Kọ Whọ Ruẹrẹ Oma Kpahe kẹ Usiuwoma Oke-Gheghe No?
1 Usiuwoma nọ a rẹ ta evaọ oke-gheghe o sae wha emamọ iyẹrẹ ze. Iriruo usiuwoma oke-gheghe nọ e wha emamọ iyẹrẹ ze e vọ Ebaibol na. (Jọn 4:7-15) Ẹvẹ ma sae rọ ruẹrẹ oma kpahe kẹ edhere usiuwoma ota nana?
2 Ẹgọ gbe Osẹ: Ma tẹ be hae gọ ẹgọ jẹ sẹ osẹ kpatiẹ oke kpobi u re ru ei lọhọ k’omai nọ ma sae rọ ta usiuwoma kẹ amọfa nọ uvẹ u te rovie fihọ. (1 Tim. 2:9, 10) Otẹrọnọ ẹgọ mai o gbe kiehọ họ oma o te vuomai nọ ma gbẹ te sai ro se isẹri hi. Rekọ, ẹgọ mai ọ tẹ rrọ fuafo, kpatiẹ, o te wọ amọfa gwọlọ riẹ oghẹrẹ ahwo nọ ma rrọ. Wọhọ oriruo, imava-orọo jọ nọ e rrọ Isẹri Jihova nọ e gọ ẹgọ kpatiẹ nọ i je kpohọ erẹ a keria kẹle ọzae jọ nọ ọ rrọ ohwo Muslim. Nọ ọzae na o muẹrohọ ẹgọ ọkpakpatiẹ rai, ọ tẹ nọ ae sọ Ileleikristi a rrọ. Onana u su kpohọ ẹmeọta kpahe Ebaibol evaọ euwa esa soso.
3 Epanọ Ma Sai ro Mu Ẹmeọta Họ: Nọ Jesu ọ nyaku aye ohwo Sameria na evaọ ozae nọ Jekọp ọ tọ, o mu ẹme họ ẹkwoma aye na nọ ọ ta kẹ inọ ọ kẹe ame. Epọvo na re, ma sai mu ẹme họ ẹkwoma ọ ẹme jọ nọ ma rẹ ta hayo onọ olọlọhọ jọ nọ ma rẹ nọ. Dede nọ o sae jọ omai oma eheho ẹsejọ, ma tẹ rọ ẹro so Jihova kẹ obufihọ, ma ti wo udu nọ ma ti ro mu ẹme họ.—1 Tẹs. 2:2.
4 Rọ Ẹro Da Uvẹ nọ O Sai Rovie Fihọ: Iwhowho-uvie buobu a rehọ idhere sa-sa ta usiuwoma oke-gheghe no. Kiẹ iyero ra riwi, je roro kpahe oghẹrẹ ahwo nọ whọ sae nyaku. Hae wha ebe nọ whọ sai fihọ ada gbe Ebaibol ọsese lele oma. Hai muẹrohotọ, je dhesẹ isiuru kpahe ahwo nọ whọ te nyaku. Nọ who te roro kpahe oghẹrẹ iyero gbe ahwo nọ whọ sae nyaku evaọ okpẹdẹ na, o te sae jọ lọlọhọ k’owhẹ re who se emamọ isẹri.—Fil. 1:12-14; 1 Pita 3:15.
5 Ma wo emamọ ẹjiroro ivẹ nọ o jẹ gwọlọ nọ ma rehọ uvẹ nọ u rovie fihọ rọ ta usiuwoma oke-gheghe—uyoyou kẹ Ọghẹnẹ gbe ọrivẹ. (Mat. 22:37-39) Fikinọ oke nọ u kiọkọ kẹ iruo usiuwoma ota na u tulo ho, ma re gbabọkẹ usiuwoma oke-gheghe vievie he. J’oma ruẹrẹ oma kpahe re ma rehọ uvẹ kpobi nọ u rovie fihọ rọ ta usiuwoma Uvie na kẹ amọfa nọ oke o gbẹ riẹ na.—Rom 10:13, 14; 2 Tim. 4:2.
[Enọ Uwuhrẹ]
1. Oriruo vẹ o dhesẹ nọ usiuwoma oke-gheghe o sae wha emamọ iyẹrẹ ze?
2. Ẹvẹ ẹgọ gbe osẹ mai o sai ro rovie uvẹ k’omai se isẹri?
3. Evaọ aro o ro kele Jesu, ẹvẹ whọ sai ro mu ẹmeọta họ no?
4. Ẹvẹ ma sae rọ ruẹrẹ oma kpahe kẹ usiuwoma oke-gheghe?
5. Fikieme ma gbe gbabọkẹ usiuwoma oke-gheghe he?