‘Ẹrọwọ O re Lele Oware nọ A Yo’
1 Okenọ ma tẹ ruẹ ohwo jọ nọ ‘o wo eva-ezi kẹ uzuazọ ebẹdẹ bẹdẹ,’ u wuzou re a ru ẹrọwọ ohwo ọyena ga kpahe oware nọ o yo na. (Iruẹru 13:48; Rom 10:17) Re a sai ru oyena gba, u fo re ma nya lele Uwou-Eroro nọ ma ru ahwo vi kpobi gbe emagazini nọ ma fihọ ada ẹkwoma ozihebro re ma rehọ ukere okpokpọ nya jẹ gbẹ t’ẹme h’aro. Ghele na, wo ute emuhọ ewuhrẹ evaọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na họ iroro. Iroro jọ nọ e rẹ sai fiobọhọ ena:
2 Okenọ who te bi ru ozihebro evaọ oria nọ whọ jẹ t’ẹme kpahe uzoẹme na “Jiri Ovie Ebẹdẹ Bẹdẹ Na!,” whọ rẹ sae rehọ enẹ muhọ:
◼ “Okenọ ma t’ẹme whremu, ma kiẹkpemu kpahe imuẹro ilogbo nọ i dhesẹ nọ Ọghẹnẹ erumeru ọ rọ. Rekọ, ẹriẹ ọvo inọ ọ rọ u te he. U fo nọ ma rẹ riẹ odẹ riẹ. Odẹ vẹ who bi ro se Ọghẹnẹ? [Kuvẹ kẹ uyo.] Ima ahwo buobu a re sei nọ ‘ỌNOWO’ hayo ‘Ọghẹnẹ,’ enọ e rọ edẹ-ova gheghe. Fiba oyena, ọ gwọlọ nọ ma riẹ odẹ riẹ. [Se Olezi 83:18.] Ebaibol ọ k’omai evuẹ buobu kpahe Jihova Ọghẹnẹ, wọhọ epanọ a dhesẹ i rie evaọ obe onana.” Dhesẹ uwoho nọ ọ rọ ẹwẹ-obe 29 ọrọ obe Eriariẹ na re who se uzoẹme na. Nọ whọ tẹ t’ẹme kpahe edhe-ẹme esa ọsosuọ evaọ uzou 3 no, yọ who mu uwuhrẹ họ no!
3 Rọkẹ ahwo nọ whọ rehọ uzoẹme na “Oware nọ O Soriẹ nọ Egagọ Akpọ I je ti Kuhọ” t’ẹme kugbe no, whọ rẹ sai lele isiuru na whọ vẹ ta nọ:
◼ “Nọ who se uzoẹme na no, ẹsejọ họ uzẹme nọ o ta nọ ma sae rri egagọ kpobi oghẹrẹ ovo na ha u si owhẹ urru. Te egagọ uzẹme gbe erọ erue e riẹ. Onana o tẹ kpare onọ areghẹ na ze, Kọ egagọ ono Ọghẹnẹ ọ rẹ jẹrehọ? Jesu ọ kẹ uyo onọ na, yọ a ru riei vevẹ evaọ obe onana.” Rovie kpohọ uzou 5 evaọ obe Eriariẹ na, je se edhe-ẹme 4, kugbe Jọn 4:23, 24. Whọ vẹ nọ inọ, “Kọ uno owhẹ eva ze re whọ jẹ obe uwuhrẹ Ebaibol ọvọvẹ rehọ?” Otẹrọnọ ọ kẹ emamọ uyo, rovie kpohọ uzou 1 re who mu uwuhrẹ na họ.
4 Otẹrọnọ a dhesẹ isiuru kpahe “Awake!” ọ April 22, okenọ who te zihe whọ sae dawo emuhọ ọnana re who mu uwuhrẹ họ evaọ obe “Eriariẹ” na:
◼ “Whọ kareghẹhọ nọ ma t’ẹme kpahe ẹruore mai nọ ma te rọ ruẹ akpọ nọ ọ kare ẹmo. O rọ bẹbẹ re ma roro kpahe epanọ oyena o te jọ. Onana họ oghẹrẹ jọ nọ uwoho u dhesẹ i riei. [Dhesẹ ifoto nọ e rọ ewẹ-obe 188 gbe 189 evaọ obe Eriariẹ na.] Kọ o gbẹ te jọ oware omawere re ma sae reawere ikegbe enana? [Rovie kpohọ ewẹ-obe 4 gbe 5, dhesẹ ifoto na, je se ẹkpẹti na.] Uzoẹme obe onana o wọhọ eme ọ Jesu nọ e rọ Jọn 17:3. [Sei.] Otẹrọnọ whọ k’omẹ uvẹ, mẹ gwọlọ nọ me re dhesẹ epanọ a rẹ rehọ obe onana ruiruo kugbe Ebaibol ra rọ kiẹ eriariẹ nọ i re siwi uzuazọ.” U te no ọnọ o wo uwou na eva ze, mu uwuhrẹ na họ evaọ uzou ọsosuọ.
5 Otẹrọnọ whọ nyaku ohwo nọ o wo uvẹ hẹ okenọ whọ kaki te oria riẹ, whọ sae ta onana nọ who te zihe:
◼ “U ri kri hi nọ me ro weze bru owhẹ ze yọ mẹ nyase emagazini Uwou-Eroro gbe Awake! na ba kẹ owhẹ. Ebe enana e rẹ bọ adhẹẹ fihọ Ebaibol na gbe ọkpọvio uruemu. Fikinọ me roro nọ u wuzou re ahwo kpobi a wo otoriẹ Ẹme Ọghẹnẹ, me zihe ze ti dhesẹ oware jọ kẹ owhẹ nọ u ti fiobohọ k’owhẹ ru oyena.” Dhesẹ obe Eriariẹ na, jẹ riobọhọ eware nọ e riẹ eva evaọ ẹwẹ-obe 3. Nọ e rọ kpahe uzou nọ o mai wo isiuru, rovie kpohiẹe, re who mu uwuhrẹ na họ.
6 Oghọghọ mai o te jọ ruaro otẹrọnọ ma sai ‘rovie ẹthẹ ẹrọwọ’ nọ u re su kpohọ uzuazọ ebẹdẹ bẹdẹ kẹ amọfa.—Iruẹru 14:27; Jọn 17:3.