Eriosehọ No Iruo Oyibo—Yọ Uvẹ Kpohọ Iruo Buobu?
1 Ahwo buobu nọ a re ru iruo gaga a re siuru oke nọ eriosehọ no iruo oyibo o te rọ kẹ ae uvẹ ro no uye gbe otunyẹ okọ. Rekọ ẹsibuobu eriosehọ no iruo oyibo o rẹ wha ababọ-isiuru, oma-ododokpo gbe owho idudhe ze. Ababọ iruo nọ e rẹ kẹ erere, u re ru nọ ohwo o je roro-iroro jẹ ruawa kpahe oma riẹ ẹsikpobi. Obe-usi ọ Brazil jọ o n’iyẹrẹ nnọ ahwo nọ a serihọ no iruo oyibo no a be ta nnọ a wo ebẹbẹ ọ ‘ababọ-edẹro, evaedha ekpakpata, awa-uzuazọ, gbe ekufiẹ iroro-ọjẹrehọ amọfa jegbe ọkora avọ iroro inọ akpọ rai o wo aro ho.
2 Wo ohẹriẹ, Ileleikristi buobu i rri abọ ọkpokpọ nana evaọ uzuazọ rai wọhọ uvẹ kpohọ iruo abọ-ẹzi buobu. Oniọvo-ọmọzae jọ nọ o muọ iruo ọkobaro họ nọ ọ rọ eka ivẹ vrẹ ikpe 65 no ọ ta nnọ: “Mẹ re jọ uzuazọ mẹ ruẹ etoke nọ ọ vọ avọ eghale buobu wọhọ ikpe ikpe erọ iruo ọkobaro na ha.” Imava-orọo jọ a ta nnọ: “Ikpe mai nọ e mai woma kpaobọ i muhọ evaọ okenọ ma mu iruo ọkobaro họ.” Ẹhẹ, rokẹ ahwo buobu, eriosehọ no iruo oyibo o rẹ kẹ ae obọdẹ uvẹ nọ a re ro ru odibọgba rai kẹre je wo eghale buobu no obọ Jihova ze.
3 Gbẹ Ruabọhọ Owhreze Iruo je Wo Ẹvi: Ahwo buobu nọ a serihọ no iruo oyibo no enẹna a whẹro ze ababọ ekwakwa omawere nọ e dafia nẹnẹ na, fikiere a muhọ ẹya no oke emaha ze. Dede nọ a rẹ gbẹ sai wo ẹgba etoke uzoge he, a gbẹ rrọ iruiruo nọ i re wo ẹvi. Evaọ ẹkwotọ uwou-ogha jọ, ekobaro 22 evaọ udhusoi kpobi—ole inievo 20,000—a te ikpe 60 no. Enana nọ e kpako no na a bi wo abọ ruaro evaọ iruo usiuwoma ota na. Eriariẹ gbe ekwakwa Ọghẹnẹ nọ a wo e be wha ẹvi fihọ ikoko nọ a rrọ.—Jem. 3:17, 18.
4 Owhreze iruo nọ a rẹ ruabọhọ evaọ odibọgba Ileleikristi na o rẹ zọhọ fihọ omokpokpọ gbe uzuazọ uwoma. Oniọvo-ọmọtẹ jọ nọ ọ kpako te ikpe 84 no nọ o muọ iruo ọkobaro họ evaọ okenọ o serihọ no iruo oyibo no ọ ta nnọ: “Ebe-iwuhrẹ Ebaibol buobu nọ me re ru kugbe ahwo nọ a wo isiuru u fi obọ họ kẹ omẹ rrọ jajaja evaọ iroro. Me wo omoto ho, fikiere mẹ rẹ nya owotọ gaga. Oyena o be kẹ omẹ oma okpokpọ.” Ọzae-gbe-aye nọ a kpako no nọ e rrọ ekobaro a ta nnọ: “Odibọgba na ọ lẹliẹ omai rrọ jajaja evaọ iroro gbe ugboma. Ma rẹ jọ kugbe ẹsikpobi. Ma rẹ hwẹ jẹ reawere uzuazọ gaga.”
5 Iruo Evaọ Oria nọ Ẹgwọlọ Ọ Rrọ: Ileleikristi jọ nọ i serihọ no iruo oyibo no nọ uyero abọ-ugho rai u kiehọ a kwa kpohọ oria nọ ẹgwọlọ kẹ iwhowho Uvie ọ jẹ mae rro no. Amọfa a ru odibọgba rai kẹre ẹkwoma iruo nọ a bi ru evaọ ẹkwotọ nọ a rẹ jọ ta ẹvẹrẹ ọfa. Wohọ Pọl ukọ na, iwhowho-uvie ọwhọ enana a ‘ru eware enana kpobi fiki usiuwoma na re a sai ru ẹkẹ abọ rai evaọ eva riẹ.’—1 Kọr. 9:23.
6 Ọzae-gbe-aye jọ a muọ iruo ọkobaro họ evaọ okenọ a yọrọ emezae ivẹ rai te ahwo no. Nọ a ru iruo ọkobaro evaọ ikpe buobu no, a te muọ ẹvẹrẹ ọ Chinese họ ewuhrẹ. Enẹna nọ a kpako vrẹ ikpe 70 gaga no na, a wo oghọghọ jọ kẹle nọ a ruẹ utu Chinese nọ a bi lele ruiruo anwẹdẹ na nọ u zihe ruọ ukoko. Ẹvẹ ezae-gbe-eyae itiena a rrọ oghale te!
7 A Re Serihọ No Iruo Odibọgba na Ha: Dede nọ ahwo buobu a re serihọ no iruo oyibo rai, eriosehọ no iruo Ọghẹnẹ ọ rrọ kẹ uvumọ Oleleikristi hi. Ohwo kpobi ọ rẹ ruabọhọ iruo na “te urere.” (Mat. 24:13, 14) Uzẹme, nọ a be kpako na, ahwo jọ a gbẹ be sai ru te epanọ a je ru vẹre evaọ iruo Jihova ha. Rekọ ẹvẹ o rrọ uduotahawọ te re a rue rae nọ a be dawo ẹgba rai kpobi n’eva ze! Ẹme Ọghẹnẹ ọ kẹ rae imuẹro nnọ iruo rai gbe uyoyou nọ a dhesẹ kẹ odẹ Jihova e te thọ riẹ ẹro ho.—Luk 21:1-4; Hib. 6:10.
8 Otẹrọnọ whọ kẹle oke nọ who ti ro serihọ no iruo oyibo no, eme whọ gbẹ rehọ oma olẹ roro epanọ whọ sae rọ rehọ iyero ra nọ i bi nwene na ruiruo vọvọ họ? Avọ obufihọ Ọghẹnẹ, whọ sae ruẹ nnọ eriosehọ no iruo oyibo u re rovie uvẹ iruo buobu k’owhẹ nọ e rẹ wha ajiri se Jihova jẹ wha eghale buobu ze.—Ol. 148:12, 13.