na? Mẹ rrọ emamọ oriruo evaọ uruemu mẹ? Kọ mẹ be sai dhesẹ ẹrọwọ mẹ via ẹkwoma amọfa nọ mẹ rẹ ta kẹ kpahe emamọ usi na? Kọ udu mẹ o be wọ omẹ ru ere?’ Otẹrọnọ whọ rẹ sai yo E rọkẹ enọ yena, ta kẹ ọsẹgboni ra nnọ whọ gwọlọ jọ owhowho-uvie. Ọsẹgboni ra a rẹ sae ta kẹ ọkpako jọ nọ ọ rrọ omọvo ogbẹgwae iruo ukoko na.

¹⁷ Otẹrọnọ whọ rrọ owhowho-uvie emamọ usi na no, kọ whọ sae rehọ uvẹ ehọlide ru ẹkẹ abọ ra kẹre evaọ odibọgba na? Ẹkwoma omaa avọ uketha ọsẹgboni gbe amọfa, izoge buobu nọ e họ-ame no a sai ru ọkobaro obufihọ no. Oyena o gbẹ lọhọ họ, gbae mu re who ru ẹkẹ abọ ra evaọ iruo odibọgba na kẹre. Fi ute họ kẹ oma ra. U te no ute unu euwa jọ nọ who re fihọ no, fi ute ofa họ kpahe eru woma ona odibọgba ra. Ẹsejọhọ whọ sae daoma se ikereakere jọ evaọ unuẹthẹ kpobi, ru izihebro ra woma viere, muọ uwuhrẹ Ebaibol họ, hayo ru odibọgba ra kẹre te isẹri-ise ifonu hayo abọfa jọ ọrọ odibọgba na. Kọ ẹvẹ kpahe ute ọ ọrivẹ ra, ibe ọmọ-isukulu ra, hayo omoni ra nọ o re lele owhẹ kpohọ Ekareghẹhọ enukpe nana? Obọ nọ who re wo vọvọ evaọ iruo Uvie na o te kẹ owhẹ erere yọ ababọ avro o te ta udu họ amọfa awọ evaọ ukoko na.—1 Tẹs. 5:11.

¹⁸ Fi Obọ Họ kẹ Ahwo Ọkpokpọ Nyaharo: Evaọ etoke ukpe iruo nọ o vrẹ na, a tẹ ghale iẹe, a ru ebe-iwuhrẹ Ebaibol 407,243 k’amara k’amara evaọ Nigeria. Evaọ obaro, emọ-uwuhrẹ nana jọ buobu a te nyaharo te omaromudhe gbe ame-ọhọ. Dede na, taure a te ti te ute yena, o gwọlọ re ma fi obọ họ kẹ ae re a te wọhọ iwhowho-uvie emamọ usi na. Onana yọ owojẹ nọ u w’uzou evaọ ewuhrẹ ahwo ọkpokpọ re a jọ ilele Jesu Kristi. (Mat. 9:9; Luk 6:40) Kọ who wo ọmọ-uwuhrẹ Ebaibol jọ nọ ọ ruẹrẹ oma kpahe no re ọ jẹ owọ yena?

¹⁹ Otẹrọnọ ẹnyaharo ọmọ-uwuhrẹ ra o mu owhẹ ẹro ho, yare obufihọ ọsẹro uwuhrẹ obe ukoko ra hayo ọsẹro usiuwoma ota. Ẹsejọhọ whọ sai zizie ei re o kuomagbe owhẹ evaọ uwuhrẹ na. Inievo enana a wo obọdẹ ona nọ whọ rẹ sai fihọ iruo rọ wawo ẹnyaharo abọ-ẹzi ọmọ-uwuhrẹ. A sae jiroro nọ i re fi obọ họ kẹ ọmọ-uwuhrẹ na ruabọhọ ẹnyaharo abọ-ẹzi.

²⁰ Okenọ ọmọ-wuhrẹ ra o te dhesẹ isiuru re ọ jọ owhowho-uvie nọ ọ re họ-ame he yọ who roro nnọ o te, ta kẹ ọsẹro ukoko na. O ti ru ọruẹrẹfihọ re ekpako ivẹ i lele owhẹ gbe ọmọ-uwuhrẹ na jiroro sọ o te, ẹkwoma evuẹ nọ e rrọ ẹwẹ-obe avọ 98-99 ọrọ obe ọ Our Ministry na. (Rri Uwou-Eroro Na ọrọ November 15, 1988 [ọrọ oyibo], ẹwẹ-obe avọ 17.) A te kuenu kẹ ọmọ-uwuhrẹ na re ọ jọ owhowho-uvie, whọ rẹ nwani mu ei họ ewuhrẹ ababọ oke oraha. Nọ ọ tẹ nwane n’iyẹrẹ usiuwoma ota no, a te vuẹ ukoko na inọ ọmọ-uwuhrẹ na yọ owhowho-uvie nọ ọ re họ-ame he. Ẹruore mai họ idu erọ iwhowho-uvie ekpokpọ na, te emaha te ekpako, a rẹ sai te ute ulogbo nana evaọ etoke obọdẹ emerae iruo nana.

²¹ Omaa-Oma U re Fi Obọ Họ K’omai Ru te Ẹgba Mai Kpobi: Omaa nọ a rẹ ma fihotọ eva ẹruoke u re fi obọ họ gaga evaọ obokparọ iruo Uvie mai evaọ ezi Ekareghẹhọ nana. (Itẹ 21:5) Eware buobu e riẹ nọ o gwọlọ nnọ ekpako na i re muẹrohọ.

²² Re u fi obọ họ kẹ ukoko ru te ẹgba rai kpobi evaọ odibọgba na, ekpako na i re ru eruẹrẹfihotọ re a ru iwuhrẹ kẹ usiuwoma ota evaọ edẹ ẹkpoka na kpobi gbe evaọ urere oka. Ọsẹro usiuwoma ota ọ rẹ k’obaro evaọ eruo eruẹrẹfihotọ nana. Kọ o sae gwọlọ nnọ a re ru ọruẹrẹfihọ iwuhrẹ usiuwoma ota efa kẹ irioke, udevie uvo, gbe akọ owọwọ? A rẹ vuẹ ukoko na kpahe eruẹrẹfihotọ na. O rẹ sai fi obọ họ otẹrọnọ a ta omaa na mu ebọdo ovuẹ na.

²³ Ekpako na e rẹ ruẹ nnọ a ru eruẹrẹfihotọ kẹ Ekareghẹhọ na evaọ ẹruoke taure April 16 o te ti te. Eruẹrẹfihotọ nana jọ họ ẹmeọta kugbe ikoko efa nọ a te gbẹ jọ Ọgwa Uvie na ru ehaa na, erufuọ Ọgwa Uvie na, ẹsalọ eruẹrẹahwohọ gbe enọ e rẹ wọ ebrẹdi gbe udi na, gbe ewotobọ ebrẹdi avọ udi na. A rẹ vuẹ ukoko na kpahe oke gbe oria nọ a te jọ ru Ekareghẹhọ na gbe enwene kpobi nọ a ru evaọ omaa iwuhrẹ oka oyena. Ẹruorote eware nana avọ osegboja o rẹ lẹliẹ ehaa na ‘nya ziezi jẹ jọ kpatiẹ.’—1 Kọr. 14:40.

²⁴ Enọ i wo uzou iviuwou a sae gwọlọ rehọ abọjọ ewuhrẹ uviuwou rai rọ ta kpahe epanọ uviuwou na o sai ro w’obọ evaọ erubu iruo Uvie evaọ ezi Ekareghẹhọ na. Kọ uviuwou ra kpobi o sai ru ọkobaro obufihọ? Hayo kọ uviuwou na o sae tha ohwo hayo ahwo uviuwou na jọ uke re a ru ere? Oyena o gbẹ lọhọ họ, wha fi ugogo itee jọ họ wọhọ uviuwou re wha raha oke vi epaọ anwẹdẹ evaọ odibọgba na. Kọ ọmaha jọ ọ rrọ uviuwou na nọ, a tẹ kẹe uduotahawọ gbe uketha jọ, ọ rẹ sai te wọhọ owhowho-uvie nọ ọ re họ-ame he? Bro ahwo uviuwou ra o rẹ sai zizie kpohọ Ekareghẹhọ na enukpe nana? Emamọ omaa o te wha eghale gbe oghọghọ buobu se uviuwou ra.

²⁵ Rehọ Uvẹ Oke nọ U Kiọkọ na Ruiruo Vọvọ: Nọ o je kere se Ileleikristi ikpe-udhusoi ọsosuọ, Pita ukọ na ọ kareghẹhọ ae kpahe ovẹrẹ ọ oke na keme urere eyero-akpọ ahwo Ju u si kẹle no. (1 Pita 4:7) Nẹnẹ na imuẹro na i dhesẹ nnọ urere uyero-akpọ inẹnẹ o kẹle no re. N’ẹdẹ ruọ ẹdẹ, u fo re oghẹrẹ nọ ma bi yeri uzuazọ mai u dhesẹ imuẹro yena via. Wọhọ idibo ọwhọ erọ Jihova, ma rẹ tẹrovi iruo ekpakpata erọ ewhowho emamọ usi na.—Tait. 2:13, 14.

²⁶ Enẹna họ oke nọ a re ro dhesẹ ọwhọ je kru obọ ga! Roro kpahe eware nọ Jihova o ru kẹ owhẹ, uviuwou ra, gbe ukoko na no. Dede nọ ma rẹ sae hwosa kẹ Jihova rọkẹ idhere buobu nọ o ro fi obọ kẹ omai no ho, ma rẹ sae rehọ egagọ ẹwẹ mai kpobi kẹe. (Ol. 116:12-14) Ma ti wo eghale nọ i no ehru ze rọkẹ omodawọ osegboja mai. (Itẹ 10:22) Jọ mai kpobi ma ‘wo ọwhọ kẹ oware uwoma’ eva etoke iruo obọdẹ buobu nana, “re Ọghẹnẹ ọ ruẹse wo ajiri eva eware kpobi fiki Jesu Kristi.”—1 Pita 3:13; 4:11.

[Box on page 3]

Ahwo nọ A Ziọ Ekareghẹhọ na Wariẹ Akpọ Họ

199914,088,751

200014,872,086

200115,374,986

200215,597,746

[Box on page 4]

Ono Who ti Zizie Kpohọ Ekareghẹhọ Na?

□ Uviuwou ra gbe imoni ra

□ Ahwo okegbe gbe egbẹrioma ra

□ Ibe-iruo gbe ibe emọ-isukulu ra

□ Izihebro gbe emọ-uwuhrẹ Ebaibol ra

[Box on page 5]

Fi Obọ Họ kẹ Ahwo nọ A Kpohọ Ekareghẹhọ Na

□ Dede ae rehọ sasasa

□ Zihe bru rai

□ Ta kẹ ae kpahe uwuhrẹ Ebaibol

□ Zizie ai kpohọ ovuẹ obọdẹ na

[Picture on page 6]

Itee Vẹ Who Wo kẹ Ezi Ekareghẹhọ Na?

□ Ruẹ nọ ohwo jọ nọ who zizie o kpohọ Ekareghẹhọ na

□ Te wọhọ owhowho-uvie emamọ usi na

□ Raha unu euwa jọ evaọ odibọgba na

□ Nyaharo evaọ abọjọ odibọgba na

□ Ru ọkobaro obufihọ