“Onana Họ Uzuazọ Ebẹdẹ Bẹdẹ”
1 A re se eme ọ Jesu nọ a kere fihọ Jọn 17:3 na gboja gaga. Orọnikọ o mu ta ha—inọ ẹrehọ eriariẹ Ọghẹnẹ gbe Kristi i dhesẹ uzuazọ ebẹdẹ bẹdẹ! Rekọ ewo eriariẹ Jihova gbe Jesu ọvo a rẹ rọ hwa omai osa uzuazọ ebẹdẹ bẹdẹ? Ijo. Emọ Izrẹl a riẹ nọ Jihova họ Ọghẹnẹ rai, rekọ edhere uzuazọ rai i dhesẹ ẹrọwọ ọyena ha. Fikiere, a te ku aruoriwo riẹ fiẹ. (Hos. 4:1, 2, 6) Nẹnẹ ima ahwo buobu a rẹ sae ‘wo ajọwha Ọghẹnẹ, rekọ a be nya lele eriariẹ egbagba ha.’ (Rom 10:2) U fo re a nyaze te riẹ Jihova, ‘Ọghẹnẹ uzẹme ọvuọvo na,’ re a je wuhrẹ epanọ a rẹ rọ gọe ziezi. Fiki onana, evaọ etoke November ma ti fi obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na họ ada. Eme whọ te ta ro fi obe Eriariẹ na họ ada? Ezọhọfihọ jọ nọ e rẹ sai fiobọhọ k’owhẹ ena.
2 Nọ iroro ẹria ebẹdẹ bẹdẹ evaọ otọakpọ o rọ oware okpokpọ kẹ ahwo buobu na, ẹme emuhọ ọnana ọ rẹ sai si ai urru:
◼ “Ma be nọ erivẹ mai onọ. Otẹrọnọ a zizie owhẹ re whọ rria akpọ nọ ọ wọhọ ọnana bẹdẹ bẹdẹ, kọ whọ rẹ jẹ uzizie na rehọ? [Dhesẹ ifoto nọ o rọ ewẹ-obe 4-5 na evaọ obe Eriariẹ na. Kuvẹ kẹ uyo.] Onana o sae ghinẹ jọ ẹkẹ evawere ra evaọ uzuazọ. Rekọ eme who roro nọ who re ru re who ghine woi tobọ? [Kuvẹ kẹ uyo.] Muẹrohọ oware nọ a gwọlọ wọhọ epanọ o rọ eva Jọn 17:3. [Sei.] Obe onana o bi fiobọhọ kẹ ahwo buobu wo oghẹrẹ obọdẹ eriariẹ enana. Whọ rẹ sai wo onana evaọ azọhọ ₦80. Evaọ iweze mẹ notha, ma te t’ẹme te oware nọ u je w’iroro re ma rọwo inọ ma sai wo uzuazọ ebẹdẹ bẹdẹ evaọ otọakpọ obonẹ.”
3 Nọ who te zihe bru ahwo nọ whọ t’ẹme kẹ kpahe Jọn 17:3, whọ rẹ sae nyaharo evaọ edhere ọnana:
◼ “Evaọ iweze mẹ n’ukpo, me se eme ọ igbunu Jesu k’owhẹ nọ a re duku eva Jọn 17:3, oria nọ ọ jẹ k’omai imuẹro inọ ẹrehọ eriariẹ Ọghẹnẹ gbe ọye omariẹ u re dhesẹ uzuazọ ebẹdẹ bẹdẹ. Rekọ ahwo buobu a rọwo inọ obọ odhiwu ọvo a sai jo duku emamọ uzuazọ. Eme who roro kpahe oyena? [Kuvẹ kẹ uyo.] Otẹrọnọ obe nọ whọ rehọ na o kẹle otọ, mẹ gwọlọ dhesẹ eria Ebaibol jọ k’owhẹ nọ i dhesẹ nọ a ti zihe Aparadase ziọ otọakpọ. [T’ẹme te edhe-eme 11-16 evaọ ewẹ-obe 9-10 evaọ obe Eriariẹ na.] Evaọ iweze mẹ notha, mẹ te gwọlọ dhesẹ k’owhẹ oware nọ who je fievahọ eyaa enana nọ a rẹ ruẹ evaọ Ebaibol na. Bọo okioye, whọ rẹ sai se uzou avọ 2 evaọ obe ra na.”
4 Whọ sae rọ enẹ mu ẹme họ kugbe ahwo nọ a wo oma egagọ:
◼ “Ma be t’ẹme kugbe erivẹ mai kpahe oware nọ o soriẹ nọ egagọ i je bu akpọ na tere. Egagọ nọ e rọ akpọ na soso i bu vi 10,000. Ghele, Ebaibol ọvuọvo ọ riẹ. Evaọ ẹjiroro ra, fikieme ozighi egagọ ọ jẹ riẹ? [Kuvẹ kẹ uyo. Rovie obe Eriariẹ na kpohọ uzou avọ 5, je se edhe-ẹme 1.] Who ti wo iyo nọ e rẹ v’eva kpahe enọ enana ẹkwoma ese uzou ọnana. Eva e te were omẹ re mẹ nyase obe onana ba k’owhẹ evaọ azọhọ ₦80 otẹrọnọ whọ gwọlọ kiẹe riwi.” Ọ tẹ rehọ iẹe, fi ẹdẹ họ nọ who re ro zihe, jẹ ta nọ: “Nọ me te zihe ze, ma te ta sọ egagọ kpobi yọ ọvuọ idhere riẹ nọ i bi su kpohọ oria ovo na.”
5 Nọ who te zihe re whọ t’ẹme te oware nọ o soriẹ nọ egagọ e jẹ rọ buobu enẹ, whọ rẹ sae ta enẹ:
◼ “Oke nọ mẹ rọ t’ẹme kugbe owhẹ, mẹ kpare onọ jọ sọ egagọ kpobi yọ ọvuọ idhere riẹ nọ i bi su kpohọ oria ovo na. Eme who roro kpahe oyena? [Kuvẹ kẹ uyo.] Mẹ gwọlọ nọ me re dhesẹ ẹme nọ Jesu ọ ta kpahe onana k’owhẹ evaọ obe nọ mẹ nya seba k’owhẹ na. [Rovie kpohọ uzou avọ 5 evaọ obe Eriariẹ na, who ve se edhe-eme 6-7, kugbe Matiu 7:21-23.] O rẹ sai gb’owhẹ unu oware nọ o soriẹ nọ o jẹ r’oja re a riẹ oware nọ oreva Ọghẹnẹ o rọ. Whọ te ruẹ nọ edhe-eme nọ e kẹle riẹ i wo iroro gaga. Iviena se uzou na kpobi re. Oke ọfa nọ mẹ tẹ nyaze, me ti dhesẹ aghare ewo eriariẹ egbagba Ebaibol na k’owhẹ.”
6 Ọnyabro ovavo o re wo iruo ẹsibuobu evaọ emuhọ iwuhrẹ Ebaibol. Onana họ ẹjiroro emuhọ jọ nọ o r’oma via eva ẹwẹ-obe avọ 12 ọrọ obe “Reasoning” na:
◼ “Mẹ nyaze te k’owhẹ uwuhrẹ Ebaibol ọvọvẹ. Uvẹ o tẹ riẹ, mẹ gwọlọ rehọ iminiti kakao jọ ro dhesẹ k’owhẹ epanọ ahwo evaọ ole ekuotọ 200 a be rọ rehọ Ebaibol na t’ẹme evaọ obọ iwou wọhọ ẹkuẹko uviuwou. Ma rẹ sae rehọ ọjọ evaọ usu enana ruiruo wọhọ ehri ẹmeọta. [Dhesẹ oria eme nọ e rọ eva obe Eriariẹ na.] Ọvẹ ọ mae si owhẹ urru?” Hẹrẹ re ohwo na ọ salọ ọjọ. Rovie kpohọ uzou nọ ọ salọ na, re who mu uwuhrẹ na họ evaọ edhe-ẹme ọsosuọ na.
7 Ẹjiroro ọnyabro ovavo ọfa jọ ọna nọ whọ sae dawo evaọ emuhọ iwuhrẹ:
◼ “Mẹ rẹ kẹ iwuhrẹ Ebaibol ọvọvẹ yọ me wo uvẹ kẹ emọ-iwuhrẹ efa. Obe onana oye ma bi ro wuhrẹ Ebaibol na. [Dhesẹ obe Eriariẹ na.] Uwuhrẹ na u re kri te umutho emera jọ ọvo yọ o rẹ kẹ iyo kẹ enọ wọhọ: Fikieme Ọghẹnẹ ọ jẹ k’uvẹ kẹ uye-oruẹ? Fikieme ma jẹ be rro kpako je whu? Eme ọ rẹ via kẹ iyoyou mai nọ i whu no? Gbe ẹvẹ ma rẹ sai ro si kẹle Ọghẹnẹ?” Whọ vẹ nọ inọ, “Kọ mẹ sai dhesẹ epanọ ma re ru uwuhrẹ na k’owhẹ?” Otẹrẹnọ ọ se uwuhrẹ na, fi obe Eriariẹ na họ ada evaọ unuigho riẹ.
8 Ẹvẹ eriariẹ egbagba Ọghẹnẹ gbe Kristi e ghare te kẹ ohwo kpobi nọ o wo rie! Ẹrehọ riẹ u re ghine dhesẹ uzuazọ ebẹdẹ bẹdẹ evaọ uyerakpọ ogbagba. J’oma rehọ uvẹ kpobi evaọ etoke November ọnana rọ ghale eriariẹ nọ i re su kpohọ uzuazọ ebẹdẹ bẹdẹ nana kugbe amọfa.