Fiobọhọ kẹ Amọfa re A wo Eriariẹ Nọ I re Su Kpohọ Uzuazọ
1 Pọl ukọ na o dhesẹ nọ o rọ ‘oreva Ọghẹnẹ re oghẹrẹ ahwo kpobi a ze te riẹ eriariẹ egbagba uzẹme na.’ (1 Tim. 2:4) Ẹvẹ ma sae ro fiobọhọ k’amọfa re a rehọ eriariẹ eyena? Edhere ọvo jọ họ ẹkwoma ezihe bru ahwo nọ ma kpare isiuru rai no ẹkwoma obe Eriariẹ Nọ I Re Su Kpohọ Uzuazọ Ebẹdẹ Bẹdẹ. Obe onana u dhesẹ uzẹme Ebaibol evaọ eme ivevẹ, elọlọhọ, nọ a nabe riẹ salọ. Ẹkwoma ewuhrẹ riẹ, a rẹ sae su eghẹrẹ ahwo kpobi kpohọ uzuazọ. Eme ma rẹ sae ta re o tudu họ amọfa awọ re a wuhriẹe kugbe omai?
2 Rọ kẹ ahwo nọ a dhesẹ isiuru kẹ Ebaibol na wọhọ uvi ọkpọvio, whọ sae zihe re whọ kẹ uwuhrẹ, whọ rẹ sae ta nọ:
◼ “Okenọ mẹ kaki te etenẹ, ma t’ẹme kpahe oware nọ osoriẹ nọ ma je fievahọ Ebaibol na wọhọ uvi ehri ọkpọvio. Fikinọ Ọghẹnẹ ọ rehọ ẹgba riẹ keriei, Ebaibol na ọ tẹ jẹ rọ ehri imuẹro ọbọga gbe ẹruore, wọhọ epanọ ukọ Kristi jọ ọ ta. [Se Ahwo Rom 15:4.] Evaọ ekuhọ ẹmeọta mai nọ ukpemu, mẹ nọ inọ, Ẹvẹ ma sai ro wo erere k’omobọ mai no eriariẹ nọ e rọ Ebaibol na?” Se edhe-ẹme 18 evaọ ẹwẹre-obe 11 evaọ obe Eriariẹ na. Dhesẹ nọ Isẹri Jihova evaọ akpọ na soso a bi ru iwuhrẹ Ebaibol nọ i bu te ima isoi, a bi fiobọhọ k’ahwo evaọ oria kpobi re a rehọ eriariẹ nọ i re su kpohọ uzuazọ ebẹdẹ bẹdẹ. Rehọ edhe-ẹme isoi ọsosuọ evaọ uzou 1 na ru odhesẹvia ọkpẹkpẹe, kẹ oghẹrẹ nọ a re ru uwuhrẹ.
3 Otẹrọnọ olẹ họ uzou ẹme nọ whọ kake t’ẹme te kugbe ohwo jọ, whọ sae dawo edhere ọnana evaọ omodawọ emuhọ uwuhrẹ:
◼ “Me roro nọ whọ reawere ovuẹ kpahe olẹ nọ ma t’ẹme te evaọ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na. Mẹ yeyaa nọ me ti zihe tha re mẹ t’ẹme kugbe owhẹ kpahe oghẹrẹ nọ ahwo nọ a lẹ se Ọghẹnẹ, a sae rọ gaviezọ kẹe. Muẹro họ oware nọ a kere fihọ ẹwẹre-obe 158. [Se edhe-ẹme 18.] Fikiere, ẹkwoma ewuhrẹ Ebaibol rọ kẹ omobọ ohwo, yọ ma be gaviezọ kẹ oware nọ Ọghẹnẹ ọ be ta kẹ omai. Oyena uruo u re si omai kẹliẹe je fiobọhọ k’omai rẹriẹ ova dhe ebẹbẹ ekẹdẹ-kẹdẹ nọ ma be lẹ kpahe. O te were omẹ re me wuhrẹ Ebaibol na kugbe owhẹ.” O tẹ were ohwo na, rehọ uzou ọsosuọ na muhọ evaọ obe Eriariẹ na.
4 Otẹrọnọ whọ rehọ edhere ọnyakuo ovavo mu uwuhrẹ họ evaọ oria nọ a jọ rehọ obe na, whọ sae ta onana re o nya lele ẹmeọta ọsosuọ:
◼ “Me ru omodawọ obọdẹ re mẹ wariẹ te etenẹ keme mẹ gwọlọ gbẹ vuẹ owhẹ haro kpahe ọruẹrẹfihọ uwuhrẹ Ebaibol ọvọvẹ mai. Mẹ nyase obe onana ba k’owhẹ, Eriariẹ Nọ I Re Su Kpohọ Uzuazọ Ebẹdẹ Bẹdẹ, nọ ọ rọ obọfihọ ewuhrẹ nọ ma bi ro ruiruo. Muẹro họ epanọ o tudu họ omai awọ re ma rri Ẹme Ọghẹnẹ. [Se edhe-ẹme 23 evaọ ẹwẹre-obe 22.] Iviena otẹrọnọ whọ sae tọlọ obe ra ze, ma sae muhọ ewuhrẹ no oria nọ ma je serihọ oke ọsosuọ.” Otẹrọnọ a mu uwuhrẹ họ evaọ oke ọtoruẹ ha, whọ sae ta nọ: “Ẹsejọ ha onana họ emamọ oke nọ me re ro dhesẹ epanọ ma re ro wuhrẹ Ebaibol na k’owhẹ.” Nọ who te se umutho edhe-ẹme jọ no, fi oke họ nọ who ti ro zihe rọ kẹ uwuhrẹ oke ọfa.
5 Obe Eriariẹ na o ro ruiruo gbagba u re ru omai vaha eriariẹ egbagba vọ eria kpobi kẹ oghale amọfa. (Itẹ 15:7) Eriariẹ itieye na e rẹ wha omawere se ahwo nọ idu rai e rọ gbagba, yọ o rẹ jọ ajọwha ọgaga kẹ ai re a rria rọwokugbe ẹrẹreokie Jihova, ukuhọ riẹ u ve su ai kpohọ uzuazọ ebẹdẹ bẹdẹ.