Eriariẹ Ọghẹnẹ E rẹ Kuyo Enọ Buobu
1 Taure who te ti wo eriariẹ egbagba uzẹme na, o sae jọ nọ who wo enọ buobu kpahe uzuazọ nọ whọ sae kuyo rai hi. Ẹvẹ eva e were owhẹ te nọ who wo iyo nọ i no Ebaibol ze kẹ enọ enana! Enẹna whọ be sai fiobọhọ k’amọfa re a duku iyo evo eyena re. (Wawo 2 Timoti 2:2.) Whọ rẹ sae ghale eriariẹ Ọghẹnẹ nọ i re su kpohọ uzuazọ ebẹdẹ bẹdẹ kugbe ai. (Jọn 17:3) Rekọ ẹvẹ whọ sai ro fiobọhọ k’ohwo ruẹ aghare eriariẹ enana? Whaọ, roro kpahe enọ nọ uzẹme na o kuyo rai k’owhẹ no. Eme ahwo nọ e be gwọlọ uzẹme na a gwọlọ riẹ? Eroro kpahe eware enana i re fiobọhọ k’owhẹ fi obe na Eriariẹ Nọ I Re Su Kpohọ Uzuazọ Ebẹdẹ Bẹdẹ họ ada. Ezọhọfihọ nọ e rọ obotọ na e rẹ sai fiobọhọ k’owhẹ nọ whọ tẹ be ruẹrẹ oma kpahe kẹ isẹri ise evaọ amara ọ June.
2 Nọ u bi gbe ahwo buobu unu kpahe oware nọ uye-oruẹ u je bu akpọ t’enẹ na, eme enana e rẹ sai fiobọhọ wo emamọ iyẹrẹ:
◼ “Okenọ oware okpẹtu o tẹ via hayo nọ iruẹru ethube gbe ozighi i te bi vihọ, ahwo a rẹ nọ kpahe oware nọ o soriẹ nọ eyero iyoma itieye e jẹ be via. Kọ didi uyo whọ rẹ kẹ?” Kuvẹ kẹ uyo je yere ohwo na kẹ uyo riẹ. Who ve rovie kpohọ uzou avọ 8 evaọ obe Eriariẹ na, who ve si ẹjiroro riẹ kpohọ oware nọ a ta evaọ edhe-ẹme avọ 2. Ru ei vevẹ nnọ obe onana o fodẹ eme nọ Ebaibol na ọ ta kpahe ẹjiroro nọ eware iyoma e jẹ be via, jẹ ta nọ: “Eva e te were omẹ re mẹ nyasiọ obe nana ba k’owhẹ evaọ azọhọ ₦55.”
3 Nọ who te bi zihe kpohọ oria nọ who je fi obe “Eriariẹ” na họ ada, whọ rẹ sae ta nọ:
◼ “Me wo isiuru evaọ ẹme nọ whọ ta kpahe oware nọ uye-oruẹ u je bu akpọ na t’enẹ. Kọ whọ rọwo uyo Ebaibol nọ a jọ obe na kẹ na?” Kuvẹ kẹ uyo. Se edhe-ẹme avọ 17 eva ẹwẹ-obe avọ 77 eva obe ọ Eriariẹ na, who ve je se Ahwo Rom 9:14 no Ebaibol ọnọ o wo uwou na ze. Whọ vẹ ta nọ: “Emamọ usi na họ orọnikọ Ọghẹnẹ ọ be wha edada gbe uye-oruẹ s’omai hi. Ọ yeyaa no nọ ọ te k’omai uzuazọ ebẹdẹ bẹdẹ evaọ udhedhẹ gbe evawere. Uzoẹme ọsosuọ evaọ obe nana họ ‘Whọ Sai Wo Obaro Evawere!’ Mẹ gwọlọ dhesẹ epanọ oyena o sae rọ jọ uzẹme k’owhẹ gbe iyoyou ra.” Rovie kpohọ uzou 1, who ve dhesẹ epanọ ma re ro wuhrẹ obe na. Wuhrẹ uzou na te epanọ eyero na o k’uvẹ te.
4 Whọ rẹ sae rehọ eme emuhọ nọ e roma via evaọ ẹwẹ-obe avọ 5 evaọ obe ọ “Ebaibol E rọ Jiroro” na t’ẹme, evaọ otọ uzoẹme ọ “Owho/Uwhu”:
◼ “Kọ whọ nọ no ẹdẹjọ sọ, ‘Uwhu họ urere ohwo kpobi?’ Hayo kọ oware ofa jọ o riẹ nọ ohwo o te whu no? [Kuvẹ kẹ uyo.] Ebaibol na ọ k’uyo onọ nọ ma rẹ sae nọ kpobi kpahe uwhu vevẹ. [Se Ọtausiuwoma Na 9:5, 10.] O te je dhesẹ re nọ uvi ẹruore o rọ kẹ ahwo nọ i wo ẹrọwọ. [Rovie kpohọ edhe-ẹme avọ 13 eva ẹwẹ-obe avọ 84 evaọ obe ọ Eriariẹ na; se jẹ fotọ eme Jesu nọ a re duku eva Jọn 11:25 na.] Uzoẹme onana o t’ẹme kpahe uyo onọ na, Eme o rẹ via kẹ iyoyou mai nọ i whu no? Obe onana o rẹ sae jọ ora evaọ azọhọ ₦55.”
5 Nọ who te bi zihe bru ohwo na, whọ rẹ sai yere iei whẹtiẹ whẹtiẹ whọ vẹ ta nọ:
◼ “Vẹre ma t’ẹme kpahe oware nọ o rẹ via nọ ohwo o te whu no. Ahwo buobu a rọwo inọ nọ ohwo o te whu no o re kpohọ odhiwu hayo ehẹle. Rekọ who roro no ẹdẹjọ kpahe oghẹrẹ nọ o rẹ lọhọ te re iwhuowhu na a wariẹ rria otọakpọ na? [Kuvẹ kẹ uyo.] Wọhọ epanọ Ebaibol na ọ ta, ahwo nọ a te kpare họ ahwo omarokpotọ nọ e te rọ otọakpọ na reuku. [Se Olezi 37:11, 29, whọ vẹ t’ẹme kpahe edhe-ẹme avọ 20 eva ẹwẹ-obe avọ 88 evaọ obe Eriariẹ na.] Ẹruore ọyena ọ kẹ ima ahwo buobu omosasọ no. Obe nana o ti fiobọhọ k’owhẹ wo otoriẹ ẹme ọnana viere. Mẹ sai dhesẹ epanọ ma re wuhrẹ iẹe k’owhẹ?”
6 Whọ tẹ gwọlọ ẹmeọta ọlọlọhọ, whọ rẹ sae dawo onana:
◼ “Mẹ gwọlọ dhesẹ uwoho jọ k’owhẹ evaọ obe onana, Eriariẹ Nọ I Re Su Kpohọ Uzuazọ Ebẹdẹ Bẹdẹ. Kọ uwoho onana o gbẹ were owhẹ?” Rovie obe na re ohwo nọ o wo uwou na ọ sae ruẹ ewẹ-obe avọ 4-5. Kuvẹ kẹ uyo. Who ve se eme nọ e rọ ẹwẹ-obe avọ 5 na. Kuhọ ta nọ: “Whọ rẹ sae rehọ obe onana re who sei k’omobọ ra evaọ azọhọ ₦55.” Nọ mi ei oke nọ u fo nọ who re ro zihe ze re wha t’ẹme na haro.
7 Ma wo eriariẹ Ọghẹnẹ nọ e rẹ kuyo enọ ilogbo uzuazọ. Ruẹrẹ oma kpahe ziezi, yọ Jihova ọ rẹ te ghale omodawọ ra re whọ ghale ovuẹ nana nọ o rẹ kẹ uzuazọ na kugbe ahwo nọ e be gwọlọ uzẹme na.