Rehọ Eva Ra Kpobi Ru!
1 Ma wo eware buobu nọ e soriẹ ze nọ ma jẹ kẹ Jihova uyere. Enana i kugbe eware nọ o ru no evaọ oke nọ ukpemu, enọ o bi ru enẹna, gbe enọ o ti ru k’omai evaọ obaro. Eme edẹro mai o rẹ wọ omai ru? Ole Devidi jọ o k’uyo nọ: “Me re jiri ỌNOWO ẹsikpobi; ajiri riẹ o re no omẹ unu hu.”—Ol. 34:1.
2 Ebaibol o dhesẹ vevẹ nọ a kẹ omai ujaje re ma ta usiuwoma. Onana yọ iruo nọ ma re ru ‘neva kpobi ze wọhọ ẹsenọ who bi ru ai kẹ Jihova.’ (Kọl. 3:23) Ẹvẹ ma re ru bu te evaọ odibọgba na otẹrọnọ ma be rehọ eva mai kpobi ru? Okenọ ma te roro kpahe uyoyou Jihova rọ k’omai, ababọ avro idu mai e rẹ w’omai re ma wo abọ evaọ ẹta kẹ amọfa kpahiẹe gbe ẹjiroro ọghaghae riẹ! Oma o rẹ w’omai re ma ru utho nọ ma rẹ sai ru kpobi.
3 U wo iroro re a rẹro nọ ohwo nọ ọ rẹ rehọ eva riẹ kpobi ru neva ze ọ rẹ gwọlọ tẹro vi iruo efuafo. Ọnọ ọ so ilezi na, nọ o roro erei, ọ tẹ ta nọ: “Asiahrẹ gbagba me re jiri owhẹ evaọ okpẹdẹ.” (Ol. 119:164) Ahwo nọ a wo oghẹrẹ iroro ọnọ ọ so ilezi na a rẹ gwọlọ rehọ uvẹ kpobi jiri Jihova. Epanọ eyero rai o kuvẹ te kpobi, ere a rẹ gọ avọ ajọwha te re.
4 Uvẹ Buobu nọ Ma re ro Jiri Jihova E Wariẹ Omai Họ: Ma rẹ hẹrẹ te oke nọ ma ti ruiruo no ẹthẹ-ruọ-ẹthẹ taure ma te whowho emamọ usi na ha. Ibe iruiruo mai, ibe isukulu, imoni, egbẹrioma a gwọlọ nọ ai kpobi a re yo ovuẹ Uvie na. Okenọ ma te bi kpohọ erẹ, ma sae mu ẹmeọta họ nọ u re su kpohọ isẹri ise kẹ ahwo ehọtẹle, ahwo nọ i bi ruiruo evaọ eria nọ a jẹ zẹ emuore, ahwo nọ e rẹ zẹ pẹtrol, hayo enọ e rẹ rọ imoto dhẹ ofa. Nọ ma tẹ rọ uwou mai, ma rẹ sae se isẹri kẹ erivẹ hayo erara. Otẹrọnọ a fi omai họ ẹsipito, idibo-omusiwo, edọkita, gbe amọfa nọ i bi siwi-oma e riẹ nọ ma sae ta usiuwoma kẹ.
5 Irere I re no Usiuwoma Ọnyakuo Ze: Isẹri ivẹ a jẹ nya evaọ ogege-arozaha ẹdẹ jọ a te mu ẹmeọta họ kugbe upelẹ ọzae jọ nọ avọ ọmọ riẹ a jẹ nya onya. Ukuhọriẹ ọye avọ aye riẹ a te kurẹriẹ. Uwhremu na, upelẹ ọzae na ọ tẹ ta eva riẹ inọ omoke kpẹkpẹ taure ọ tẹ te nyaku Isẹri ivẹ na, ọ lẹ se Ọghẹnẹ, yare nọ, ‘Otẹrọnọ whọ be rria, iviena ru re mẹ riẹ owhẹ.’ O riwi ọnyakuo riẹ evaọ ogege-arozaha na fihọ uyo Jihova kẹ olẹ riẹ.
6 Ahwo nọ a wo isiuru re a rehọ unevaze rai kpobi fiobohọ kẹ amọfa evaọ ẹzi a re wo oghọghọ nọ o mai rro. A riẹ nọ egagọ itieye na, ‘avọ udu nọ o gb’unu,’ o rẹ were Jihova.—1 Irv. 28:9.