“Whọ te Jọ Uvi Ọkobaro!”

1. Ẹvẹ oniọvo-ọmọtẹ jọ o rri iruo ọkobaro riẹ?

¹ Oniọvo-ọmọtẹ jọ nọ a re se Kathe B. Palm ọ ta nọ: “Iruo efa e riẹ hẹ nọ e hae wha evevọwẹ hayo ẹnyaharo abọ-ẹzi se omẹ wọhọ iruo ọkobaro na.” Ọ jọ ọkobaro evaọ ikpe buobu, yọ ọ ta usiuwoma evaọ enwene oria kpobi evaọ Chile nọ o rrọ obọ America. Ẹsejọhọ ohwo jọ ọ ta k’owhẹ no ẹdẹjọ inọ “whọ te jọ uvi ọkobaro” fikinọ o muẹrohọ uzuazọ evevọwẹ nọ enọ e rrọ iruo odibọgba oke-kpobi na a bi yeri.

2. Dhesẹ oware nọ iruẹru abọ-ẹzi e rẹ rọ kẹ uvi evawere?

² Uzuazọ nọ O rẹ Wha Evawere Ze: Jesu nọ ma be raro kele na, o wo uvi evawere evaọ eruo oreva Ọsẹ riẹ. (Jọn 4:34) Fikiere, orọnikọ Jesu ọ fake ta ha nọ o wuhrẹ ilele riẹ nnọ ohwo nọ o bi wobọ evaọ iruo Jihova o re wo uvi evawere. Eva e rẹ were omai nọ ma tẹ be rehọ uzuazọ mai ru iruo nọ e rẹ lẹliẹ omai wo ọjẹrehọ Jihova. Ofariẹ, ma tẹ be rehọ oke, ẹgba gbe eyero mai fi obọ họ kẹ amọfa, ma ti wo evawere ziezi.—Iruẹru 20:31, 35.

3. Oghọghọ vẹ ma ti wo nọ ma tẹ be raha oke buobu evaọ odibọgba na?

³ Nọ ma tẹ be raha oke buobu evaọ iruo odibọgba na, ma ti wo oghọghọ nọ u re no ẹtohọ gbe eru ebe-iwuhrẹ Ebaibol ze. O tẹ make rọnọ ibuobu e be gaviezọ k’omai hi, nọ ma bi wo onaa ziezi na, ma te ruẹ inọ ẹkwotọ mai ọ nwani yoma te epanọ ma je rri rie he. Ekobaro a te ru iruo ọkobaro te ukpe ọvo no, a re kpohọ Isukulu Ekobaro Oke-Kpobi, nọ a re jo wuhrẹ eware buobu nọ i re fi obọ họ kẹ ae evaọ odibọgba na. (2 Tim. 2:15) Nọ ma tẹ ruabọhọ iruo na, ma te kọ ibi uzẹme nọ e te mọ evaọ obaro.—Ọtausi. 11:6.

4. Eme izoge nọ i ti nwrotọ no ekọleji kẹle a re roro kpahe?

⁴ Izoge: Nọ who bi ti nwrotọ no ekọleji na, kọ who roro ziezi kpahe oware nọ whọ te rehọ uzuazọ ra ru no? Enẹna, isukulu e be mae rehọ oke ra. Nọ who te nwrotọ no, eme whọ te rehọ oke yena kpobi ru? Ukpenọ who re le utee iruo akpọ na, kọ whọ gbẹ lẹ je roro kpahe utee iruo ọkobaro oke-kpobi? Who ti wuhrẹ eware buobu nọ i ti fi obọ họ k’owhẹ evaọ edẹ uzuazọ ra kpobi nọ whọ be ta usiuwoma kẹ oghẹrẹ ahwo sa-sa na, bi fi ebẹbẹ obọra kparobọ, be daoma wo ẹzi oma-oyọrọ, gbe onaa ewuhrẹ na.

5. Ẹvẹ esẹgbini gbe ahwo nọ a rrọ ukoko na a sae rọ tuduhọ ohwohwo awọ re a ru iruo ọkobaro?

⁵ Esẹgbini, kọ wha be tuduhọ emọ rai awọ re a ruọ iruo odibọgba oke-kpobi na? Ẹme gbe emamọ oriruo ra i re fi obọ họ kẹ ae rehọ iruo Uvie na karo. (Mat. 6:33) Oniọvo-ọmọzae jọ nọ a re se Ray nọ o mu iruo ọkobaro họ nọ o nwrotọ no ekọleji no, ọ kareghẹhọ nọ: “Oni mẹ ọ jẹ hae ta nọ iruo ọkobaro họ iruo nọ e rẹ mae kẹ evevọwẹ evaọ uzuazọ.” Ahwo kpobi nọ a rrọ ukoko na a rẹ sae ta udu họ ohwohwo awọ re a ru ọkobaro ẹkwoma ẹmeunu gbe uketha rai. Jose, nọ ọ rrọ obọ Spain, ọ ta nọ: “Ahwo ukoko mẹ a rri iruo ọkobaro wọhọ iruo nọ e mai woma kẹ izoge. Eme ọ ezi nọ a jẹ hae ta kpahe iruo ọkobaro na gbe obufihọ rai u ru rie lọhọ k’omẹ nọ me ro mu iruo ọkobaro họ.”

6. Eme ma rẹ sai ru nọ ma gbe wo isiuru iruo ọkobaro ho?

⁶ Efikparobọ Ezadhe: Kọ otẹrọnọ whọ ta nọ, ‘Me wo isiuru iruo ọkobaro ho.’ O tẹ rrọ ere, lẹ se Jihova kpahe iroro ra jẹ ta kẹe nnọ, ‘Mẹ riẹ hẹ sọ mẹ rẹ sae jọ ọkobaro, rekọ mẹ gwọlọ ru oware nọ o rẹ were owhẹ.’ (Ol. 62:8; Itẹ 23:26) Kẹsena whọ vẹ gwọlọ ọkpọvio riẹ ẹkwoma Ebaibol na gbe ukoko riẹ. Ekobaro oke-kpobi buobu a kake ‘dawo’ iruo ọkobaro ẹkwoma ọkobaro obufihọ nọ a ru, yọ oghọghọ nọ a jariẹ wo o wọ rai mu iruo odibọgba oke-kpobi na họ.—Ol. 34:8.

7. Eme who re ru otẹrọnọ who roro nọ whọ rẹ sai ru euwa 70 nọ a gwọlọ kamara kamara na gba ha?

⁷ Kọ otẹrọnọ who roro nọ whọ rẹ sai ru euwa 70 nọ a gwọlọ kamara kamara na gba ha? Kọ who gbe lele ekobaro nọ i wo oghẹrẹ uyero ra na t’ẹme? (Itẹ 15:22) Kẹsena who ve kere omaa sa-sa fihọ otọ. Whọ rẹ te ruẹ nọ o re lọlọhọ re whọ rehọ oke nọ who je ro ru eware nọ i wuzou tere he ru iruo odibọgba na.—Ẹf. 5:15, 16.

8. Fikieme u ro fo re ma hae kiẹ uyero mai riwi noke ruoke?

⁸ Wariẹ Kiẹ Uyero Ra Riwi: Uyero ohwo u re dhe enwenwene. Fikiere, u re woma re whọ kiẹ uyero ra riwi noke ruoke. Wọhọ oriruo, Kọ oke nọ who ti ro serihọ no iruo o be kẹle no? Randy, ọnọ o no iruo riẹ yọ oke riẹ u ri te he ọ ta nnọ: “Onana u fi obọ họ k’omẹ nọ mẹ avọ aye mẹ ma ro mu ọkobaro họ, yọ onana u ru omai wo uvẹ nọ ma rọ kwa kpohọ oria nọ ẹgwọlọ ọ mae jọ rro. Me wo eghale buobu no, rekọ oghale nọ o mae rro họ, obroziẹ-iroro ọfuafo nọ me wo.”

9. Eme u fo nọ enọ e rọo no a re roro kpahe?

⁹ Nọ ezae avọ eyae jọ nọ e rọo no a roma totọ kiẹ uyero rai riwi no, a ruẹ nọ o roja ha re aimava a rehọ oke rai kpobi ru iruo. Onana o rẹ sae gwọlọ nọ uviuwou na u re gbobọnẹ eware jọ, rekọ erere riẹ o re ruaro. John, ọnọ aye riẹ o no iruo riẹ re ọ sai wobọ ziezi evaọ odibọgba na, ọ ta nọ: “Oware nọ o be k’omẹ evawere te onana o rọ họ inọ aye mẹ o bi wobọ vọvọ evaọ iruo Jihova.”

10. Eme ọ rẹ wọ Ileleikristi roro kpahe iruo ọkobaro?

¹⁰ U Dhesẹ Uyoyou gbe Ẹrọwọ: Iruo usiuwoma ota na họ iruo nọ e mae wuzou nọ Jihova ọ k’omai. A te raha akpọ anwae nana no kẹle, yọ enọ e be gọ Jihova ọvo a ti siwi. (Rom 10:13) Uyoyou udidi nọ ma wo kẹe gbe edẹro rọkẹ eware nọ o ru k’omai no o rẹ wọ omai rọ ajọwha ta usiuwoma na wọhọ epanọ Ọmọ riẹ o vi omai. (Mat. 28:19, 20; 1 Jọn 5:3) Ofariẹ, fikinọ u mu omai ẹro inọ edẹ urere na ma be rria na, ma rẹ rọ ẹgba mai kpobi ta usiuwoma na nọ oke o gbẹ riẹ na, ukpenọ ma rẹ roma kẹ ilale akpọ na.—1 Kọr. 7:29-31.

11. Ẹvẹ whọ rẹ rehọ iẹe nọ oniọvo jọ ọ tẹ ta k’owhẹ nọ whọ te jọ uvi ọkobaro?

¹¹ Orọnikọ a n’iyẹrẹ euwa buobu ọvo họ iruo ọkobaro oke-kpobi hi; rekọ yọ odhesẹvia orọ uyoyou nọ ma wo kẹ Ọghẹnẹ. Fikiere, nọ ohwo jọ ọ tẹ ta kẹ owhẹ nọ whọ te jọ uvi ọkobaro, rehọ iẹe wọhọ uduotahawọ. Roro jẹ lẹ kpahe epanọ whọ sai ro kuomagbe enọ i bi ru iruo nana nọ e rẹ kẹ evawere na.

[Ẹme nọ a fi ẹgba họ nọ ọ rrọ ẹwẹ-obe avọ 4]

Esẹgbini, kọ wha be tuduhọ emọ rai awọ re a ruọ iruo odibọgba oke-kpobi na?

[Ẹme nọ a fi ẹgba họ nọ ọ rrọ ẹwẹ-obe avọ 5]

Iruo usiuwoma ota na họ iruo nọ e mae wuzou nọ Jihova ọ k’omai.