“Se Isẹi” Mu Ahwo Oma
1. Ẹvẹ Pọl ukọ na ọ rọ jọ ohwo nọ ma rẹ raro kele evaọ usiuwoma?
1 ‘Ru iruo usiuwoma ota ra gbunu.’ (2 Tim. 4:5) Pọl ukọ na o wo udu nọ ọ sae rọ ta ere kẹ Timoti. No ukpe 47 C.E. rite 56 C.E., Pọl o kpohọ erẹ usiuwoma isiasa soso. Obe Iruẹru Ikọ o ta ẹsibuobu nọ Pọl o je “se isẹi” Uvie na ziezi. (Iruẹru 23:11; 28:23) Ẹvẹ ma sai ro ru epọvo na nẹnẹ?
2. Ẹvẹ ma sae rọ nyate ohwo kpobi oma evaọ usiuwoma n’uwou ruọ uwou?
2 N’uwou Ruọ Uwou: Re ma sae ruẹ ahwo nọ ma re ta usiuwoma kẹ hẹ, o gwọlọ nọ ma re nwene oke nọ ma re ro kpohọ usiuwoma. Owọwọ hayo urere oka ma rẹ mae di ezae họ uwou. Ma rẹ daoma ta usiuwoma evaọ uwou kpobi nọ ahwo a be rria je zihe bru enọ ma dihọ uwou ho. Kọ otẹrọnọ whọ dao ẹgba ra kpobi no yọ who bi di ohwo na họ họ? Whọ sai kere ileta hayo rehọ ifonu sei.
3. Oke vẹ whọ be hae rọ ta usiuwoma?
3 Oke nọ Ma Kpohọ Usiuwoma gbe Oke nọ Ma Kpohọ Usiuwoma Ha: Idibo Jihova nẹnẹ a be daoma wuhrẹ ahwo kpobi nọ a rẹ sai gaviezọ “areghẹ.” A re ru onana evaọ “obọ iyẹrẹ” hayo “evaọ eki.” (Itẹ 1:20, 21) Kọ ma bi muẹrohọ uvẹ kpobi nọ ma rẹ rọ ta usiuwoma evaọ oke nọ ma bi ru eware obọ mai? Kọ a sai dhesẹ omai nọ ma be vuẹ ahwo ẹme Ọghẹnẹ ‘whawha avọ udu’? (Iruẹru 18:5) Ma te bi ru ere, u dhesẹ nọ ma bi “se isẹi” mu ahwo oma.—Iruẹru 10:42; 17:17; 20:20, 21, 24.
4. Ẹvẹ olẹ gbe Ẹme Ọghẹnẹ nọ ma re roro kpahe o sae rọ lẹliẹ omai ta usiuwoma na ziezi?
4 Ẹsejọhọ fikinọ whọ rẹ dhomovuọ hayo who wo ẹbẹbẹ ọfa jọ, o rẹ bẹ owhẹ re whọ ta usiuwoma kẹ ohwo. Jihova ọ riẹ ẹbẹbẹ mai omomọvo. (Ol. 103:14) Ghele na, oke nọ ẹbẹbẹ otiọye na o tẹ romavia, nọ ma gwọlọ ta usiuwoma kẹ ohwo, joma lẹ Jihova re ọ kẹ omai udu. (Iruẹru 4:29, 31) Oware ofa nọ u re fi obọ họ kẹ omai họ, ma re se je roro kpahe eria Ebaibol nọ i dhesẹ irere nọ i re no usiuwoma nọ ma be ta na ze. (Fil. 3:8) Onana o te whae ze nọ ma te rọ ta usiuwoma na avọ ọwhọ!
5. Ẹvẹ ma sae rọ jọ ahwo nọ a bi ru eruẹaruẹ Joẹl na gba?
5 Eruẹaruẹ Joẹl u dhesẹ nọ taure ẹdẹ ologbo avọ idudu Jihova ọ tẹ ze, oware ọvo o te whaha idibo Jihova usiuwoma na ẹta ha. (Joẹl 2:2, 7-9) Fikiere, joma rọ utho ẹgba mai kpobi ta usiuwoma na!