‘Se Isẹri Fuafo’ avọ Osegboja
1 Wọhọ Jesu gbe idibo ẹrọwọ oke anwae efa, Pọl ukọ na ọ jọ ọtausiuwoma ọwhọ, nọ o ‘se isẹri fuafo’ evaọ oghẹrẹ uyero kpobi. Makọ oke nọ a mu ei fihọ uwou obọriẹ re ọ seba ẹnya lahwe, o “dede ahwo nọ a bru rie ze kpobi rehọ, gbe ovuẹ uvie Ọghẹnẹ ovuẹ, yọ o wuhrẹ ẹme Jesu Kristi Ọnowo na vevẹ.”—Iruẹru 28:16-31.
2 Ma rẹ sai ‘se isẹri fuafo’ avọ osegboja re evaọ oke kpobi. Oyena o kẹre te isẹri-ise kẹ ahwo nọ ma nya ku evaọ oke erẹ mai.—Iruẹru 28:23; Ol. 145:10-13.
3 Isẹri-Ise Idudhe Manikọ orọ Oke-Gheghe? Kọ ohẹriẹ jọ o riẹ? Ẹhẹ. Oware idudhe yọ onọ o via kpregede hayo onọ a jiroro riẹ hẹ, wọhọ ẹsenọ a ma omaa riẹ hẹ hayo u w’uzou te ere he. Oyena u ghine dhesẹ odibọgba mai hi. Wọhọ epanọ o jọ kẹ Pọl, oruaro nọ ma rẹ kẹ Ọghẹnẹ ẹkwoma isẹri-ise mai u w’uzou kẹ omai, yọ o rẹ jọ ẹjiroro mai re ma se isẹri evaọ oria nọ u fo kpobi evaọ okenọ ma te bi kpohọ erẹ. Dede na, o rrọ gbagba re a dhesẹ edhere nọ ma rẹ rọ ta ẹme kẹ amọfa na wọhọ orọ oke-gheghe—koyehọ, onọ a re dhuoma fihọ họ, orọ oma ogbẹnyusu, gbe orọ ababọ oghẹrẹ uruemu jọ nọ a re lele. Edhere nana ọ rẹ sae wha emamọ iyẹrẹ ze.
4 Ruẹrẹ Oma Kpahe kẹ Isẹri-Ise: Pọl o ru uvẹ nọ o ro se isẹri evaọ okenọ ọ jọ ega uwou obọriẹ evaọ Rom. Ọ jọ oria nọ ọ jẹ rria na rehọ iroro-obọriẹ zizie isu ahwo Ju okegbe yena ziọ uwou riẹ. (Iruẹru 28:17) Dede nọ ukoko Ileleikristi o jọ Rom, Pọl o yo nnọ ahwo Ju nọ a rrọ okpẹwho yena a riẹ kpahe ẹrọwọ Ileleikristi na tere he. (Iruẹru 28:22; Rom 1:7) Ọ siọ ‘isẹri ise fuafo’ ba ese kpahe Jesu Kristi gbe Uvie Ọghẹnẹ na ha.
5 Roro kpahe ahwo kpobi nọ whọ rẹ sae nya ku evaọ erẹ ra, enọ i wo umutho eriariẹ jọ ọvo kpahe Isẹri Jihova. Ẹsejọhọ a riẹ dede he inọ ma rẹ kẹ ahwo obe-uwuhrẹ Ebaibol ọvọvẹ. Mu ẹro hotọ kẹ uvẹ nọ who re ro se isẹri kẹ ahwo nọ whọ nya ku evaọ oke nọ who bi kpohọ erẹ, nọ imoto i te serihọ evaọ okenọ a ti bi kpohọ erẹ, okenọ a tẹ be dẹ epẹtiro, okenọ whọ be dẹ eware, nọ who te wohọ ehọtẹle, be re emu evaọ ehọtẹle, whọ tẹ rrọ omoto ofa, gbe oke ofa. Jọ udu ra roro ẹme nọ whọ rẹ sae ta ro mu ẹme họ ro se isẹri kpẹkpẹe. Ẹsejọhọ whọ sae jọ umuo oke yena vrẹ wuhrẹ epanọ who ti ro ru ei ẹkwoma isẹri oke-gheghe nọ who re se kẹ erivẹ ra, imoni ra, ibe-iruiruo ra, gbe egbẹrioma efa.
6 O gwọlọ re who wo ebe jọ nọ who re fihọ ada evaọ okenọ who bi se isẹri oke-gheghe. Kọ ebe vẹ? Whọ sae rehọ omobe-ovẹvẹ ọ Kọ Whọ Gwọlọ Riẹ Kpahe Ebaibol na Viere? ro ruiruo. Ta kpahe idhe-eme isoi ọsosuọ na, enọ a jọ kẹ ẹjiroro sa-sa nọ a re ro se Ebaibol na. Dhesẹ ẹmẹwẹ-obe ayare nọ ọ rrọ obọ uke na nọ a rẹ rọ yare obe-uwuhrẹ Ebaibol ọvọvẹ na. Nọ whọ tẹ ruẹ ohwo nọ ọ kezọ, fi ibroshọ Gwọlọ na họ ada kẹe. Avọ irẹro ọ ẹnyaku ahwo nọ a rẹ ta ẹvẹrẹ ọfa, wha omobe ọ Good News for All Nations na lele oma. Ẹwẹ-obe avọ 2 o dhesẹ epanọ a rẹ rọ rehọ iẹe se isẹri. Otẹrọnọ omoto whọ ro bi ro kpohọ erẹ, whọ sae wha umutho ebe efa jọ lele oma rọkẹ ahwo nọ a dhesẹ uvi isiuru kpahe ovuẹ Uvie na.
7 Muẹrohọ Ẹgọ gbe Uruemu Ra: Ma re muẹrohọ inọ uruemu mai avọ ẹgọ gbe osẹ mai o kẹ amọfa eriwo ọthọthọ họ hayo lẹliẹ ae ‘ta ẹme oyoma’ kpahe ukoko Jihova ha. (Iruẹru 28:22) Orọnikọ oke nọ ma bi kpohọ erẹ ọvo onana u kie kpahe he, rekọ u kie kpahe etoke eriosehọ mai re. Uwou-Eroro ọ August 1, 2002, ẹwẹ-obe avọ 30, edhe-ẹme avọ 14, o vẹvẹ unu nnọ: “Ma rẹ g’ẹgọ vrẹta ha, o rẹ jọ onọ o rẹ kpare ekpehre isiuru hu, yọ o rẹ jọ onọ u re rovie oma ohwo fihọ họ, hayo onọ u kie ze kpobi. Fibae, ma rẹ g’ẹgọ evaọ oghẹrẹ nọ u re dhesẹ enọ ‘e rrọ egagọ.’ Kọ onana u gbe fo oware nọ ma re roro kpahe ziezi? Orọnikọ onana yọ ẹme ọ okenọ ma te bi kpohọ iwuhrẹ Ileleikristi [hayo omakugbe ilogbo efa] ọvo ma rẹ rọ g’ẹgọ ziezi hi, re oke ofa kpobi o vẹ jọ [thakpinọ] ma ku oware nọ u je omai họ. Ẹgọ mai o re dhesẹ uruemu ọghọ orọ adhẹẹ ẹsikpobi keme mai yọ Ileleikristi gbe egbodibo t’aso t’uvo.”—1 Tim. 2:9, 10.
8 Ma rẹ g’ẹgọ kpatiẹ avọ adhẹẹ. Otẹrọnọ ẹgọ gbe uruemu mai u re dhesẹ orọwọ nọ ma wo kpahe Ọghẹnẹ ẹsikpobi, ozọ ẹgọ mai nọ o kiehọ họ u re ru omai siọ isẹri-ise ọ oke-gheghe ba ese he.—1 Pita 3:15.
9 Isẹri-ise Oke-Gheghe O rẹ Kẹ Erere: Evaọ etoke ikpe ivẹ nọ Pọl ọ jọ ega uwou obọriẹ evaọ Rom na, ọ ruẹ iyẹrẹ iwoma no omodawọ isẹri-ise riẹ ze. Luk ọ n’iyẹrẹ nnọ “ejọ e rọwo eme nọ ọ ta na.” (Iruẹru 28:24) Pọl omariẹ o dhesẹ epanọ ‘isẹri-ise fuafo’ i w’iruo te evaọ okenọ o kere nnọ: “Oware nọ o via kẹ omẹ, u ru rọ kẹ ẹnyaharo usiuwoma na. Fikiere a jọ eva eria isuisuẹsu kpobi riẹ onana, jegbe ahwo kpobi a riẹ nọ uwou-odi onya mẹ orọ fiki Kristi; a ru imoni na buobu fievahọ Ọnowo na fiki uwou-odi onya mẹ, a tẹ jẹ mai wo udu nọ a rọ ta ẹme Ọghẹnẹ ababọ ozọ.”—Fil. 1:12-14.
10 Ukpe n’ukpo, nọ a rria okpẹdẹ no evaọ okokohọ ubrotọ na, imava-orọo jọ a wo iyẹrẹ iwoma jọ evaọ okenọ a se-isẹri oke-gheghe kẹ aye jọ nọ ọ rẹ kẹ ahwo emu evaọ ehọtẹle, ọnọ ọ nọ rae kpahe ebaje okokohọ rai. A ta kẹe kpahe okokohọ na jegbe ẹruore nọ Ebaibol na e kẹ kpahe obaro ahwo-akpọ. A kẹ riẹ omobe-ovẹvẹ na Kọ Whọ Gwọlọ Riẹ Kpahe Ebaibol na Viere?, a te je dhesẹ ọruẹrẹfihotọ obe-uwuhrẹ Ebaibol ọvọvẹ na kẹe. Aye na ọ tẹ ta nnọ ọ gwọlọ nọ ohwo jọ o weze bru ei, o te kere odẹ gbe adrẹse riẹ fihọ obemu omobe-ovẹvẹ na, ọ tẹ vuẹ ọzae avọ aye na re a ru ọruẹrẹfihotọ na. Obokparọ vẹ whọ sai wo omawere riẹ no ẹkwoma osegboja nọ who re ro ‘se-isẹri fuafo’?
11 Wha Emamọ Usi na Haro Fuafo: Dai roro epanọ eva e were Pọl te evaọ okenọ o yo nnọ ibe Ileleikristi e be raro kele oriruo ọwhọ riẹ! Joma dao ẹgba mai kpobi re ma wha emamọ usi na haro ẹkwoma isẹri-ise oke-gheghe kpahe ẹrọwọ mai nọ o no Ebaibol ze na evaọ uvẹ kpobi nọ u rovie.
[Study Questions]
1, 2. Eme o si owhẹ urru kpahe epanọ Pọl o rri ẹvuẹ emamọ usi na, kọ ẹvẹ ma sae rọ rehọ aro kele oriruo ‘isẹri-ise fuafo’ riẹ na?
3. Ẹvẹ ma sae rọ whaha isẹri-ise oke-gheghe mai na nọ u gbe zihe ruọ oware idudhe ọvo ho?
4. Eme o fi obọ họ kẹ Pọl se isẹri evaọ oria nọ ọ jẹ rria?
5, 6. Uvẹ isẹri-ise ọ oke-gheghe vẹ ma rẹ sai wo, kọ omaruẹrẹhọ vẹ ma rẹ sai ru re ma ruẹsi se isẹri eyena ziezi?
7, 8. Didi unuovẹvẹ kpahe ẹgọ gbe uruemu mai evaọ okenọ ma te bi kpohọ erẹ gbe etoke eriosehọ u fo nọ ma rẹ kezọ kẹ?
9. Didi obokparọ evaọ isẹri-ise Pọl o wo evaọ Rom?
10. Didi iyẹrẹ iwoma ọ isẹri-ise imava-orọo jọ a wo evaọ ukpe n’ukpo?
11. Ekwakwa vẹ ma rẹ bọ kẹ oma mai re ma ruẹse wha emamọ usi na haro ẹkwoma ‘isẹri-ise fuafo’?
[Box on page 4]
Ebe nọ A re ro Ru Isẹri-Ise Oke-Gheghe
■ Kọ Whọ Gwọlọ Riẹ Kpahe Ebaibol na Viere? (omobe-ovẹvẹ)
■ Eme Ọghẹnẹ Ọ Gwọlọ Mi Omai? (ibroshọ)
■ Good News for All Nations (omobe)
■ Ebe efa jọ nọ i fo