Whọ Sae Ta Usiuwoma Oke-Gheghe!
1. (a) Eme họ usiuwoma oke-gheghe? (b) Amono a rrọ etenẹ na nọ a rehọ ẹkwoma usiuwoma oke-gheghe kaki yo kpahe uzẹme na?
1 Bro ahwo evaọ ukoko ra a rehọ ẹkwoma usiuwoma oke-gheghe kaki yo kpahe uzẹme na? Uyo na o sai gb’owhẹ unu. Usiuwoma oke-gheghe họ usiuwoma nọ ma rẹ ta kẹ ahwo nọ ma ruẹ evaọ oke iruẹru okpẹdẹ mai—nọ ma te bi kpohọ erẹ, ma te weze bru imoni hayo egbẹrioma, evaọ obọ eki, obọ isukulu, oria iruo mai, gbe eria efa kpobi. Evaọ usu Isẹri Jihova nọ i bu vi 200 nọ i kokohọ oria jọ, 80 evaọ usu rai a rọ ẹkwoma usiuwoma oke-gheghe yo kpahe uzẹme na. Fikiere, edhere usiuwoma ota nana o be wha emamọ iyẹrẹ ze gaga.
2. Iriruo usiuwoma oke-gheghe vẹ e rrọ Ebaibol na?
2 Etausiuwoma ikpe-udhusoi ọsosuọ a ta usiuwoma oke-gheghe ẹsibuobu. Wọhọ oriruo, nọ Jesu ọ jẹ nya Sameria vrẹ, o se-isẹri kẹ aye jọ nọ o je si ame evaọ ozae Jekọp. (Jọn 4:6-26) Filip o mu ẹme họ kugbe ọwharọ obọ Ẹtiopia jọ nọ o je se obe Aizaya avọ onọ inọ: “Whọ riẹ epanọ who re se na?” (Iruẹru 8:26-38) Nọ Pọl ukọ na ọ jọ uwou-odi evaọ Filipai, ọ ta usiuwoma kẹ oriekarọ. (Iruẹru 16:23-34) Oke ofa nọ Pọl ọ jọ uwou-odi evaọ Rom, o je “dede ahwo nọ a bru rie ze kpobi rehọ, gbe ovuẹ uvie Ọghẹnẹ ovuẹ, yọ o wuhrẹ ẹme Jesu Kristi Ọnowo na vevẹ.” (Iruẹru 28:30, 31) Whọ sae ta usiuwoma oke-gheghe re, o tẹ make rọnọ whọ rẹ vuoma. Evaọ oghẹrẹ vẹ?
3. Eme ọ rẹ sai fi obọ họ kẹ omai fi omovuọ kparobọ?
3 Epanọ A re ro Muhọ: O rẹ jọ bẹbẹ kẹ omai ibuobu re ma mu ẹme họ kugbe ọrara. Ẹsejọ dede, re ma ta kpahe ẹme Ọghẹnẹ kẹ egbẹrioma o sae dina vuoma. Rekọ, ma te roro kpahe ewoma Jihova, eware nọ o wuhrẹ omai no, gbe uye nọ o be bẹ ahwo evaọ akpọ na, o te wọ omai ta ẹme. (Jona 4:11; Ol. 40:5; Mat. 13:52) Ofariẹ, ma sae lẹ se Jihova re o fi obọ họ kẹ omai “wo udu.” (1 Tẹs. 2:2) Ọmọ-isukulu Giliad jọ ọ ta nọ: “Mẹ ruẹ no inọ olẹ u bi fi obọ họ nọ o tẹ rrọ bẹbẹ kẹ omẹ re mẹ ta usiuwoma kẹ ahwo.” O gbẹ be ruọ owhẹ oma ha re whọ ta ẹme, lẹ olẹ kpẹkpẹe.—Neh. 2:4.
4. Eme ma re wo họ iroro, kọ fikieme?
4 Odẹ na usiuwoma oke-gheghe, u dhesẹ nọ orọnikọ eme Ebaibol hayo oria ikere jọ ma re ro mu ẹmeọta họ họ. U re fi obọ họ re ma woi họ iroro inọ ma fake gwọlọ mu ẹme gheghe họ kugbe ahwo ababọ usiuwoma nọ ma re muhọ ẹta ovavo. Iwhowho-uvie buobu a ta nọ onana u bi fi obọ họ kẹ ai wo udu nọ a rẹ rọ ta usiuwoma evaọ ukuhọ riẹ. Otẹrọnọ ohwo na ọ gwọlọ lele owhẹ ta ẹme he, whọ gbae họ họ. Ku ẹme na họ dhedhẹ.
5. Eme o bi fi obọ họ kẹ oniọvo-ọmọtẹ jọ nọ ọ rẹ dhomovuọ be sae ta usiuwoma oke-gheghe?
5 Nọ oniọvo-ọmọtẹ jọ nọ ọ rẹ dhomovuọ o te kpohọ obọ eki, ọ rẹ kake mahe ẹro jẹ hwẹ kẹ ohwo jọ. Ohwo na ọ tẹ hwẹ zihe kẹe, ọ vẹ ta ẹme kpẹkpẹe. Ohwo na ọ tẹ kpahe ẹme ziezi kẹe, onana o vẹ lẹliẹe ta ẹme na haro. Ọ rẹ gaviezọ ziezi re ọ riẹ oware nọ ọ rẹ ta usiuwoma kpahe nọ o te were ohwo na. Enẹ nọ ọ be hai ru u fi obọ họ kẹe fi ebe buobu họ ada jẹ to ebe-iwuhrẹ Ebaibol họ no.
6. Ẹvẹ ma sai ro mu ẹme họ evaọ okenọ ma rrọ usiuwoma ha?
6 Mu Ẹme Jọ Họ: Eme ma rẹ sae ta ro mu ẹme họ? Nọ Jesu ọ jẹ ta ẹme kugbe aye na evaọ obọ ozae na, o mu ẹme họ ẹkwoma ame nọ ọ yare aye na. (Jọn 4:7) Fikiere, ma sae rehọ uyere owhẹwhẹtiẹ hayo onọ mu ẹme họ. Nọ whọ be ta ẹme na, ẹsejọhọ whọ te ta te oria nọ whọ te sae jọ rehọ ẹme no Ikereakere na ze, jẹ rọ ere kọ ubi uzẹme na. (Ọtausi. 11:6) Uvẹ ẹmeọta u rovie kẹ ahwo jọ ẹkwoma ẹme jọ nọ a ta nọ u duobọte amọfa, a tẹ nọ onọ. Wọhọ oriruo, whọ tẹ rrọ kugbe ahwo be hẹrẹ edọkita, whọ sae ta nọ: “Eva e te were omẹ gaga evaọ okenọ mẹ gbẹ te mọ họ.”
7. Ẹvẹ ẹromuhotọ u re ro fi obọ họ kẹ omai ta usiuwoma evaọ oke-gheghe?
7 Ẹromuhotọ yọ oware ofa nọ u re fi obọ họ kẹ omai mu ẹmeọta họ. Who te muẹrohọ ọsẹ hayo oni nọ o wo emọ nọ i wo emamọ uruemu, whọ sai jiri ei, jẹ nọe nọ, “Eme o fi obọ họ kẹ owhẹ sae yọrọ emọ ra ziezi?” Oniọvo-ọmọtẹ jọ o muẹrohọ eware nọ amọfa a be hae ta ẹme kpahe evaọ oria iruo riẹ, kẹsena ọ tẹ ta kpahe igogo eware nọ e rrọ ọdawẹ kẹ ibe-iruiruo riẹ. Nọ ọ riẹ inọ aye jọ nọ ọ rrọ oria iruo riẹ ọ be te rọo, ọ tẹ kẹe Awake! nọ o ta kpahe ehaa-orọo. Onana u rovie uvẹ fihọ nọ a gbẹ rọ ta ẹme kpahe Ebaibol na unuẹse buobu.
8. Ẹvẹ ma sae rọ rehọ ebe mai mu ẹmeọta họ?
8 Edhere ọfa họ ẹkwoma ebe mai nọ ma re se evaọ oria nọ amọfa a jẹ sae ruẹ omai. Oniọvo-ọmọzae jọ o re rovie Uwou-Eroro Na hayo Awake! kpohọ uzoẹme nọ u siuru gaga, o ve mu ei họ ese heva. Nọ o te muẹrohọ nọ ohwo nọ ọ kẹle riẹ o bi rri emagazini na, ọ vẹ nọe onọ hayo ta ẹme kpẹkpẹe kpahe uzoẹme na. Ẹsibuobu onana u re su kpohọ ẹmeọta gbe isẹri-ise. Ma tẹ nyase obe mai ọvo jọ ba oria nọ ahwo a sae jọ rue riẹ, o sae kpare isiuru ibe-iruiruo hayo ibe emọ-isukulu mai, o vẹ lẹliẹ ae nọ onọ kpahe iẹe.
9, 10. (a) Eme ma re ru re ma sae ta usiuwoma oke-gheghe? (b) Ẹvẹ whọ be sai ro ru onana?
9 Ru Eware nọ I re Rovie Uvẹ Fihọ: Fikinọ oke iruo usiuwoma ota na u gbe tulo ho, ma re du rri usiuwoma oke-gheghe wọhọ oware nọ uvẹ riẹ u re rovie idudhe he. Ukpoye, evaọ iruẹru ikẹdẹ kẹdẹ mai, ma rẹ daoma ru eware nọ i re rovie uvẹ fihọ nọ ma rẹ rọ ta usiuwoma. Roro kpahe ahwo nọ whọ rẹ sae nyaku, gbe epanọ whọ sai ro mu ẹme họ kugbe ae whẹtiẹwhẹtiẹ. Hae wha Ebaibol gbe ebe mai lele oma nọ whọ rẹ sae kẹ enọ i dhesẹ isiuru.—1 Pita 3:15.
10 Iwhowho-uvie buobu a rehọ onaa sa-sa ru eware nọ i rovie uvẹ ẹmeọta fihọ kẹ ae no. Oniọvo-ọmọtẹ jọ nọ ọ be rria ighẹ nọ a rẹ jọ kake ruẹ ohwohwo ho ọ rẹ keria oria arozaha ighẹ na ọ vẹ vravrẹ iwoho iwowoma fihọ oria nọ ahwo a rẹ sae jọ rue rai. Nọ ahwo a je dikihẹ bi rri iwoho na, jẹ be ta ẹme kpahe ae, ọ vẹ rehọ uvẹ yena ta kẹ ae kpahe eyaa Ebaibol orọ “odhiwu ọkpokpọ gbe akpọ ọkpokpọ.” (Evia. 21:1-4) Hai roro kpahe eware nọ whọ rẹ sai ru ro rovie uvẹ fihọ nọ whọ rẹ rọ ta usiuwoma evaọ oke gheghe.
11. Ẹvẹ ma sai gbe ro fi obọ họ kẹ ahwo nọ a dhesẹ isiuru evaọ usiuwoma oke-gheghe?
11 Gbe Fi Obọ Họ kẹ Ohwo Na: Ohwo jọ ọ tẹ gaviezọ kẹ owhẹ, daoma gbe fi obọ họ kẹe. U te kiehọ, whọ sae ta kẹe nọ: “O were omẹ gaga nọ me ro lele owhẹ ta ẹme. Diẹse mẹ sae jọ ruẹ owhẹ re ma wariẹ ta ẹme ẹdẹfa?” Iwhowho-uvie jọ a rẹ rehọ adrẹse gbe inọmba ifonu rai kẹ ohwo na a vẹ ta nọ: “Ẹme nọ ma ta na ọ were omẹ gaga. Whọ tẹ gbẹ gwọlọ riẹ kpahe oware nọ ma ta na, adrẹse gbe inọmba ifonu mẹ na.” Otẹrọnọ whẹ ọvo ọ te sai fi obọ họ kẹ ohwo na ha, ru re ukoko nọ u wo ẹkwotọ nọ ohwo na ọ rrọ u fi obọ họ kẹe ẹkwoma efọmo ọ Please Follow Up (S-43) nọ who re kere eme fihọ, jẹ rehọ iẹe kẹ okere-obe ukoko ra.
12. (a) Fikieme ma re ro kere oke nọ ma rọ ta usiuwoma oke-gheghe fihọ otọ jẹ n’iyẹrẹ riẹ? (b) Emamọ iyẹrẹ vẹ i no usiuwoma oke-gheghe ze no? (Rri ẹkpẹti na “Iyẹrẹ nọ I No Usiuwoma Oke-Gheghe Ze!”)
12 Ma re kele oke nọ ma rọ ta usiuwoma oke-gheghe. Fikiere, daoma kere iei fihọ otọ o tẹ make rọnọ iminiti kakao kẹdẹ kẹdẹ. Dai roro kpahe onana: Nọ owhowho-uvie kpobi ọ tẹ rehọ iminiti isoi ta usiuwoma oke-gheghe kẹdẹ kẹdẹ, evaọ kamara kamara mai kpobi ma re wo euwa bu te ima 17.
13. Eme ọ rẹ wọ omai ta usiuwoma oke-gheghe?
13 Obọdẹ ẹjiroro nọ o rẹ wọ omai ta usiuwoma oke-gheghe họ uyoyou kẹ Ọghẹnẹ gbe ọrivẹ. (Mat. 22:37-39) Fikinọ ekwakwa-aghae Jihova gbe ẹjiroro riẹ e were omai gaga o be wọ omai ta kpahe “oruaro urirẹ uvie riẹ.” (Ol. 145:7, 10-12) Uvi ọdawẹ kẹ erivẹ mai o rẹ wọ omai rehọ uvẹ kpobi ta usiuwoma na nọ oke o gbẹ riẹ na. (Rom 10:13, 14) Ma te roro jẹ ruẹrẹ oma kpahe, mai kpobi ma rẹ sae ta usiuwoma oke-gheghe, yọ ma ti wo oghọghọ nọ u re noi ze otẹrọnọ mai họ ohwo ọsosuọ nọ o dhesẹ uzẹme na kẹ ohwo nọ o wo eva ezi.
[Ẹme nọ a fi ẹgba họ nọ ọ rrọ ẹwẹ-obe avọ 2]
U re fi obọ họ re ma woi họ iroro inọ ma fake gwọlọ mu ẹme gheghe họ kugbe ahwo
[Ẹme nọ a fi ẹgba họ nọ ọ rrọ ẹwẹ-obe avọ 3]
Iwhowho-uvie buobu a rehọ onaa sa-sa ru eware nọ i rovie uvẹ ẹmeọta fihọ kẹ ae no
[Ẹkpẹti nọ o rrọ ẹwẹ-obe avọ 3]
Epanọ Ma Sai ro Mu Ẹme Họ
◼ Lẹ se Jihova kẹ obufihọ
◼ Fiẹrohọ enọ e wọhọ nọ a rrọ whẹtiẹwhẹtiẹ, yọ a bi ru ugidi hi
◼ Rri ohwo na ovao, hwẹ kẹe, jẹ ta kpahe oware jọ nọ ọ rẹ sae kpahe fihọ
◼ Gaviezọ ziezi
[Ẹkpẹti nọ o rrọ ẹwẹ-obe avọ 3]
Iyẹrẹ nọ I No Usiuwoma Oke-Gheghe Ze!
• Oniọvo-ọmọzae jọ ọ ta usiuwoma kẹ ahwo nọ a jọ oria nọ a jẹ jọ ruẹrẹ omoto riẹ, ọ tẹ kẹ ae emebe-uzizie okokohọ ro zizie ae kẹ ovuẹ ogbotu na. Eva okokohọ ukpe ọfa, oniọvo jọ nọ o vuhu hu o te yere iei sasasa. Ohwo na yọ omọvo ahwo nọ ọ kẹ emebe-uzizie evaọ ukpe nọ o vrẹ evaọ oria nọ a jẹ jọ ruẹrẹ omoto riẹ na! Ọzae na ọ nyae gaviezọ kẹ ovuẹ ogbotu na, ọ tẹ yare inọ ọ gwọlọ uwuhrẹ Ebaibol. Tei te aye riẹ a họ-ame no.
• Nọ ọzae jọ nọ o bi ru iruo kẹ ekọmpene ishọranse ọ nyabru oniọvo-ọmọtẹ jọ, oniọvo na ọ tẹ rehọ uvẹ na ta usiuwoma kẹe. Ọ nọ riẹ sọ ọ gwọlọ oware nọ o rẹ kẹe imuẹro inọ o ti wo omokpokpọ ẹsikpobi, wo evawere, gbe uzuazọ ebẹdẹ bẹdẹ. Ọzae na ọ tẹ kuyo nọ Ee, jẹ nọe epanọ oyena o te sae rọ lọhọ. Oniọvo na o te dhesẹ eyaa Ebaibol na kẹe jẹ rehọ obe mai jọ rọ kẹe, onọ ọ rehọ aso ọvuọvo se duoka. A te mu ei Ebaibol họ ewuhrẹ, o te je mu iwuhrẹ họ ekpohọ, uwhremu na ọ tẹ họ-ame.
• Oniọvo-ọmọzae jọ nọ o tuaro nọ ọ kpako te ikpe 100 no nọ ọ rrọ uwou nọ a rẹ jọ sẹro enọ e kpako no, ọ rẹ ta ẹsikpobi nọ, “Uvie na họ oware nọ ma gwọlọ.” Onana o wha riẹ ze nọ enọso gbe amọfa nọ a gbẹ rrọ oria na a rọ nọe enọ, ọ tẹ ta oware nọ Uvie na o rrọ kẹ ae. Aye jọ nọ ọ rrọ etẹe ruiruo ọ nọ riẹ oware nọ o ti ru evaọ Aparadase na. Ọ tẹ ta nọ, “Mẹ te wariẹ ruẹ ude jẹ nyonya, mẹ vẹ te mahe agbara mẹ nọ a bi ro ghelie omẹ na no.” Nọ orọnọ ọ be ruẹ ude he na, ọ tẹ ta kẹ aye na re o se emagazini mai rọ kẹe. Nọ ọmọtẹ oniọvo nana ọ nyaze, aye na o te mi ọmọtẹ na uvẹ re ọ wha emagazini na kpo. Enọso jọ ọ ta kẹ ọmọtẹ na nọ, “Odẹme mai enẹna họ: ‘Uvie na họ oware nọ ma gwọlọ.’”